એમ્પ્લોઇઝ પ્રોવિડન્ટ ફંડ ઓર્ગેનાઇઝેશન (EPFO) તેમના પેન્શનરોના લાઈફ સર્ટિફિકેશન જમા કરાવવા માટે કોમન સર્વિસ સેન્ટર (CSC)ની વ્યવસ્થા કરી છે. જેમાં પેન્શનધારકો લાઈફ પ્રૂફ જમા કરાવી શકશે. એક સત્તાવાર નિવેદનમાં આ જાણકારી આપવામાં આવી છે. જેમાં એવું કહેવામાં આવ્યું છે કે, લગભગ 65 લાખ પેન્શનરો 3.65 લાખથી વધુ સીએસસી સેન્ટર પર તેમનું લાઈફ પ્રૂફ આપી શકે છે.
પેન્શનધારકો માટે આવ્યા સારાં સમાચાર
હવે પેન્શનરોના લાઈફ સર્ટિફિકેશન જમા કરાવવા માટે કોમન સર્વિસ સેન્ટરનો ઉપયોગ કરી શકશે
પેન્શનરો તેમનું ડિજિટલ લાઈફ સર્ટિફિકેટ પણ આપી શકે છે.
શ્રમ મંત્રાલયે એક નિવેદનમાં જણાવ્યું છે કે, ઇપીએફઓએ કર્મચારી પેન્શન યોજના (ઇપીએસ) હેઠળ આવતા પેન્શનરોને, ખાસ કરીને કોવિડ-19 મહામારી દરમિયાન ડોર-ટુ-ડોર સેવા પહોંચાડવા માટે સીએસસી સાથે ભાગીદારી કરી છે. આમાં પેન્શનરો તેમનું ડિજિટલ લાઈફ સર્ટિફિકેટ આપી શકે છે. ઇપીએસ પેન્શનરોએ દર વર્ષે પેન્શન ચાલુ રાખવા માટે લાઇફ પ્રૂફ આપવાનું હોય છે. સીએસસી સિવાય ઇપીએસ પેન્શનરો 135 પ્રાદેશિક કચેરીઓ અને 117 જિલ્લા કચેરીઓ અને પેન્શન વિતરણ કરતી બેંકો દ્વારા જીવન પ્રમાણપત્ર એકત્રિત કરી શકે છે. EPFOએ ઈપીએસ પેન્શનરોને રાહત આપવા સર્વિસ ડિલિવરી એજન્સીની પસંદગી કરવાનો વિકલ્પ આપ્યો છે.
પેન્શનધારકો તેમની સુવિધા મુજબ વર્ષના કોઈપણ સમયે ડિજિટલ લાઇફ પ્રૂફ આપી શકે છે. આ પ્રૂફ જમા કરવાની તારીખ એક વર્ષ સુધી માન્ય રહે છે. અગાઉ પેન્શનરોએ નવેમ્બર મહિનામાં લાઇફ પ્રૂફ આપવું પડતું હતું. આનાથી ઘણીવાર પેન્શનરોને મુશ્કેલીઓ થતી હતી અને પેન્શન અંગે મોટી સંખ્યામાં ફરિયાદો થતી હતી.
ઘેર બેઠા આ રીતે કરો અરજી
પેન્શનર જીવન પ્રમાણ પોર્ટલ દ્વારા લાઈફ પ્રૂફ સબમિટ કરી શકે છે. તે તમારા આધાર નંબર સાથે જોડાયેલ છે. આ માટે, પેન્શનરને પેન્શન ખાતાવાળી બેંક શાખામાં જવાની પણ જરૂર નથી. જીવન પ્રમાણ પોર્ટલ દ્વારા આધાર અને વેરિફિકેશનને લાઈફ પ્રૂફ તરીકે ગણવામાં આવશે.
https://jeevanpramaan.gov.in/લિંક ઓપન કરો
હવે પેન્શનવાળા કોલમમાં તમારા આધારનો ઈ-વેરિફિકેશન કરો
ઈ-વેરિફિકેશન બાદ ડિજિટલ લાઈફ સર્ટિફિકેટ જનરેટ થશે
આ સર્ટિફિકેટ તમારા લાઈફ સર્ટિફિકેટ રિપોઝિટરીમાં સ્ટોર થઈ જશે
જો તમે બેંક જઈને આધાર ઈ-વેરિફિકેશન કરાવો છો તો બેંક અધિકારી તમારા લાઈફ પ્રૂફની પ્રિન્ટ આઉટ પર સાઈન કરી દેશે.