હાફિઝ સઇદે પાકિસ્તાનમાં જોરશોરથી ચૂંટણી પ્રચાર શરૂ કરી દીધો છે. હાફિઝે મિલ્લી મુસ્લિમ લિગ નામના પક્ષની રચના કરીને પાકિસ્તાનના રાજકારણમાં ઝંપલાવ્યું હતું.
જે દરમિયાન તેની સામે ચૂંટણી પંચે વાંધા પણ ઉઠાવ્યા હતા પરંતુ હાફિઝે હાઇકોર્ટમાં અપીલ કરીને પોતાનો માર્ગ મોકળો કરી દીધો હતો. હાફિઝ સઇદે જમાત ઉદ દાવા નામના સંગઠનની પણ રચના કરી છે. પાકિસ્તાનમાં સમાજસેવા કરતી સંસ્થા તરીકે નોંધાયેલા આ સંગઠનના ચહેરા તરીકે જ હાફિઝે મિલ્લી મુસ્લિમ લિગની સ્થાપના કરી છે. હજુ ગયા મહિને જ અમેરિકાએ મિલ્લી મુસ્લિમ લિગને પણ વિદેશી આતંકવાદી સંસ્થા જાહેર કરી હતી.
જોકે આ પ્રકારની જાહેરાતો પછી પણ પાકિસ્તાન સરકાર હાફિઝને બિંદાસ ચૂંટણી પ્રચાર કરવા દઇ રહી છે. હાફિઝે શનિવારે હારુનાબાદમાં વહેલી સવારે મિલ્લી મુસ્લિમ લિગની પહેલી જાહેર સભા સંબોધી હતી. આશ્ચર્યની વાત એ છે કે ચૂંટણી પંચે મિલ્લી મુસ્લિમ લિગની રાજકીય પક્ષ તરીકે હજુ નોંધણી કરી નથી. આમ છતાં હાફિઝે આત્મવિશ્વાસથી પાકિસ્તાન લોકસભાની ચૂંટણીની તૈયારી શરૂ કરી દીધી છે.
હાફિઝે સંબોધેલી જાહેર સભામાં પાકિસ્તાનના પૂર્વ સરમુખત્યાર મોહમ્મદ ઝિયા ઉલ હકના પુત્ર ઇઝબુલ હસન પણ મંચસ્થ હતા. આ સભામાં હાફિઝે ભારતનું નામ લીધા વિના કહ્યું હતું કે પાકિસ્તાનના દુશ્મનો આપણી વિવિધ સંસ્થાઓનો સર્વનાશ ઇચ્છે છે જેથી તેઓ અહીં ઘૂસી શકે. આપણે આપણા દુશ્મનોનો એજન્ડા ખતમ કરવા એક થવાનું છે.
આ ઉપરાંત મુંબઈ હુમલાના માસ્ટર માઉન્ડ હાફિઝે કહ્યું કે આપણે સમૃદ્ધ પાકિસ્તાનના કાયદે આઝમ મોહમ્મદ અલી જિન્નાહના સપનાને વળગી રહેવાનું છે. મિલ્લી મુસ્લિમ લિગ પાકિસ્તાનને આર્થિક રીતે મજબૂત બનાવવા ઈચ્છે છે. એ જ અમારી સૌથી પહેલી પ્રાથમિકતા છે.