મનોરંજન / અંતરાત્માના અવાજને અનુસરોઃ ભૂમિ પેડનેકર

કારકિર્દીની શરૂઆતથી જ ફિલ્મની પસંદગી બાબતે ભૂમિ પેડનેકર સ્ક્રિપ્ટ વાંચી વિષયને સમજી જોખમ લેવામાં માને છે. આ અભિગમમાં એને સફળતા ચોક્કસ મળી છે. તે જે રીતે એક પછી એક વૈવિધ્યસભર ભૂમિકાઓ ભજવે છે એ વખાણવાલાયક છે, પછી એ તેની કારકિર્દીની પ્રથમ ફિલ્મ ‘દમ લગા કે હઇશા’ (૨૦૧૫)ની મેદસ્વી મહિલાની ભૂમિકામાં હોય, ‘લસ્ટ સ્ટોરીઝ’ (૨૦૧૮)માં નોકરાણીના પાત્રમાં હોય કે હાલમાં રજૂ થયેલી ફિલ્મ ‘સોનચીડિયા’માં બુંદેલખંડી સ્ત્રીના પાત્રમાં હોય. 

ભૂમિએ સફળતાપૂર્વક એવી પ્રતિભા ઉપસાવી છે કે એ એક એવી કલાકાર છે, જે કોઇ પણ પાત્ર ભજવી શકે છે. ભૂમિ કહે છે કે, ‘ફિલ્મની વાર્તા જ્યારે મારી પાસે આવે છે ત્યારે હું બારીકાઇથી વાંચું છું. મેં એવી રીતે ક્યારેય વિચાર્યું જ નથી કે હાલમાં મારી પાસે કોઇ ફિલ્મ નથી એટલે હું આ ફિલ્મ લઇ લઉં. તમે કોઇ પણ ફિલ્મ પસંદ કરો એ તમારા અંતરના અવાજને પારખીને કરવી જોઇએ. 

૨૦૧૭માં આવેલી ‘ટોઇલેટ એક પ્રેમકથા’ હોય કે પછી એ જ વર્ષે આવેલી ‘શુભ મંગલ સાવધાન’, આ ફિલ્મોમાં કામ કરીને ભૂમિએ એ તો સાબિત કરી દીધું છે એ પડકાર ઝીલનારી વ્યક્તિ છે. કોઇ પણ અભિનેત્રી આવી ભૂમિકાઓને પોતાની કારકિર્દી માટે જોખમરૂપ માનતી હોય છે, પરંતુ ભૂમિ નૈતિક માન્યતાના આધારે ફિલ્મો પસંદ કરે છે.