ના હોય! / વર્ષે દાડે દેશમાં ઢીંચાય છે 2.5 લાખ કરોડ રૂપિયાનો દારૂ, સ્ટ્રોંગ બીયર તો ભારતીયોની ફેવરિટ

• દેશની 33% વસ્તી આલ્કોહોલિક છે
• દેશમાં દર વર્ષે રૂ. 2.50 લાખ કરોડથી વધુનો દારૂ પીવાય 
• ગ્રામ્ય વિસ્તારોમાં દેશી દારૂનું વેચાણ સૌથી વધુ

ગુજરાતના બોટાદનો લઠ્ઠાકાંડ અત્યારે દેશભરમાં ચર્ચાનો વિષય બન્યો છે. ઝેરી દારૂ પીવાના કારણે અત્યાર સુધી 40 થી વધુ  લોકોના મોત થયા છે. ત્યારે એક સર્વે મુજબ દેશમાં દર વર્ષે રૂ. 2.50 લાખ કરોડથી વધુનો દારૂ પીવાય છે. આ રિપોર્ટના અંદાજ અનુસાર ભારતમાં વ્યક્તિદીઠ દારૂની ખપત 3 લિટર જેવી છે અને 2025 સુધીમાં તે સાડા ત્રણ લિટર સુધી થઈ જવાની ધારણા છે.

દેશની 33% વસ્તી આલ્કોહોલિક છે

એક સર્વે મુજબ સમગ્ર વિશ્વમાં ચીન અને રશિયા બાદ ભારત વિશ્વનું ત્રીજું સૌથી મોટું આલ્કોહોલ માર્કેટ છે. માર્ચ 2021 સુધીમાં દેશની 33% વસ્તી દારૂનું સેવન કરે છે. જે વર્ષ 2025 સુધીમાં આ ટકાવારી વધીને 39% થઈ જવાની સંભાવાના છે. રિપોર્ટમાં જણાવાયું છે કે, આગામી ત્રણ વર્ષમાં દેશમાં આલ્કોહોલિક પીણાંનું માર્કેટ વધીને રૂ. 3.50 લાખ કરોડ થઈ જવાનું અનુમાન છે.

ગ્રામ્ય વિસ્તારોમાં દેશી દારૂનું વેચાણ સૌથી વધુ

સર્વેમાં જણાવ્યા મુજબ હાલમાં ભારતમાં બનતા વિદેશી દારૂનું વેચાણ સૌથી વધુ 35%ની આસ-પાસ છે જ્યારે બીયરનું વેચાણ 33% ઉપર છે. જેમાં કેટેગરી વાઇઝ જોઈએ તો વાઇન 1%થી પણ ઓછી વેચાય છે. લોકલ ફ્લેવરના આધારે બનતા દેશી દારૂનું વેચાણ મુખ્યત્વે ગ્રામ્ય વિસ્તારોમાં વધારે થાય છે.

દેશમાં સૌથી વધુ વ્હિસ્કી પસંદ કરવામાં આવે છે 

વિદેશી દારૂ અથવા ભારતમાં બનતા વિદેશી દારૂની અલગ અલગ ફ્લેવરના વેચાણ શેર જોઈએ તો ભારતમાં વ્હિસ્કીનું વેચાણ સૌથી વધુ છે. આ કેટેગરીમાં કુલ વેચાણમાં વ્હિસ્કીનો માર્કેટ શેર 55% છે. ત્યારબાદ 23% રમ અને 16% બ્રાન્ડીનું વેચાણ થાય છે. બીજી તરફ જ્યાં વિશ્વમાં વૉડકા અને જીન જેવા વ્હાઇટ સ્પિરિટની બોલબાલા છે, ભારતમાં આનો શેર માત્ર 6% જેટલો છે.

લોકોને સ્ટ્રોંગ બીયર પીવાનું સૌથી વધુ ગમે છે 

છેલ્લા 20 વર્ષ દરમિયાન ભારતીયોમાં બીયર સૌથી વધુ પ્રચલિત આલ્કોહોલિક પીણું બન્યું છે. ભારતમાં બિયરનું જે વેચાણ છે તેમાં 85% માર્કેટ સ્ટ્રોંગ બીયરનું છે. જ્યારે માઈલ્ડ કે લાઇટ બીયરનું માર્કેટ માત્ર 15% છે. ઓવરઓલ આલ્કોહોલ માર્કેટમાં બીયર કેટેગરીનો શેર માત્ર 10% જ છે. બીજી નોંધપાત્ર બાબત એ છે કે પ્રીમિયમ બીયરનું માર્કેટ 25%ના દરે વધી રહ્યું છે.