પ્રોસેસ / કંપની બંધ થવા પર PFના પૈસા અટકી જાય તો ચિંતા ન કરતાં, આ સરળ પ્રોસેસથી ઉપાડી શકો છો

• જે સંસ્થામાં કામ કરતા હોવ અને તે બંધ થઈ જાય તો ચિંતા ન કરતાં
• તમારા પીએફના પૈસા આ સરળ રીતે ઉપાડી શકો છો
• 36 મહિના સુધી પીએફ ખાતામાં કોઈ ટ્રાન્ઝેક્શન ન થતાં ખાતું બંધ થઈ જાય છે

જો તમારી જૂની કંપની બંધ થઈ ગઈ છે અને તમે તમારા પૈસા નવી કંપનીના ખાતામાં ટ્રાન્સફર કર્યા નથી અથવા તો જો 36 મહિનાથી ખાતામાં કોઈ ટ્રાંઝેક્શન નથી થયું, તો તમારું અકાઉન્ટ નિયમો અનુસાર આપમેળે બંધ થઈ જશે. ઇપીએફઓ આવા ખાતાઓને નિષ્ક્રિય કેટેગરીમાં મૂકે છે. નિષ્ક્રિય હોય ત્યારે ખાતામાંથી પૈસા ઉપાડવાનું પણ મુશ્કેલી આવે છે. આ માટે અકાઉન્ટને એક્ટિવ રાખવા માટે ઇપીએફઓનો સંપર્ક કરવો પડશે. જોકે, નિષ્ક્રિય થયા પછી પણ ખાતામાં રહેલાં પૈસા પર વ્યાજ મળતું રહે છે. 

બેંકની મદદથી પૈસા કાઢી શકાય છે

જો તમારી જૂની કંપની બંધ છે અને તમે તમારા પૈસા નવી કંપનીના ખાતામાં ટ્રાન્સફર કર્યા નથી અથવા જો આ ખાતામાં 36 મહિનાથી કોઈ ટ્રાંઝેક્શન નથી થયું, તો 3 વર્ષ પછી આ એકાઉન્ટ આપમેળે બંધ થઈ જશે અને ઇપીએફના નિષ્ક્રિય અકાઉન્ટ્સ સાથે કનેક્ટ થઈ જશે. આ પૈસાની બેંકની મદદથી તમે કેવાયસી દ્વારા પૈસા ઉપાડી શકો છો.

કંપની બંધ થવા પર આ રીતે સર્ટિફાઈ કરાવો

ઈપીએફઓએ તેના એક સર્કુલરમાં આ નિયમ સંબંધિત કેટલાક મુદ્દાઓ બહાર પાડ્યા છે. ઈપીએફઓના જણાવ્યા મુજબ, નિષ્ક્રિય ખાતાઓ સંબંધિત ક્લેમને પતાવવામાં સાવધાની રાખવી જરૂરી છે. ધ્યાન રાખવું કે ફ્રોડ ન થાય અને ક્લેમની રકમ યોગ્ય વ્યક્તિને મળી રહે. તેના માટે જરૂરી છે કે, એ ક્લેમને કર્મચારીનો એમ્પ્લોયર સર્ટિફાઈડ કરે. જોકે, જે કર્મચારીઓની કંપની બંધ થઈ ચૂકી છે અને ક્લેમ સર્ટિફાઈડ કરવા માટે કોઈ નથી તો એવા ક્લેમને બેંક કેવાયસી દસ્તાવેજોના આધારે સર્ટિફાઈ કરે છે.  

આ દસ્તાવેજો છે જરૂરી

કેવાયસી દસ્તાવેજોમાં પાનકાર્ડ, મતદાર ઓળખ કાર્ડ, પાસપોર્ટ, રાશનકાર્ડ, ઈએસઆઈ ઓળખ કાર્ડ, ડ્રાઇવિંગ લાઇસન્સ સામેલ છે. આ સિવાય સરકાર દ્વારા જારી કરાયેલા આધાર જેવા અન્ય કોઈ ઓળખ કાર્ડનો પણ ઉપયોગ કરી શકાય છે. આ પછી આસિસ્ટન્ટ પ્રોવિડન્ટ ફંડ કમિશનર અથવા અન્ય અધિકારી (રકમ અનુસાર)થી પૈસા ઉપાડવાની  અથવા ટ્રાન્સફર કરવાની મંજૂરી લઈ શકાય છે.