વીજ વપરાશધારકો માટે આંખ ઉઘાડતો કિસ્સો સામે આવ્યો છે. જે મામલે VTV NEWS દ્વારા સૌથી મોટો પર્દાફાશ કરવામાં આવ્યો છે.
વીજ વપરાશધારકો માટે આંખ ઉઘાડતો કિસ્સો
'બીલ નહીં ભરો તો કનેક્શન કટ થઈ જશે' કૉલ આવે તો સાવધાન
આ પ્લાનમાં ફસાયા તો લાગશે 440 વોટનો ઝટકો
વીજ કંપનીના નામે મસમોટું ષડયંત્ર ચાલી રહ્યું છે. વીજબિલના નામે લોકો સાથે છેતરપિંડી આચરવામાં આવી છે. એટલે કે જો તમને તમારું વીજ કનેકશન કપાઈ જશે એવો મેસેજ આવે તો ચેતી જજો. તમારુ બાકી લાઈટબીલ ભરવાનું છે તેવો કોલ આવે તો સાવધ થઇ જજો નહીં તો છેતરાઇ જશો.
સાયબર માફિયાઓની મોડસ ઓપરેન્ડીનો VTV પર પર્દાફાશ
વીજ કનેકશન કપાઈ જવાનો ડર બતાવીને ગ્રાહકોને છેતરવાનો સૌથી મોટો કારસો અપનાવવામાં આવી રહ્યો છે. સાયબર માફિયાઓ ગ્રાહકને જો બીલ નહીં ભરો તો કનેક્શન કટ થઈ જશે તેવો ડર બતાવાઇ રહ્યો છે. આથી, સાયબર માફિયાઓની મોડસ ઓપરેન્ડીનો VTV NEWS પર સૌથી મોટો પર્દાફાશ કરવામાં આવ્યો છે. ત્યારે કેવી રીતે સાયબર માફિયાઓ વીજ વપરાશકારો સાથે છેતરપિંડી આચરી રહ્યાં છે તે અહીં જોઇએ...
જુઓ સાયબર માફિયાઓ કઇ રીતે ગ્રાહકોને છેતરી રહ્યાં છે?
સૌ પહેલા તો સાયબર માફિયાઓ ગ્રાહકોને ફોન કરે છે. બાદમાં ગ્રાહકને વીજબીલ પ્રોસેસ થવાનું બાકી છે તેમ કહેવામાં આવે છે. ગ્રાહકને એવું ઠસાવી દેવાય છે કે પેમેન્ટ ભલે કર્યું છે પરંતુ તે ઓનલાઈન બતાવતું નથી. ઠગબાજ ગ્રાહકને ટીમ વ્યુઅર એપ ડાઉનલોડ કરવાનું કહે છે. બાદમાં જો ગ્રાહક ટીમ વ્યુઅર એપ ડાઉનલોડ કરે છે તો તેના મોબાઈલનો કંટ્રોલ મળે છે. બાદમાં ગ્રાહકને ઓનલાઈન પેમેન્ટની ફરજ પાડવામાં આવે છે. ટીમ વ્યુઅરના પાસવર્ડથી ગ્રાહકની તમામ વિગતો ઠગબાજને મળી જાય છે. આમ, આ રીતે સંપૂર્ણ માસ્ટર પ્લાન ઘડાય છે કે જેના દ્વારા વીજ વપરાશકારોને વીજળીથી પણ તીવ્ર ઝટકો મળે છે.
સાવચેત રહેવા જુઓ સાયબર એક્સપર્ટે શું ટિપ્સ આપી?
આથી, આ અંગે સાયબર એક્સપર્ટ દ્વારા લોકોને સાવચેત રહેવા માટેની ટિપ્સ અપાઇ છે. જેમાં સાયબર એક્સપર્ટનું કહેવું છે કે, 'વીજ કંપનીના નામે મેસેજ કરતાં લોકો પાસે તમારી માહિતી નથી હોતી. તમે જાતે તમારી માહિતી ઠગબાજોને આપો છો. તમારી માહિતી મેળવી તમારી જ સામે તેનો ઉપયોગ કરે છે. આ માહિતી થકી તમારૂં એકાઉન્ટ ખાલી થઇ શકે છે.'
અમે ઓફિશિયલ સેન્ટર ID T-POWER પરથી જ મેસેજ કરીએ છીએ: Torrent Power
જો કે, વીજ ગ્રાહકો સાથે થઇ રહેલી છેતરપિંડી અંગે ટોરેન્ટ પાવરે સ્પષ્ટતા કરતા જણાવ્યું કે, 'અમારા તરફથી ગ્રાહકોને ખાનગી નંબરથી મેસેજ નથી મોકલાતા. અમે માત્ર ઓફિશિયલ નંબરથી ગ્રાહકોને મેસેજ કરીએ છીએ. ઓફિશિયલ સેન્ટર ID T-POWER પરથી જ મેસેજ કરીએ છીએ. ખાનગી નંબરથી આવતા મેસેજ પર ધ્યાન ન આપવામાં આવે. ગ્રાહકને શંકા જાય તો બિલ પર લખેલા હેલ્પલાઈન પર સંપર્ક કરો. બિલ ન ભર્યું હોય તો કોઈપણ વીજ કંપની વોટ્સએપ મારફતે જણાવતી નથી. રાત્રે સાડા નવ વાગે વીજ કનેક્શન કપાઈ જશે તેવો મેસેજ વીજ કંપની નથી કરતી. જો ગ્રાહક વીજ બિલ ન ભરે તો પહેલા નોટિસ આપવામાં આવે છે. નોટિસ આપ્યા બાદ ગ્રાહકને વીજ બિલ ભરવા સમય અપાય છે. નોટિસ પર ગ્રાહકની પ્રતિક્રિયા ન આવે તો જ વીજ કનેક્શન કપાય છે. માત્ર એક મેસેજના કારણે ગ્રાહકોએ ગભરાવાની જરૂર નથી.'