મનોરંજન / દિલ્હી હાઈકોર્ટે સંગીતકાર એ.આર. રહેમાનને ફટકાર્યો 2,00,00,000નો દંડ, જાણો શું છે કારણ

પ્રખ્યાત સંગીતકાર અને ગાયક એઆર રહેમાનને દિલ્હી હાઈકોર્ટ તરફથી મોટો ઝટકો લાગ્યો છે. ઓસ્કાર વિજેતા ગાયક અને ફિલ્મ નિર્માણ કંપની મદ્રાસ ટોકીઝ પર ગીતની કૉપી કરવાનો આરોપ લાગ્યો છે. દિલ્હી હાઈકોર્ટે 2023 ની ફિલ્મ પોન્નિયનસેલ્વન 2 ના ગીત 'વીરા રાજા વીરા'ના સંગીતના કોપીરાઈટ ઉલ્લંઘનના કેસમાં એઆર રહેમાન અને પ્રોડક્શન કંપની મદ્રાસ ટોકીઝ પર 2 કરોડ રૂપિયાનો વચગાળાનો દંડ ફટકાર્યો છે. કોર્ટે માન્યું છે કે ઐશ્વર્યા રાય બચ્ચન અભિનીત તમિલ ફિલ્મ 'પોન્નિયનસેલ્વન 2' નું ગીત 'વીરા રાજા વીરા' પ્રખ્યાત શાસ્ત્રીય ગાયક ઉસ્તાદ ફૈયાઝુદ્દીન વસીફુદ્દીન ડાગરના પિતા અને કાકા દ્વારા રચિત 'શિવા સ્તુતિ' ની નકલ છે.

દિલ્હી હાઈકોર્ટમાં ધ્રુપદ સંગીતકાર ઉસ્તાદ વસીફુદ્દીન ડાગરે અરજી દાખલ કરીને અરજીમાં જણાવ્યું કે એઆર રહેમાને ફિલ્મ પોન્નિયનસેલ્વન 2 માં તેમને ક્રેડિટ આપ્યા વિના તેમના સંગીતનો ઉપયોગ કરીને કૉપીરાઈટનું ઉલ્લંઘન કર્યું છે. અરજીમાં વીરા રાજા વીરા ગીતના કૉપીરાઈટના ઉલ્લંઘનનો આરોપ મૂકવામાં આવ્યો હતો. અરજીમાં કહેવામાં આવ્યું છે કે તેમના પિતા નાસિર ફૈયાઝુદ્દીન ડાગર અને કાકા ઝહીરુદ્દીન ડાગર દ્વારા રચિત સંગીત પર તેમનો કૉપીરાઈટ છે. આ પ્રકારના ગાયનને ડાગર વાણી નામ આપવામાં આવ્યું છે અને તે ધ્રુપદ ગાયનનો આધાર છે. અરજીમાં કહેવામાં આવ્યું હતું કે અરજદારના પિતાના જૂના ગીતોમાંનું એક શિવ સ્તુતિ છે જે 1970માં ગવાયું હતું.

કૉપીરાઈટ ઉલ્લંઘન કેસ

આ આદેશ જસ્ટિસ પ્રતિભા સિંહની બેન્ચ દ્વારા જારી કરવામાં આવ્યો છે. કોર્ટે કહ્યું કે વીરા રાજા વીરા ગીતની સૂર અને લય શિવ સ્તુતિ ગીત જેવી જ છે, સાથે જ તે કેટલાક ફેરફારો સાથે શિવ સ્તુતિ જ લાગે છે. બસ, આમાં નાના ફેરફારો થયા છે. કોર્ટે તારણ કાઢ્યું કે સંગીતની રચના, લય અને બીટ મૂળ ગીત સાથે ખૂબ જ મળતી આવે છે. તેથી, આ કૉપીરાઈટ ઉલ્લંઘનની શ્રેણીમાં આવે છે.

2 કરોડ ચૂકવવાનો આદેશ

કોર્ટે ફિલ્મ પ્રોડક્શન કંપની મદ્રાસ ટોકીઝ અને ગાયક એઆર રહેમાનને કોર્ટ રજિસ્ટ્રીમાં 2 કરોડ રૂપિયા જમા કરાવવાનો આદેશ આપ્યો છે. ઉપરાંત, ઉસ્તાદ ફૈયાઝુદ્દીન વસીફુદ્દીન ડાગરના પરિવારને 2 લાખ રૂપિયાનું વળતર ચૂકવવાનું કહેવામાં આવ્યું છે. કોર્ટે એમ પણ કહ્યું કે 'વીરા રાજા વીરા' ગીતના ક્રેડિટ્સ યુટ્યુબ અને ઓટીટી સહિત, તે બધા પ્લેટફોર્મ પર સુધારવા જોઈએ જ્યાં આ ગીત ઉપલબ્ધ છે. આ ઉપરાંત, ઓનલાઈન પ્લેટફોર્મ પર એક નવી સ્લાઇડ બનાવવી જોઈએ જેમાં લખવું જોઈએ, 'સ્વર્ગીય ઉસ્તાદ એન ફૈયાઝુદ્દીન ડાગર અને સ્વર્ગીય ઉસ્તાદ ઝહીરુદ્દીન ડાગર દ્વારા શિવ સ્તુતિ પર આધારિત રચના.'

આ પણ વાંચો: અમિતાભ બચ્ચનથી લઈને ઓમપુરી, આ બોલિવૂડ સ્ટાર્સે મોટી ઉંમરે આપ્યા હતા ઈન્ટિમેટ સીન્સ

એઆર રહેમાને આપી દલીલ

બીજી તરફ, આ સમગ્ર મામલામાં, ગાયક એ.આર. રહેમાન અને મદ્રાસ ટોકીઝની ટીમે તેમના પરના કૉપીરાઈટ આરોપોને ખોટા ગણાવીને નકારી કાઢ્યા છે. તેમના આરોપો પર દલીલ છે કે પોન્નિયનસેલ્વન 2' નું 'વીરા રાજા વીરા' ગીત નારાયણ પંડિતાચાર્ય દ્વારા 13મી સદીની રચનાથી પ્રેરિત છે. એ.આર. રહેમાનના વકીલે સૂચવ્યું કે ડાગર પરિવાર દ્વારા દાખલ કરાયેલો કેસ નાણાકીય વળતરની ઇચ્છાથી પ્રેરિત છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ