તમારા કામનું / આજના ડિજિટલ યુગમાં પણ બેંક કે કોઈ કંપની કેમ માંગે છે Cancelled Cheque? જાણો શું છે તેનું મહત્વ

• શું તમે જાણો છો કે કેન્સલ ચેકની જરૂર કેમ પડે છે?
• બેંક કે વીમા કંપનીઓ તેના ગ્રાહકો પાસે કેન્સલ ચેક માંગે છે
• ક્યાં ક્યાં પડે છે એ કેન્સલ ચેકની જરૂર 

આજના ડિજિટલ યુગમાં જ્યારે સ્માર્ટફોનમાંથી બસ એક જ ક્લિકથી એક ખાતામાંથી બીજા ખાતામાં પૈસા ટ્રાન્સફર થઈ જાય છે. બેન્કિંગના દરેક કામ ઓનલાઈન થઈ જતાં હોય છે એવામાં હાલ બેંક જવાની જરૂર લોકોને ઓછી પડે છે. આજના ડિજિટલ યુગમાં પણ કેન્સલ ચેકની પરંપરા હજુ ચાલી રહી છે. આજે પણ બેંક કે વીમા કંપનીઓ તેના ગ્રાહકો પાસે કેન્સલ ચેક માંગે છે. આ સાથે જ નવી નોકરી સમયે પણ કંપની તેના કર્મચારીઓ પાસે કેન્સલ ચેકની માંગ કરે છે. શું તમે જાણો છો કે કેન્સલ ચેકની જરૂર કેમ પડે છે? ચાલો અમે તમને તેના વિશે જણાવીએ.. 

કેમ પડે છે કેન્સલ ચેકની જરૂર 
જ્યારે તમે કેન્સલ ચેક આપો છો ત્યારે તેના પર સાઇન કરવાની જરૂર પડતી નથી. બસ ચેક પર કેન્સલ લખવાની જરૂર પડે છે અને એટલથી જ કામ ચાલી જાય છે. આ સવે ચેક પર ક્રોસ સાઇન પણ બનાવવામાં આવે છે. કોઈ કંપની કે બેન્ક કેન્સલ ચેકનો ઉપયોગ તેના ગ્રાહકોને એકાઉન્ટને વેરીફાઈ કરવા માટે કરે છે. 

ચેક પર હોય છે જાણકારીઓ
સામાન્ય રીતે કેન્સલ ચેક આપવાનો મતલબ એ થાય છે કે તમારું ખાતું તે બેંકમાં હાજર છે. ચેક પર તમારું નામ હોય કે ન હોય તેનાથી કર્ક નથી પડતો પણ ચેક પર તમારો બેંક એકાઉન્ટ નંબર લખેલો હોય એ મહત્વનું છે. આ સાથે જ તમારી બ્રાન્ચનો IFSC કોડ પણ ચેક પર લખેલ હોય છે. કેન્સલ ચેકથી જ કંપનીઓ અથવા બેંકો એકાઉન્ટની ચકાસણી કરાવે છે. 

કેન્સલ ચેક પરથી પૈસા ઉપાડી શકીએ? 
કેન્સલ ચેકથી કોઈ પણ ખાતામાંથી પૈસા ઉપાડી શકતા નથી. કેન્સલ ચેકનો ઉપયોગ ફક્ત એકાઉન્ટ વેરીફાઈ કરવા માટે જ થાય છે. જ્યારે કેન્સલ ચેક કોઈને આપવામાં આવે છે ત્યારે એ ચેક વચ્ચે કેન્સલ લખવામાં આવે છે એટલા માટે કોઈ એ ચેકનો દુરુપયોગ નથી કરી શકતા. 

ક્યાં ક્યાં પડે છે એ ચેકની જરૂર 
જ્યારે તમે કોઈ પણ નાણાકીય કામ કે વ્યવહાર કરો છો ત્યારે કેન્સલ ચેકની જરૂર પડે છે. જ્યારે કાર લોન, હોમ લોન અથવા પર્સનલ લોન લેવી હોય ત્યારે બેંક કેન્સલ ચેક માંગે છે. આ સિવાય પ્રોવિડન્ટ ફંડમાંથી પૈસા ઉપાડતા સમયે અને મ્યુચ્યુઅલ ફંડમાં રોકાણ કરતી વખતે પણ કંપનીઓ કેન્સલ ચેક માંગે છે. આ સિવાય EPF ના પૈસા ઉપાડવા, ડીમેટ ખાતું ખોલવા, બેંકમાં KYC કરાવવા માટે, વીમો ખરીદવા માટે અને EMI ચૂકવવા માટે તેની જરૂર પડે છે. 

ખાસ જણાવી દઈએ કે ચેક કેન્સલ કરવા માટે હંમેશા બ્લેક અથવા બ્લૂ પેનનો ઉપયોગ કરવામાં આવે છે.  કેન્સલ ચેક માટે અન્ય કોઈપણ રંગની પેનનો ઉપયોગ થવો જોઈએ નહીં.