ચેતજો / ગેસ અને એસીડિટીથી રાહત મેળવવા ENO પીતા હોય તો રહેજો સાવધાન, ગાંધીનગરમાં સામે આવી મોટી ગડબડ

• ગાંધીનગરના દહેગામમ પાસેથી ઝડપાઇ નકલી ENO બનાવતી ફેક્ટરી 
• દરોડામાં 45 લાખનો મુદ્દામાલ કરાયો જપ્ત 
• કંપનીના માલિક-કર્મચારીઓ સામે કોપી રાઇટ ભંગનો નોંધાયો ગુનો

ENOને ગેસ અને એસીડિટીનો રામબાણ ઈલાજ ગણવામાં આવે છે. ગેસ, એસીડિટીની બીમારી ભોગવતા અસંખ્ય લોકો રાહત માટે  ENO પીતા હોય છે તેવામાં હવે ENO પીતા પહેલા સો વખત વિચારવા અને ENO અસલી છે કે નકલી તે ચકાસવા જેવો કિસ્સો પ્રકાસમાં આવ્યો છે. ગાંધીનગર જિલ્લાના દહેગામમ પાસે આવેલ ઝાંકમાંથી નકલી ENO બનાવતી ફેક્ટરી ઝડપાતા ઉહાપોહ મચી જવા પામ્યો છે. પોલીસે અસલી ENOના આબેહૂબ નકલી ENOના પાઉચ જપ્ત કરી કાયદેસરની કાર્યવાહી હાથ ધરી છે. 

તપાસનીશ અધિકારીએ પોલીસ સ્ટાફને સાથે રાખી દરોડો પાડયો
રાજ્યમાં અગાઉ મીઠાઇના નકલી માવા, નકલી ઝીરૂની ફેક્ટરી ઝડપાયા બાદ આજે ગાંધીનગર નજીકથી નકલી ENO બનાવવાનું કૌભાંડ બહાર આવતા સનસનાટી મચી જવા પામી છે. ગાંધીનગરના દહેગામમ પાસે ઝાંકમાંથી નકલી ENO બનાવતી ફેક્ટરી ધમધમતી હોવાની CID ક્રાઇમને ફરિયાદ મળી હતી. ENO ના નકલી કારખાના અંગે દિલ્લી સ્થિત કંપનીના કર્મચારીએ CID ક્રાઇમને ફરિયાદ કરી હતી. આ ફરિયાદને પગલે આજે તપાસનીશ અધિકારીએ પોલીસ સ્ટાફને સાથે રાખી દરોડો પાડયો  હતો. જ્યાં ફેક્ટરીની તલાશી હાથ ધરતા સર્ચ ઓપરેશનમાં નકલી ENO બનાવતી ફેક્ટરીનું ભોપાળું છતું થયું હતું.

ધનલાલચુ તત્વોને કાયદાનો ડર કેમ નથી? 
આ ચકચારી કિસ્સામાં પોલીસ અને તપાસનીશ અધિકારીએ ડુપ્લિકેટ ENOના પાઉચ સહિતનો મુદ્દામાલ જપ્ત કરી કાર્યવાહી હાથ ધરી હતી. રેઇડ દરમિયાન આશરે 45 લાખનો મુદામાલ જપ્ત કરવામાં આવ્યો હતો. ત્યારબાદ પોલીસે નકલી ENO કંપનીના માલિક તેમજ કારખાનામાં કામ કરતાં કર્મચારીઓ સામે કોપી રાઇટ એક્ટનો ભંગ અંગેનો ગુનો નોંધી કાર્યવાહીનો ધમધમાટ શરૂ કર્યો છે. ત્યારે લોકોના સ્વસ્થ સાથે ચેડાં કરતાં આવા ધનલાલચુ તત્વોને કાયદાનો ડર કેમ નથી તે પણ એક અણીયારો સવાલ છે.

અગાઉ અનેક કૌભાંડો સામે આવ્યા છે. 
નોંધનીય છે કે બે રૂપિયા કમાવાની લ્હાયમાં અમુક લેભાગું તત્વો ફાંટીને ધૂમાડે ગયા છે. રાજ્યમાં નીતિ-નિયયમોને નેવે મૂકી ખાદ્યચીજો સહિત અનેક વસ્તુઓની નકલી ફેક્ટરીનો વેપલો ફૂલ્યો ફાલ્યો છે તેવી લોકોમાંથી સતત રાવ ઉઠી રહી છે. જેના જીવતા જાગતા ઉદાહરણની માફક વારંવાર નકલી ફેક્ટરીઓ ઝડપાઇ પણ રહી છે. પરંતુ સબંધિત વિભાગની ઢીલી નીતિના પાપે આ દૂષણ સંપૂર્ણ બંધ થતું નથી! તેવા સવાલો શહેરીજનોમાં ચર્ચાઇ રહ્યા છે. અગાઉ ઉંઝામાંથી ખોરાક અને ઔષધ નિયમંન તંત્રની ટીમે નકલી જીરું બનાવતી ફેક્ટરી ઝડપી પાડી હતી. જેમાં વરિયાળીનું ભુસુ, ક્રીમ કલરનો પાવડર અને ગોળની રસીને મિક્સ કરી જીરું બનાવવામાં આવતું હોવાનું સામે આવ્યું હતું. વધુમાં ગાંધીનગર પંથકમાંથી જ મીઠાઇનો માવો બનાવટી ફેક્ટરી ઝડપાઇ હતી. એટલું જ નહી અગાઉ કોરોનાકાળમાં સુરતના ઓલપાડમાં તો રેમડેસિવિર ઈન્જેક્શન બનાવવાની ફેક્ટરી ઝડપાઈ હતી. ખાદ્ય ચીજો ઉપરાંત ગાંધીનગર જિલ્લાના માણસા GIDCમાં આવેલી બીજ કંપનીમાં કૃષિ વિભાગના અધિકારીઓએ દરોડો પાડયો હતો. જ્યાંથી નકલી બિયારણનો જથ્થો ઝડપી પાડ્યો હતો. તથા તાજેતરમાં જ  મોરબી શહેરમાંથી બ્રાન્ડેડ કંપનીના નામે વાહનોના એન્જિન ઓયલ બનાવટી ફેક્ટરી પણ પકડાઈ હતી.

સળગતા સવાલો 

1. ઝડપાયેલો ડુપ્લીકેટ ENO માર્કેટમાં કેવી રીતે થતો હતો સપ્લાય?
2. આઉટલેટ સુધી ડુપ્લીકેટ ENO પહોંચાડવાની શુ હતી વ્યવસ્થા?
3. શુ આ કૌભાંડથી ENO કંપની પણ હતી અજાણ ?
4. ડુપ્લીકેટ ENO બનાવવાનુ કૌભાંડ કેટલા સમયથી ચાલી રહ્યુ હતુ?
5. અગાઉ અનેક કાર્યવાહી થઈ છતાં આવા કૌભાંડ નેસ્ત નાબૂદ ન થવાનુ કારણ શુ ?
6. સ્વાસ્થ્ય સાથે ચેડા કરનાર લેભાગૂ તત્વમાં કાયદાનો ડર કેમ નથી?
7. અગાઉના આરોપીઓ વિરૂદ્ધ કડક દંડાત્મક પગાલા નથી ભરાયા માટે આવા લોકો બન્યા છે બેફામ?