ધરપકડ / બેંક તો લૂંટી પણ એક જ દિવસમાં થયા જેલ ભેગા : અંકલેશ્વરમાં 44 લાખની લૂંટનો ભેદ ઉકેલાયો

• અંકલેશ્વરની યુનિયન બેન્કમાં થયેલ લૂંટનો ભેદ ઉકેલાયો
• પોલીસે આરોપીઓને ઝડપી લૂંટમાં ગયેલ રોકડ કબ્જે કરી 
• ભરૂચ પોલીસે જીવ સટોસટી ઉપર ખેલી લૂંટારુઓને દબોચ્યા

અંકલેશ્વરની યુનિયન બેન્કમાં થયેલ રૂપિયા 44 લાખની લૂંટના ગુનામાં પોલીસે ગણતરીના કલાકોમાં જ આરોપીઓને ઝડપી પાડી લૂંટમાં ગયેલ તમામ કેસ કબ્જે કરી હતી. પોલીસે પ્રતિકાર કરતા આરોપીઓ દ્વારા ફાયરિંગ પણ કરવામાં આવ્યું હતું જો કે ભરૂચ પોલીસના જવાનોએ પોતાના જીવની ચિંતા કર્યા વગર લુટારુઓનો સામનો કરતા સમગ્ર કેસનો ભેદ ઉકેલાયો હતો. 

સ્ટાફ, ગાર્ડ અને લોકોને તમંચાની અણીએ બંધક બનાવી લૂંટ ચલાવી હતી
અંકલેશ્વર યુનિયન બેંક લૂંટને ભરૂચ પોલીસે જીવ સટોસટી ઉપર ખેલી લૂંટારુઓના 10 રાઉન્ડ ફાયરિંગ સામે પણ નિષ્ફળ બનાવી દીધી છે.ભરૂચ જિલ્લા પોલીસ વડા ડો. લીના પાટીલ દ્વારા લૂંટ ડિટેક્શન અને દિલધડક ઓપરેશન અંગે બપોરે પત્રકાર પરિષદ યોજી હતી. અંકલેશ્વર પીરામણ નાકા પાસે આવેલી યુનિયન બેંકમાં બેંક ક્લોઝિંગ ટાઈમે બે બાઇક ઉપર 5 બુકાનીધારી લૂંટારું ત્રાટકયા હતા.સ્ટાફ, ગાર્ડ અને લોકોને તમંચાની અણી એ બંધક બનાવી રૂપિયા 44 લાખની લૂંટ ચલાવી તેઓ ભગવા જઈ રહ્યા હતા. જોકે બહાર કરીયાણું લેવા આવેલા સાયબર સેલના ધર્મેન્દ્રસિંહ ઝાલાએ હિંમતભેર લૂંટારુંને પડકાર્યા હતા.

બનાવની ગૃહ રાજ્યપ્રધાન હર્ષ સંઘવીએ પણ નોંધ લીધી 
પોલીસ કંટ્રોલ ઉપર લૂંટનો મેસેજ છૂટતા જ પહેલેથી જ રાતની ફાયરિંગની ઘટનામાં તપાસમાં રહેલા  એલસીબી પી.આઈ. કે.ડી. મંડોરા, પંચાણી,  જે.બી. જાદવ, એમ.એચ. વાઢેર, જે.એન. ભરવાડ, શકોરિયા સહિતના એક્શનમાં આવી ગયા હતા. લૂંટારુઓએ તેમના ઉપર 10 રાઉન્ડ ફાયરિંગ કર્યું હતું. જોકે પ્રતિકારમાં પોલીસના બે રાઉન્ડ ફાયરિંગમાં એક લૂંટારું રાહુલકુમાર ઘવાયો હતો અને લૂંટના 22.54 લાખ સાથે ઝડપાઇ ગયો હતો.પોલીસના રાતે ચાલેલા સર્ચ ઓપરેશનમાં મીરાનગરમાંથી અલગ દુનિયામાં રાચી રહેલા અન્ય 4 લૂંટારું રોહિત નવલ મંડલ, મનીષ નરેશ મંડલ, મુકેશ નવલ મંડલ અને દિપક સુબોધ સીંગને 4 તમંચા, બે બાઇક અને 5 મોબાઈલ સાથે લૂંટના અન્ય રોકડા 15.25 લાખ સાથે દબોચી લીધા હતા.સમગ્ર ઓપરેશન માત્ર 8 કલાકમાં પાર પડાયું હતું. આ બાબતની ગૃહ રાજ્યપ્રધાન હર્ષ સંઘવીએ પણ નોંધ લીધી હતી અને તેઓએ ભરુચ પોલીસને અભિનંદન પાઠવ્યા હતા. હજી લૂંટના 6.45 લાખ, આરોપીઓની વ્યક્તિગત સહિત ગુનાહિત કુંડળી, લૂંટ પાછળનું મકસદ અને સમગ્ર પ્લાન અંગે પોલીસ વધુ ઇન્ટ્રોગેશન કરી રહી છે.