બિઝનેસ / શેરબજારની મંદી વચ્ચે કમાણીની તક! LG ઈલેક્ટ્રોનિક્સનો આવશે 15000 કરોડ રૂપિયાનો IPO

સ્ટોક માર્કેટમાં રોકાણકારોની સંખ્યામાં ઉત્તરોત્તર વધારો થઈ રહ્યો છે. માર્કેટમાં દિવસે દિવસે અને આઈપીઓ લોન્ચ થઈ રહ્યા છે. ત્યારે વધુ એક આઈપીઓ માર્કેટમાં આવી રહ્યો છે. હ્યુન્ડાઇ પછી બીજી દક્ષિણ કોરિયન કંપની તેનો IPO લાવી રહી છે. એલજી ઇલેક્ટ્રોનિક્સ ઇન્ડિયા લિમિટેડ ટૂંક સમયમાં ભારતીય બજારમાં પ્રવેશ કરવા જઈ રહી છે. LG ઇલેક્ટ્રોનિક્સ 15,000 કરોડ રૂપિયા એકત્ર કરવાના લક્ષ્ય સાથે તેનો IPO લાવી રહ્યું છે.

LG ઇન્ડિયાને સિક્યોરિટીઝ એન્ડ એક્સચેન્જ બોર્ડ ઓફ ઇન્ડિયા (SEBI) તરફથી IPO શરૂ કરવા માટે મંજૂરી મળી ગઈ છે. LG ઇલેક્ટ્રોનિક્સ ઇન્ડિયાના IPOનું કદ આશરે રૂ. 15,000 કરોડ રહેવાની ધારણા છે અને સમગ્ર જાહેર ઇશ્યૂ એક ઓફર ફોર સેલ (OFS) હશે જેમાં LG ઇલેક્ટ્રોનિક્સ ઇન્ક દ્વારા 10.18 કરોડ ઇક્વિટી શેર વેચવામાં આવશે. આ IPO માં કોઈ નવો ઇશ્યૂ નથી.

OFS હેઠળ જાહેર કરાયેલા તમામ શેરના વેચાણમાંથી મળેલા પૈસા કંપનીના પ્રમોટરો અને રોકાણકારોને જાય છે. ફ્રેશ ઇશ્યૂ હેઠળ જાહેર કરાયેલા શેરના વેચાણમાંથી મળેલા પૈસા કંપનીને જાય છે. એલજી ઇલેક્ટ્રોનિક્સ ઇન્ડિયા એ દક્ષિણ કોરિયન કંપની એલજી ઇલેક્ટ્રોનિક્સ ઇન્કની સંપૂર્ણ માલિકીની પેટાકંપની છે. કંપની દ્વારા 6 ડિસેમ્બર, 2024 ના રોજ IPO માટેના ડ્રાફ્ટ પેપર્સ સબમિટ કરવામાં આવ્યા હતા.

સેબીની મંજૂરી બાદ કંપની હવે IPO જાહેર કરી શકે છે. આ IPO નું સંચાલન મોર્ગન સ્ટેનલી ઈન્ડિયા, JP મોર્ગન ઈન્ડિયા, એક્સિસ કેપિટલ, BofA સિક્યોરિટીઝ ઈન્ડિયા અને સિટીગ્રુપ ગ્લોબલ માર્કેટ્સ ઈન્ડિયા જેવી રોકાણ બેંકો દ્વારા કરવામાં આવશે. કેફિન ટેક્નોલોજીસ આ ઇશ્યૂ માટે રજિસ્ટ્રાર તરીકે કાર્ય કરશે. એલજી ઇલેક્ટ્રોનિક્સ ઇન્ડિયા ભારતીય હોમ એપ્લાયન્સિસ અને કન્ઝ્યુમર ઇલેક્ટ્રોનિક્સ બજારમાં એક અગ્રણી કંપની છે.

નાણાકીય મોરચે LG ઇલેક્ટ્રોનિક્સ ઇન્ડિયાએ ઘણા લિસ્ટેડ સાથીદારો કરતાં વધુ સારું પ્રદર્શન કર્યું છે. નાણાકીય વર્ષ 2023-24માં કંપનીની આવક રૂ. 21,352 કરોડ હતી, જે પાછલા નાણાકીય વર્ષમાં રૂ. 19,868.24 કરોડ હતી. આ સમયગાળા દરમિયાન કંપનીનો નફો રૂ.1,344,93 કરોડથી વધીને રૂ.1,511.07 કરોડ થયો છે. નાણાકીય વર્ષ 2024-25 ના પ્રથમ ક્વાર્ટરમાં કંપનીની આવક 6,408.80 કરોડ રૂપિયા હતી. આ સમયગાળા દરમિયાન કંપનીને 679.65 કરોડ રૂપિયાનો નફો થયો હતો.

વધુ વાંચો : મંગળવારે શેરબજારમાં મંગલ જ મંગલ, સેન્સેક્સમાં 1131 પોઈન્ટનો બમ્પર ઉછાળો

અગાઉ 2024 માં દક્ષિણ કોરિયન કંપની હ્યુન્ડાઇ મોટરના ભારતીય યુનિટે IPO લોન્ચ કર્યો હતો. હ્યુન્ડાઇ મોટર ઇન્ડિયાના IPOનું કદ રૂ. 27,870.16 કરોડ હતું. આ ભારતમાં અત્યાર સુધીનો સૌથી મોટો IPO હતો. આ પબ્લિક ઇશ્યૂ પણ OFS હતો અને કંપનીના પ્રમોટર્સ દ્વારા 14.22 કરોડ શેર વેચવામાં આવ્યા હતા.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ