ઇલેક્શન 2022 / ગુજરાત વિધાનસભા ચૂંટણીની આગોતરી તૈયારીઓ, રાજકોટમાં મશીનોનું ચેકિંગ હાથ ધરતા 870 EVM અને VVPAT ખરાબ

• ગુજરાતમાં આગામી વિધાનસભાની ચૂંટણીની તૈયારીઓ શરૂ
• રાજકીય પક્ષોના પ્રતિનિધિની હાજરીમાં મશીનોનું ચેકિંગ હાથ ધરાયું
• 870 EVM અને VVPAT ખરાબ નીકળતા તેને બેંગ્લોર મોકલાશે

ગુજરાત વિધાનસભાની ચૂંટણી હવે નજીકના સમયમાં આવી રહી છે. ત્યારે તેને લઇને તમામ રાજકીય પક્ષો દ્વારા તડામાર તૈયારીઓ શરૂ કરી દેવાઇ છે. ત્યારે રાજકોટમાં રાજકીય પક્ષોના પ્રતિનિધિની હાજરીમાં મશીનોનું ચેકિંગ હાથ ધરવામાં આવ્યું. જેમાંથી EVMના ફર્સ્ટ ચેકિંગમાં જ 870 EVM અને VVPAT ખરાબ નીકળ્યા. આથી, તમામ મશીનોને બેંગ્લોર ખાતે પરત મોકલાશે.

રાજકોટ જિલ્લા ચૂંટણી તંત્ર પાસે હાલ 4100 VVPAT ઉપલબ્ધ છે

મહત્વનું છે કે, રાજકોટ જિલ્લા ચૂંટણી તંત્ર પાસે હાલ 4223 બેલેટ યુનિટ છે. જેમાંથી 3883 કંટ્રોલ યુનિટ અને 4100 VVPAT ઉપલબ્ધ છે. ઉલ્લેખનીય છે કે, રાજકોટ જિલ્લા વહીવટી તંત્ર દ્વારા આગામી વિધાનસભાની ચૂંટણી સંબંધિત તમામ તૈયારીઓ શરુ કરી દેવાઇ છે. ત્યારે ગઇકાલે રાજકોટ જિલ્લા કલેકટર કચેરીના જનસેવા કેન્દ્ર ખાતે EVM નિદર્શન કેન્દ્રનું ક્લેક્ટર અરુણ મહેશ બાબુના હસ્તે ઉદ્ઘાટન કરવામાં આવ્યું હતું. જેમાં ચૂંટણીમાં મતદાન કેવી રીતે કરવું અને કેવી રીતે EVM (ઈલેક્ટ્રોનિક વોટિંગ મશીન) નું બટન દબાવવું તેમજ VVPAT (વોટર વેરિફાએબલ પેપર ઓડિટ ટ્રેલ) માંથી પહોંચ કઈ રીતે નીકળે તેનું લાઈવ નિદર્શન કરવામાં આવ્યું હતું.

ગઇકાલે વિધાનસભાની બેઠકો પર EVM–VVPATનું નિદર્શન કરાયું

આ તકે જિલ્લા કલેક્ટર અરુણ મહેશ બાબુએ નાગરિકોને મતદાર યાદી સુધારણા કાર્યક્રમ અંતર્ગત નામ ઉમેરવા અને સુધારવા સહિતની સેવાઓનો લાભ લેવાની પણ અપીલ કરી હતી. તેઓએ પ્રથમ વખત મતદાન કરતા મતદારોએ EVM નિદર્શન કેન્દ્રોમાં વોટિંગ પ્રક્રિયાના લાઈવ નિદર્શનનો લાભ લેવાની પણ અપીલ કરી હતી.

ઉલ્લેખનીય છે કે, મતદારોની જાગૃતિ અને મતદાન અંગે નાગરિકોને તાલીમ આપવા જિલ્લા ચૂંટણી તંત્ર દ્વારા આઠ વિધાનસભા મત વિસ્તારોમાં 13 કેન્દ્ર તેમજ 26 મોબાઈલ ડેમોસ્ટ્રેશન વાન કાર્યરત કરવામાં આવી છે. જિલ્લા ચૂંટણી અધિકારી અરુણ મહેશ બાબુના માર્ગદર્શન હેઠળ અધિક જિલ્લા ચૂંટણી અધિકારી એસ.જે. ખાચરના નિદર્શનમાં ટ્રેઈન્ડ સ્ટાફ દ્વારા આ કવાયત ચાલી રહી છે.

તમને જણાવી દઇએ કે, રાજકોટ પૂર્વમાં બે, પશ્ચિમમાં 4, દક્ષિણમાં 3 તેમજ રાજકોટ ગ્રામ્યમાં 2 વાન કાર્યરત કરાઈ છે. જ્યારે જસદણ તેમજ ગોંડલ ખાતે 2, જેતપુર ખાતે 8 તેમજ ધોરાજી ખાતે 3 વાન દ્વારા લોકોને સ્થળ પર EVM તેમજ VVPAT અંગે માર્ગદર્શન આપવામાં આવી રહ્યું છે. EVM નિદર્શન કેન્દ્રના ઉદ્ઘાટનમાં રાજકોટ સિટી-2 પ્રાંત અધિકારી ડૉ. સંદીપ વર્મા, મામલતદાર એમ. ડી. દવે સહિત ચૂંટણી શાખાના અધિકારી અને કર્મચારીઓ પણ ઉપસ્થિત રહ્યાં હતા.