સ્થાનિક સ્વરાજની ચૂંટણીની તારીખો જાહેર થયા બાદ સુરતમાં ઉમેદવારોની હરોળ લાગી છે.
સુરતમાં મનપાની ચૂંટણીનો ધમધમાટ
ભાજપમાં ટિકિટો લેવા માટે લાગી લાઈનો
120 બેઠકો માટે ભાજપમાં 2700 ફોર્મ ઉપડ્યા
સ્થાનિક સ્વરાજની ચૂંટણીની તારીખો જાહેર થયા બાદ સુરતમાં ઉમેદવારોની હરોળ લાગી છે. સુરત મહાનગર પાલિકાની ચૂંટણીમાં કુલ 120 બેઠકનો સમાવેશે થાય છે. જેના માટે ભાજપના ઉમેદવાર બનવા માટે કુલ 2700 ફોર્મ ઉપડ્યા છે. ગુજરાતની 8 પૈકી 6 મહાનગર પાલિકામાં પણ એક સાથે ચૂ્ંટણી યોજાઈ રહી છે. ત્યારે સુરત મહાનગર પાલિકા પણ અગ્રણી પાલિકાઓમાં એક છે. ત્યારે 30 વોર્ડની કુલ 120 બેઠક માટે ચૂંટણી યોજાશે.
ભાજપ પોતાના ઉમેદવારોની પસંદગી માટે સેન્સ પ્રક્રિયાની કામગીરી કરશે. જેના માટે નિરીક્ષકોની 7 જેટલી ટીમ દ્વારા ઉમેદવારોની પેનલ બનાવશે. અને પેનલના નામ પર પ્રદેશ પાર્લામેન્ટરી બોર્ડમાં ચર્ચા કરાશે. મહત્વનું છે કે, માત્ર 120 બેઠક માટે 2700 જેટલા ફોર્મ ઉપડ્યા છે. જેને લઈને ઉમેદવારોની પસંદગીની પ્રક્રિયામાં જટીલતા સર્જાઈ શકે છે.
તો આ તરફ અમદાવાદમાં પણ ઉમેદવારોની પસંદગી માટે સેન્સની પ્રક્રિયા શરૂ કરી દીધી છે. પરંતુ સેન્સની પ્રક્રિયાના પ્રથમ દિવસે જ ભાજપના કાર્યકરો પર હુમલાની ઘટના સામે આવી છે. અમદાવાદના નરોડામાં ભાજપની સેન્સ પ્રક્રિયા શરૂ હતી. આ દરમિયાન કોર્પોરેટર અને બક્ષીપંચના પ્રમુખ ગિરીશભાઈ પર હુમલાની ઘટના જોવા મળી છે. તો હુમલો કરવાનો આક્ષેપ ભાજપ યુવા મોરચાના શહેર કારોબારી સભ્ય પર લગાવવામાં આવી રહ્યો છે.