અંતરિક્ષમાં અનેક હરણફાળ ભરનાર માનવીનું લક્ષ્ય ઘણાં વર્ષથી મંગળનો ગ્રહ રહ્યો છે. વિજ્ઞાનીઓ માને છે કે કદાચ ભવિષ્યમાં માનવજાતને પૃથ્વી પરથી ઉચાળા ભરવાનો સમય આવે તો મંગળ ગ્રહ પૃથ્વીવાસીઓનું નવું ઘર બની શકે છે. અમેરિકાના અબજોપતિ તેમજ ટેસ્લા અને સ્પેસએક્સ કંપનીના માલિક એલન મસ્કમાં અંતરિક્ષને આંબવાની ધૂન સવાર છે. એલન મસ્કે તો હવે મંગળ પર માનવીને વસાવવાનો સમય પણ નક્કી કરી દીધો છે. મસ્ક કહે છે કે તેઓ ર૦પ૦ સુધીમાં ૧૦ લાખ લોકોને મંગળ પર મોકલશે.
અબજોપતિ એલન મસ્કને કેટલાક તરંગી કહે છે પરંતુ તે તેમના સ્પેસ પ્રોગ્રામ માટે અત્યંત ગંભીર છે
મસ્કે આ જાણકારી થોડા દિવસ પહેલાં અનેક ટ્વિટ કરીને આપી હતી. તેમણે કહ્યું કે તેમના સ્ટારશિપ પ્રોગ્રામ અંતર્ગત રોકેટ અનેક મેગા ટન સામાન મંગળ પર લઇ જશે. મસ્ક કહે છે કે મંગળને માનવી માટે રહેવા લાયક બનાવવા બહુ બધી સામગ્રી ત્યાં લઇ જવી પડશે. મસ્કની યોજના ત્યાં માનવીઓ રહી શકે તેવી કોલોનીઓ બનાવવાની છે. મંગળ પર માનવીને લઇ જનારા સ્ટારશિપની ડિઝાઇન અત્યારે મસ્કની જ ફેમસ ટેસ્લા કંપનીમાં બની રહી છે. મસ્ક કહે છે કે દર વર્ષે એક લાખ લોકોને મંગળ પર પહોંચાડવાની યોજના છે. તે માટે પ્રતિવર્ષ ૧૦૦ મેગા ટન સામાન સાથે ૧૦૦ લોકોને લઇ જઇ શકે તેવી ૧૦૦ સ્ટારશિપનું નિર્માણ કરાશે. અંતરિક્ષના મિશનને પાર પાડવા મસ્કે સ્પેસએક્સ કંપની બનાવી છે. થોડા સમય પહેલાં મસ્કે અમેરિકાની સ્પેસ એજન્સી નાસાને મંગળ પરની સંભવિત લેન્ડિંગ સાઇટની માહિતી આપવા અનુરોધ કર્યો હતો.
સ્પેસએક્સ ઓટોમોબાઇલ કંપની ટેસ્લાની મદદથી સ્ટારશિપ બનાવી રહી છે. સ્ટારશિપનો ઉપયોગ વારંવાર થઇ શકશે. ઇલેક્ટ્રિક કાર અને બેટરી માટે ટેસ્લા દુનિયાભરમાં જાણીતી છે. મસ્કની વાતો જોકે ઘણાંને સાયન્સ ફિક્શન ફિલ્મની સ્ટોરી જેવી લાગે છે, જોકે વિજ્ઞાનમાં ઘણી કલ્પનાઓ શરૂઆતમાં મજાક જેવી કે અસંભવ લાગે છે, પરંતુ સમય જતાં તે વાસ્તવિકતામાં બદલાઇ જાય છે. ર૦પ૦ એટલે કે ૩૦ વર્ષ પછી મંગળ પર ૧૦ લાખ લોકોને મોકલવાની વાત અત્યારે તો ઘણા વિજ્ઞાનીઓને પણ માનવા જેવી લાગતી નથી, કેમ કે હજુ સુધી નાસા જેવી એજન્સી પણ માનવીને મંગળ પર મોકલી શકી નથી, કેમ કે પૃથ્વીથી મંગળનું અંતર પ.૪૦ કરોડથી ૪૦ કરોડ કિલોમીટર સુધીનું હોય છે.
પૃથ્વી, મંગળ સહિતના ગ્રહો સૂર્યની પ્રદક્ષિણા કરે છે. તેથી અંતરમાં સતત ફેરફાર થતો રહે છે. બે વર્ષે એક વાર મંગળનો ગ્રહ પૃથ્વીની સૌથી નજીક હોય ત્યારે પણ તેનું અંતર પ.૪૦ કરોડ કિલોમીટરનું હોય છે. આ સમયે એકસાથે અનેક સ્ટારશિપ ઉડાન ભરશે. માનવીને મંગળની યાત્રા કરાવવાનું સપનું જોનારા એલન મસ્કને એક જમાનામાં લોકો પાગલ ગણીને હસી નાખતા હતા. અત્યારે તે સ્ટાર્ટઅપ કિંગ તરીકે પણ ઓળખાય છે. તેમનો જન્મ ૧૯૭૧માં દક્ષિણ આફ્રિકાના પ્રિટોરિયામાં થયો હતો. તેમના પિતા એન્જિનિયર હતા. માતા કેનેડિયન હતી અને મોડલ હતી. અમેરિકાની ક્વીન્સ યુનિવર્સિટીમાં એડમિશન મળતાં મસ્ક અમેરિકા આવી ગયા. તેમણે ફિઝિક્સ અને બિઝનેસમાં ગ્રેજ્યુએશન કર્યું. તે પછી વધુ ભણવા સ્ટેનફોર્ડ યુનિવર્સિટીમાં એડમિશન લીધું. ભણવાનું પૂરું કર્યા બાદ મસ્કે જિપ-ર નામની કંપની બનાવી, જે ઓનલાઇન પબ્લિશિંગ સોફ્ટવેર બનાવતી હતી. આ સોફ્ટવેરનો ઉપયોગ મીિડયા કંપનીઓ કરતી હતી. ૧૯૯૯માં તેમણે આ કંપની કમ્પ્યૂટર બનાવતી કંપની કોમ્પેકને વેચી દીધી અને ૩૦ વર્ષની ઉંમરમાં જ તેઓ ૩૦૦ મિલિયન ડોલર એટલે કે ર૦ અબજ રૂપિયાના માલિક બની ગયા. ર૦૦રના વર્ષમાં સ્પેસએક્સ કંપની બનાવી. ર૦૦૪માં તેઓ ઇલેક્ટ્રિક કાર બનાવતી કંપની ટેસ્લાના ચેરમેન બની ગયા.
થોડા વખત પહેલાં સ્પેસએક્સ દ્વારા બે લોકોને અંતરિક્ષમાં મોકલવાની જાહેરાત કરાઇ છે. આ બંને પોતાના પૈસે અંતરિક્ષનો પ્રવાસ કરનાર પ્રથમ યાત્રીઓ હશે. મસ્ક માને છે કે મંગળ પર માનવીને મોકલવામાં સ્પેસએક્સ મહત્ત્વની ભૂમિકા નિભાવે. અત્યારે લોસ એન્જલસમાં રહેતા મસ્ક પાસે અમેરિકા ઉપરાંત કેનેડા અને સાઉથ આફ્રિકાની નાગરિકતા છે. તેમણે ત્રણ લગ્ન કર્યાં છે અને પાંચ બાળકો છે. જાન્યુઆરી-ર૦૧૮ની સ્થિતિએ એલન મસ્ક ર હજાર કરોડ રૂપિયાની સંપત્તિના માલિક હતા. ફોર્બ્સની યાદીમાં તેમને દુનિયાના પ૩મા નંબરના સૌથી ધનિક વ્યકિત તરીકે સ્થાન અપાયું હતું. મસ્કે જ્યારે મંગળ પર જવા ફાલ્કન હેવી રોકેટ લોન્ચ કરવાની વાત કરી ત્યારે બધાં તેમને તરંગી કે પાગલ કહેતાં હતાં, જોકે તેની પરવા કરવા કર્યા વિના મસ્ક તેમની યોજનામાં આગળ વધ્યા. આજે લોકો તેમની અંતરિક્ષયાત્રાની યોજનાઓને ગંભીરતાથી લઇ રહ્યા છે.