સ્પેસએક્સ અને ટેસ્લાના CEO એલોન મસ્ક ટેસ્લામાંથી 10 ટકા કર્મચારીઓને છૂટા કરવાની યોજના બનાવી રહ્યા છે. આ સમાચારને કારણે શુક્રવારે ટેસ્લાના શેરમાં ભારે ઘટાડો જોવા મળ્યો.
એલન મસ્ક ટેસ્લામાંથી 10 ટકા કર્મીઓને છૂટા કરવાની બનાવી યોજના
એલન મસ્કે વિશ્વભરમાં તમામ નવી ભરતી પર મૂક્યો પ્રતિબંધ
મસ્કે કહ્યું કે, વૈશ્વિક અર્થવ્યવસ્થાની સ્થિતિ સારી નથી
વિશ્વની સૌથી ધનીક ઓટો કંપની ટેસ્લા, તેના 10 ટકા કર્મચારીઓની છટણી કરી શકે છે. કંપનીના CEO એલોન મસ્કે પોતે આ વાત કહી છે. આ સાથે એલોન મસ્કે વિશ્વભરમાં તમામ નવી ભરતી પર પ્રતિબંધ મૂક્યો છે. મસ્કનું કહેવું છે કે સમગ્ર વિશ્વમાં વૈશ્વિક અર્થવ્યવસ્થાની સ્થિતિ સારી નથી ચાલી રહી.
આ નિર્ણય માટે અર્થવ્યવસ્થા જવાબદાર
એલોન મસ્ક ભૂતકાળમાં તેના કર્મચારીઓ પ્રત્યે કડક વલણ અપનાવવા માટે જાણીતા છે. પરંતુ તેની આ નવી જાહેરાતથી ટેસ્લામાં ખળભળાટ મચી ગયો છે. મસ્કે કહ્યું કે મને દુનિયાભરની વૈશ્વિક અર્થવ્યવસ્થાની ખરાબ હાલત જોઈને ખૂબ જ ખરાબ લાગે છે. તેથી જ મારે આવા નિર્ણયો લેવા પડે છે. કંપની દ્વારા દાખલ કરાયેલ તાજેતરની નિયમનકારી માહિતી અનુસાર, ટેસ્લા હાલમાં લગભગ એક લાખ કર્મચારીઓને રોજગારી આપે છે. આ સંખ્યામાં ટેસ્લાની પેટાકંપનીઓમાં કામ કરતા કર્મચારીઓ પણ સામેલ છે. આ સમાચારો વચ્ચે ટેસ્લાનો શેર શુક્રવારે $66 ઘટીને $709 થયો હતો. બે મહિના પહેલા સુધી કંપનીના શેર 1,150 ડોલરની આસપાસ ટ્રેડ થતા હતા.
કર્મચારીઓને કહેવામાં આવ્યું - ઓફિસે આવવું પડશે
આ અગાઉ મંગળવારે રાત્રે, મસ્કે તેના ટેસ્લા કર્મચારીઓને એક ઇ-મેઇલ મોકલ્યો હતો. આ ઈમેલમાં કર્મચારીઓને કહેવામાં આવ્યું હતું કે તેઓ કાં તો ઓફિસ પર પાછા ફરે અથવા કંપની છોડી દે. મસ્કે એક ઈમેલમાં જણાવ્યું હતું કે ટેસ્લાના તમામ કર્મચારીઓએ ઓફિસમાં અઠવાડિયામાં ઓછામાં ઓછા 40 કલાક પસાર કરવા જોઈએ. જો ટેસ્લા કર્મચારી ઓફિસમાં ન દેખાય, તો અમે માની લઈશું કે તમે રાજીનામું આપ્યું છે. જોકે આ અંગે હજી સુધી ટેસ્લા દ્વારા કોઈ નિવેદન આપ્યું નથી.
કંપની નાદાર થઈ જાય છે
મસ્કે જણાવ્યું હતું કે વરિષ્ઠ કર્મચારીઓ માટે તેમની હાજરી દર્શાવવી અત્યંત મહત્વપૂર્ણ છે. તેથી જ હું મારો મોટાભાગનો સમય ઓફિસમાં જ પસાર કરું છું. આમ કરવાથી ત્યાં કામ કરતા લોકોને લાગે છે કે હું તેમની સાથે છું. જો મેં મારા કર્મચારીઓ સાથે કામ ન કર્યું હોત, તેમની સાથે સમય વિતાવ્યો ન હોત, તો ટેસ્લા કંપની લાંબા સમય પહેલા નાદાર થઈ ગઈ હોત.
ટેસ્લા કારમાં પણ ફરિયાદો હતી
દરમિયાન, US સરકારના નિયમનકારોએ શુક્રવારે જણાવ્યું હતું કે, 750 થી વધુ ટેસ્લા વાહન માલિકોએ કાર વિશે ફરિયાદ કરી છે. ગ્રાહકોનું કહેવું છે કે આંશિક રૂપે ઓટોમેટિક ડ્રાઈવિંગ સિસ્ટમ પર ચાલતી કાર કોઈ દેખીતા કારણ વગર અચાનક ઓટોમેટિક બંધ થઈ જાય છે.