વાત કરવી છે ગુજરાતના એક એવા પૂર્વ મંત્રી વિશે, જે આજે પણ જાત મહેનત કરી જીવવામાં માને છે. જાતે ખેતી કરે છે, ટ્રેક્ટર ચલાવે છે.
ગુજરાતના પૂર્વ વનમંત્રી ખેતીને પ્રાધાન્ય આપવામાં માને છે
જાતે ટ્રેક્ટર ચલાવી કરે છે ખેતી
ઔદ્યોગિક ખેતી કરી મેળવે છે સારું ઉત્પાદન
રાજનીતિ સાથે ખેડૂત ધર્મ પણ નિભાવે છે
વાત કરવી છે ગુજરાતના એક એવા પૂર્વ મંત્રી વિશે, જે આજે પણ જાત મહેનત કરી જીવવામાં માને છે. જાતે ખેતી કરે છે, ટ્રેક્ટર ચલાવે છે અને પોતાનું દરેક કામ પણ જાતે જ કરે છે. એટલું જ નહીં તેમને આ કામ કરવામાં કોઈ નાનપ કે, શરમ પણ નથી અને સ્થાનિક લોકોને ઓર્ગેનિક ખેતી તરફ આગળ વધારવા પ્રયાસો કરે છે.
ખેતરમાં અનેક પ્રકારના વૃક્ષો ઉગાડ્યા
આપણે વાત કરી રહ્યા છીએ પૂર્વ વન મંત્રી શબ્દસરણ તડવીની, જેઓ આજે પોતાના બાપ-દાદાની દૈન એવી પરંપરાગત ખેતી કરે છે. જાતે ખેતરમાં ટ્રેક્ટર ચલાવી ખેડ કરે છે,જાતે નીંદવાનું કામ કરે છે, જાતે બીજ રોપવાનું પણ કામ કરે છે. પોતાના ખેતરમાં અનેક પ્રકારના વૃક્ષો પણ ઉગાડ્યા છે.
VIDEO જોઈને તમને પહેલા તો એક સામાન્ય ખેડૂત પોતાના ખેતરમાં ખેડ કરતો હોય તેવો આભાષ થશે. પરંતુ હકીકત એ છે કે, જે વ્યક્તિ ખેતરમાં પરસેવો પાડી રહ્યો છે. તે પૂર્વ વન મંત્રી શબ્દસરણ તડવી છે. જોકે તેઓ પોતાના કામને લઈને શું કહી રહ્યા છે જરા તે પણ સાંભળો.
નરેન્દ્ર મોદીની સરકારમાં હતા મંત્રી
શબ્દસરણ તડવીના રાજકીય ઈતિહાસ અંગે વાત કરીએ તો તેઓને ખેતીની જેમ રાજનીતિ વારસામાં મળી છે. 2012-13માં વિધાનસભાની ચૂંટણીમાં ભાજપે નાંદોદ વિધાનસભા બેઠક પરથી ચૂંટણી લડાવી હતી અને તેમાં તેમનો વિજય થયો હતો. ત્યાર બાદ તત્કાલીક મુખ્યમંત્રી અને હાલના આપણા પ્રધાનમંત્રી મોદીએ તેમની સરકારમાં સીધા જ રાજ્યકક્ષાના વન મંત્રી બનાવ્યા હતા. આ દરમિયાન તેમણે ઓર્ગેનિક ખેતીના ક્ષેત્રમાં ખુબ કામ કર્યું. જોકે 2017માં સ્થાનિક ભાજપની જૂથબંધીમાં તેઓ ફરી વિધાનસભા ચૂંટણી ન જીતી શક્યા.
મહત્વનું છે કે, પૂર્વ વનમંત્રી હાલ ખેતીમાં વ્યસ્ત છે અને પોતાના આસપાસના વિસ્તારોમાં લોકોને ઓર્ગેનિક ખેતી માટે જાગૃત કરવાનું કામ કરી રહ્યા છે. આ સાથે જ તેઓ આગામી ગ્રામ પંચાયતની અને વિધાનસભાની ચૂંટણીની તૈયારીઓ પણ કરી રહ્યા છે. તેવામાં જોવું એ રહ્યું કે, આગામી 2022માં ફરી વિધાનસભામાં તેમને સ્થાન મળે છે કે, નહીં.