ખાસ કરીને પોલીસ ચોર અથવા કેદીની પાછળ દોડતી હોય છે પરંતુ અમદાવાદ પોલીસના 2 કર્મચારીઓ દેશ માટે દોડશે. ઇટાલીના ટેરિનો સિટીમાં યોજાનાર 'યુરોપિયન માસ્ટર્સ ગેમ્સ' માં ગુજરાત પોલીસના 2 બે કોન્સ્ટેબલની પસંદગી કરાઇ છે. કોન્સ્ટેબલ રોહિતસિંહ વાઘેલા અને હરપાલસિંહ વાઘેલાની પસંદગી કરવામાં આવી છે.
નોંધનીય છે કે, આ બંને કોન્સ્ટેબલ વાસણા અને સરખેજ પોલીસ સ્ટેશનમાં ફરજ બજાવે છે. જેઓ ઇટાલીમાં યોજાનાર માસ્ટર્સ ગેમ્સ માટે ભારતનું પ્રતિનિધિત્વ કરશે. ઇટાલીમાં યોજનાર માસ્ટર્સ ગેમ્સ માટે ભારતમાંથી 3 લોકોની પસંદગી થઇ જેમાં ગુજરાતના બે પોલીસ જવાન છે.
આપને જણાવી દઇએ કે, વાસણા પોલીસ સ્ટેશનના ASI હરપાલસિંહ વાઘેલા અને સરખેજ પોલીસ સ્ટેશનના કોન્સ્ટેબલ રોહિતસિંહ વાઘેલા અત્યાર સુધીમાં અનેક સ્પર્ધાઓમાં ભારતનું પ્રતિનિધિત્વ કરીને મેડલ્સ જીત્યા છે.
આ પહેલા પણ ગુજરાત પોલીસના આ બે ઝાંબાજ પોલીસકર્મીઓ મલેશિયા અને સિંગાપોરમાં યોજાયેલી એશિયા લેવલ મેચોમાં પણ ભારત દેશનું પ્રતિનિધિત્વ કરી આવ્યા છે. અત્યાર સુધીમાં આ બંને ખેલાડીઓ ભારત માટે 20 જેટલા મેડલ્સ લઈ આવ્યા છે, જેમાં 9 ગોલ્ડ મેડલ્સનો પણ સમાવેશ થાય છે.