ભારતીય વ્યાપાર જગત 2020ના તાજેતરના સમીક્ષા પત્રકમાં કર્મચારીઓના વેતનમાં બે આંકડાની વૃદ્ધિ આવશે તેવી શક્યતા બતાવવામાં આવી છે. એક સર્વેક્ષણમાં કહેવામાં આવ્યું છે કે આ વૃદ્ધિ 2019ની વાર્ષિક વૃદ્ધિ કરતા ઘણી વધારે હશે.
મોટાભાગના સંચાલકોના કહેવા પ્રમાણે મધ્ય આવક ધરાવતા કર્મચારીઓના પગારમાં સરેરાશ 20 થી 30% જેટલી વૃદ્ધિ થવાની શક્યતા છે.
ટાઈમ્સ જોબ દ્વારા કરવામાં આવેલા એક હાલના રિસર્ચ અનુસાર ઉદ્યોગોના વિવિધ ક્ષેત્રોમાં 30% જેટલો પગાર વધારો અપેક્ષિત છે. આ સર્વે માટે આશરે 1296 જેટલા કંપની એમ્પ્લોયર્સ સાથે 2020 માટે વાતચીત કરવામાં આવી હતી. આ સાથે જ તેમની પ્રતિક્રિયા જાણવામાં આવી હતી.
અલગ અલગ ક્ષેત્રોની કંપનીઓમાંથી 80% કંપનીઓના મતે પગાર વધારો ગયા વર્ષ 2019 કરતા ઘણો વધારે હશે.
સર્વેક્ષણમાં માનવ સંસાધન (HR) ના લગભગ 41% સંચાલકોએ એમ પણ જણાવ્યું છે કે દેશની ઇન્ફોર્મેશન ટેકનોલોજીની રાજધાની બેંગલોર આ વર્ષે પગાર વધારામાં મોખરે હશે. ત્યારબાદ, દિલ્હી અને પછી મુંબઇના કોર્પોરેટ્સને પગાર વધારાના સૌથી વધુ લાભ મળશે.
સૌથી વધુ પગાર વધારો IT ક્ષેત્રે હશે. બીજા ક્રમે મીડિયા અને મનોરંજન અને ત્યાર બાદ સ્વાસ્થ્ય ક્ષેત્રમાં પગાર વધારો હશે.
જેની સામે બેન્કિંગ, ફાઇનાન્સ, વીમા, BPO, ઓટોમોબાઇલ જેવા ક્ષેત્રોમાં પગાર વધારો સૌથી નબળો હોવાની વકી છે.
તમામ કંપની હોશિયાર કર્મચારીઓ ટકાવવા ઈચ્છે છે
ટાઈમ્સ જોબના પ્રમુખના મતે પાછલા થોડા વર્ષોથી અલગ અલગ કારણોસર કંપનીઓ વચ્ચે સ્પર્ધા વધી છે. આ કારણસર તેઓ પ્રતિભાશાળી કર્મચારીઓને ટકાવી રાખવા ઈચ્છે છે જેથી તેઓ આકર્ષક પગાર આપીને તેમને ખુશ રાખવા માંગે છે.
આ રીતે થઇ શકે છે તમારા પગારની વૃદ્ધિ
આ સર્વેક્ષણના 68% HRના મતે મધ્યમ પગાર ધરાવતા કર્મચારીઓના પગારમાં 20 થી 30% જેટલી વૃદ્ધિ જયારે 44% HRના મતે ટોચના કોર્પોરેટ્સના પગારમાં પણ જંગી 40% જેટલો વધારો થવાની શક્યતા છે.