પોલીસ કંટ્રોલ રૂમમાં કોઇપણ માહિતી આપો તે અંત્યત ગુપ્ત રહે છે તે વાત પરથી પરદો હટાવતો એક કિસ્સો સામે આવ્યો છે જેમાં કંટ્રોલ રૂમમાં દારૂના અડ્ડાની માહિતી આપનાર યુવકની વિગતો બુટલેગર સુધી પહોંચી ગઇ છે. પોલીસ કંટ્રોલ રૂમમાં ફરિયાદ કરવા માટે મહિલા બુટલેગર અને તેના પતિ સહિતના સાગરીતોઓ યુવકને એટલી હદે માર્યો છે તેના પગમાં સળિયા નંખાવવા પડ્યા છે. ઘાટલોડિયા પોલીસ સ્ટેશનના રહેમ નજર હેઠળ ચાલતા દારૂના ધંધાને બંધ કરાવવા યુવક પર હુમલો કરાવવા પાછળ પોલીસ ઇન્સ્પેક્ટરના વહીવટદારનું પણ નામ ઊછળી રહ્યું છે.
ન્યૂ રાણીપના નીલેશ પટેલે મહિલા બુટલેગર, તેના પતિ સહિત છ સામે લૂંટ અને હુમલાની ફરિયાદ નોંધાવી
ફોન કરી મહિલા બુટલેગરના પતિએ મળવા બોલાવ્યો, રિવોલ્વર બતાવી રિક્ષામાં અપહરણ કર્યું
પોલીસ કર્મચારીએ ફોન કરી બુટલેગરની બાતમી નહીં આપવા ધમકી આપી હોવાનો પણ આક્ષેપ
ન્યૂ રાણીપ વિસ્તારમાં આવેલ શાશ્વત એપાર્ટમેન્ટમાં રહેતા અને ઇલેટ્રિકનો ધંધો કરતા તેમજ ૩૮ વર્ષિય નીલેશ પટેલે શાહપુર પોલીસ સ્ટેશનમાં શૈલેશ રાણા, નરેશ પરમાર, ઇમરાન લંબુ, આશિક સહિત છ લોકો વિરુદ્ધમાં લૂંટ તેમજ હુમલાની ફરિયાદ કરી છે.
ફરિયાદમાં કરેલા આક્ષેપ પ્રમાણે નીલેશ દરિયાપુરથી ધી કાંટા તરફ જઇ રહ્યો હતો ત્યારે તેના મોબાઇલ પર ઘાટલોડિયા ગામમાં દારૂનો ધંધો કરતી મંજુ ઠાકોરના પતિ શૈલેશ રાણાનો ફોન આવ્યો હતો અને જણાવ્યું હતુંકે મંજુ દારૂનો ધંધો કરે છે. તેવો ફોન તું ૧૦૦ નંબર પર કેમ કરે છે. આ બાબતે તમારી સાથે વાતચીત કરવી છે તો તું શાહપુર રંગીલા પોલીસ ચોકી પાસે આવ.
નીલેશ મંજુ અને તેના પતિ શૈલેશ રાણાને મળવા માટે ગયો હતો. જ્યાં શૈલેશ સાથે તેનો કારીગર નરેશ પરમાર સહિત અન્ય બે યુવકો હાજર હતા. નીલેશ રંગીલા પોલીસ ચોકી પહોચ્યો ત્યારે નરેશ, શૈલેશ અને અન્ય બે શખ્સોઓ તેના પર બેઝ બોલની સ્ટિક તેમજ દંડા વડે હુમલો કર્યો હતો. દરમિયાનમાં શાહપુરમાં રહેતા અને શૈલેશ રાણા બે મિત્રો ઇમરાન લંબુ અને આશિક તલવાર લઇને આવ્યા હતા. જેમાં ઇમરાને તેને તલવારનો ઘા મારી દીધો હતો અને બળજબરીપૂર્વક રિક્ષામાં બેસાડીને તેનું રિવોલ્વરની અણીએ અપહરણ કર્યુ હતું.
નીલેશને રિક્ષામાં બેસાડીને અલગ અલગ જગ્યાએ ફેરવ્યો હતો અને ઘાટલોડિયા ખાતે આવાવરું જગ્યા પર જઇને માર માર્યો હતો. ત્યારબાદ સિવિલ હોસ્પિટલ જઇને નીલેશનું મોબાઇલમાં વીડિયો રેકોર્ડિંગ કર્યુ હતું અને ફરિયાદ નહીં કરવાની ધમકી આપી હતી. ફરિયાદમાં કરેલા આક્ષેપ પ્રમાણે નીલેશે પાસે ૨.૧૮ લાખ રૂપિયા રોક્ડા હતા તેમજ સોનાનો સેટ પણ હતો તે પણ તેમણે લૂંટી લીધો છે.
નીલેશને ઘાટલોડિયા ઇજાગ્રસ્ત હાલતમાં ઉતારી દીધો હતો અને ત્યારબાદ તે ૧૦૮ એમ્બ્યુલન્સની મદદથી હોસ્પિટલમાં સારવાર લીધી હતી. પગમાં બેઝ બોલના ફટકા વાગ્યા હોવાથી તેના પગમાં સળિયા નાખવા પડ્યા છે. શાહપુર પોલીસે છ લોકો વિરુદ્ધમાં ગુનો દાખલ કરીને તપાસ શરૂ કરી છે.
નીલેશે કરેલા આક્ષેપ પ્રમાણે ઘાટલોડિયા ગામમાં રામદેવપીરના મંદિરની સામે મંજુ ઠાકોર અને ટીનાજી ઠાકોર દારૂનો ધંધો ચલાવે છે. જેમાં તેને પોલીસ કંટ્રોલમાં ફોન કરીને દારૂનો ધંધો બંધ કરાવવાની વાત કરી હતી. નીલેશે પોલીસ કંટ્રોલમાં અંદાજે ૧૦ થી ૧૨ કોલ કરીને દારૂનો ધંધો બંધ કરાવવા માટે કહ્યું હતું અને નામ નંબર ગુપ્ત રાખવા પોલીસ કર્મચારીઓને જણાવ્યુ હતું. ૨૦ જાન્યુઆરી ઘાટલોડિયા પોલીસ સ્ટેશનના પોલીસ કર્મચારીએ નીલેશને ફોન કર્યો હતો અને પોલીસ કમિશનર કચેરીએ મળવા માટે બોલાવ્યો હતો અને કર્મચારીએ પોલીસ કંટ્રોલમાં ફોન નહીં કરવાનું જણાવ્યું હતું.
છતાં પણ નીલેશે પોલીસ કંટ્રોલમાં ફરીથી ફોન કર્યો હતો. જેથી પોલીસ કર્મચારીએ ફરીથી અન્ય નંબરથી કોલ કરીને ધમકી આપી હતી કે તે અમારા લોકોની બે નંબરની કમાણી બંધ કરાવી છે તને જાનથી પતાવી દઇશું. નીલેશે પોલીસ કંટ્રોલ રૂમમાં ફોન કરવાનું ચાલુ રાખતા અંતે મંજુબહેન અને તેના પતિને પોલીસ કર્મચારીઓએ નંબર આપી દીધો હતો. જેના કારણે આ ઘટના ઘટી છે. પોલીસ આ મામલે નિષ્પક્ષ તપાસ કરે તો ઘણા પોલીસ કર્મચારીઓના નામ ખૂલે તેવી શકયતા છે. કારણ કે પોલીસ કંટ્રોલ રૂમમાં વિગતો આપનારની માહિતી અંત્યત ગુપ્ત રાખવામાં આવે છે તો કેવી રીતે મંજુબહેન અને તેના પતિ પાસે નીલેશનો નંબર પહોંચ્યો.