ગુજરાતમાં દારુબંધી હોવાની વાતો પોકળ, સર્કિટ હાઉસમાંથી મળી આવ્યો બિયરના ખાલી ટીનનો જથ્થો ,સોશિયલ મીડિયામાં વીડિયો થયો વાયરલ
ભાવનગરના સર્કિટ હાઉસમાં બિયરના ટીન મળ્યા
મહુવા સર્કિટ હાઉસમાં ખાલી બિયરના ટીનનો જથ્થો
સર્કિટ હાઉસમાં બિયરના ટીનનો વીડિયો વાયરલ
ગુજરાતમાં દારુબંધી છે પરંતુ આ વાત કાગળો પર જ હોવાનુ અનેકવાર સામે આવ્યું છે. દારૂબંધી હોવા છતાં પણ ઠેર ઠેર બુટલેગરો બેફામ બન્યા છે. આડ કતરી રીતે દારુની હેરફેર થઇ રહી છે. ઘણી ઘટનાઓમાં તો પોલીસની સાંઠગાંઠ હોવાનુ સામે આવે છે. ત્યારે સરકારી આવાસોમાં દારુબંધીના લીરેલીરાં ઉડાડતી ઘટના સામે આવી છે. મહત્વનું છે કે ચેકપોસ્ટ પર નાકાબંધી કરવામાં આવે છે. પોલીસ દ્વારા બુટલેગરો સામે લાલઆંખ કરવામાં આવે છે તેમ છતાં પણ સરકારી મકાનો સુધી દારુ પહોંચી જતા ક્યાંક કાયદો અને વ્યવસ્થા જાળવવામાં ચૂક થતી હોય તેમ લાગી રહ્યું છે.
સર્કિટ હાઉસમાં બિયરના ખાલી ટીન મળ્યા
વાત છે ભાવનગરની. ભાવનગરના સરકારી સર્કિટ હાઉસમાં દારૂબંધીના ધજાગરા ઉડાડતી ઘટના બની. મહુવાના સર્કિટ હાઉસના સ્ટોરેજ રૂમમાંથી ખાલી બિયરના ટીનનો જથ્થો મળી આવતા ખળભળાટ મચ્યો. અહીં સરકારી અધિકારીઓ રોકાય છે તે જગ્યાએથી ખાલી બિયરના ટીન મળી આવતા સરકારી બાબુઓ દારુબંધીની નિયમો નેવે મુક્યા હોવાના અનેક સવાલો ઉઠી રહ્યા છે. આ દ્રશ્યોમાં જેટલા ખાલી બિયરના ટીનનો ઢગલો દેખાઇ રહ્યો છે. સર્કિટ હાઉસની પાછળના ભાગને સ્ટોરેજ રુમમાં આ જથ્થો મળી આવ્યો જેનો વીડિયો સોશિયલ મીડિયામાં વાયરલ થતા ચર્ચાનો દોર શરુ થયો છે.
સોશિયલ મીડિયામાં વીડિયો થયો વાયરલ
એક તરફ ગુજરાતમાં દારુબંધી હોવાનું મોટા ઉપાડે કહેવામાં આવે છે તો પછી રોજબરોજ દારુબંધીના ધજાગરા ઉડાવતી ઘટનાઓ બને છે કેમ. શું પોલીસ પણ દારુની હેરાફેરી રોકવામાં નિષ્ફળ છે કે પછી પોલીસની રહેમનજર હેઠળ જ આ બધુ ચાલી રહ્યું છે ? સર્કિટ હાઉસમાં સરકારી અધિકારીઓને જ રોકાવાની મંજૂરી મળે છે તો પછી અહીં બિયરના ટીન લાવ્યું કોણ ? કોના કહેવાથી સર્કિટ હાઉસમાં બિયરો લાવવામાં આવે છે. સર્કિટ હાઉસમાંથી જ બિયરના ટીન મળી આવે છે તો પછી અન્ય જગ્યાએ તો સ્થિતિ કેવી હશે ? ગુજરાતમાં દારુબંધી માત્ર ચોપડા પર જ કેમ. શા માટે નિયમોને નેવે મૂકનાર સામે કડક કાર્યવાહી કરવામાં આવતી નથી. ?