ઇલેક્ટ્રિક સ્કૂટરની બેટરી ફાટવાની એક પછી એક ઘટનાઓ ખતરનાક સાબિત થઇ રહી છે. ચાર્જિંગ દરમિયાન બેટરી ફાટવાની અત્યાર સુધી ઘણી ઘટનાઓ બની ચુકી છે. હાલમાં જ સુરતમાંથી પણ આવો જ એક બનાવ સામે આવ્યો છે. સુરતમાં ઇલેક્ટ્રિક મોપેડની બેટરી બ્લાસ્ટ થતાં એક વ્યક્તિ ગંભીર રીતે ઇજાગ્રસ્ત થયા છે. જ્યારે ત્રણ લોકોને સામાન્ય ઈજાઓ પહોંચી છે.
સચિન વિસ્તારમાં બેટરી બ્લાસ્ટની ઘટના
મળતી માહિતી અનુસાર, સુરતના સચિન વિસ્તારમાં ઇલેક્ટ્રિક મોપેડ ચાલુ ન થતા બેટરી કાઢીને દુકાનમાં મૂકી દીધી હતી. દુકાનમાં મૂક્યા બાદ અચાનક બેટરીમાં બ્લાસ્ટ થયો હતો. દુકાનમાં મુકેલી આ બેટરીમાં એકબાદ એક બ્લાસ્ટ થતા આસપાસમાં અફરાતફરીનો માહોલ સર્જાયો હતો. કિરાણા સ્ટોરમાં એકબાદ એક ધડાકા થતા સ્થાનિકોમાં પણ ભયનો માહોલ ફેલાયો હતો. આ અંગની જાણ થતાં ફાયરની ટીમ બનાવ સ્થળે દોડી આવી હતી અને પાણીમારો ચલાવી આગ પર કાબૂ મેળવ્યો હતો.
ઇજાગ્રસ્તોને સારવાર માટે સિવિલ હોસ્પિટલમાં ખસેડાયા
કિરાણા સ્ટોરમાં ઇલેક્ટ્રિક સ્કૂટરની બેટરી બ્લાસ્ટ થતાં મોટાભાગની વસ્તુઓ બળીને ખાખ થઇ ગઇ છે. તો આ દુર્ઘટનામાં એક વ્યક્તિ ગંભીર રીતે ઇજાગ્રસ્ત થયા છે. જ્યારે ત્રણ લોકોને સામાન્ય ઈજાઓ પહોંચી છે. તમામને સારવાર માટે સિવિલ હોસ્પિટલમાં ખસેડવામાં આવ્યા છે.