તમિળનાડુમાં અપક્ષ ઉમેદવાર સર્વનને કહ્યું કે છેલ્લા 50 વર્ષમાં રાજકીય પક્ષો દ્વારા જાહેર કરાયેલી કોઈપણ યોજના પૂરી થઈ નથી. લોકોને જાગૃત કરવા માટે મેં આ પ્રકારનો ચૂંટણી ઢંઢેરો બહાર પાડ્યો છે.
તમિળનાડુના અપક્ષ ઉમેદવારનો વિચિત્ર ઢંઢેરો
સર્વનન નામનો આ ઉમેદવાર અપક્ષ ચૂંટણી લડી રહ્યો છે
તેના ચૂંટણી પ્રતિક તરીકે તેને ડસ્ટબિનનું નિશાન મળ્યું છે
વિધાનસભાની ચૂંટણીઓ આવતાની સાથે જ તમામ પક્ષોએ તેમનો ચૂંટણી મેનિસફેસ્ટો બહાર પાડ્યો છે. બધા પક્ષોએ મતદારો સમક્ષ શ્રેણીબદ્ધ વાયદા કર્યા છે, જાણે કે એક નવા પ્રકારનું વાયદા બજાર જ અસ્તિત્વ લઈ ચૂક્યું છે,જો કે આ ચૂંટણીઓમાં માત્ર પક્ષો જ વચન નથી આપતા, કેટલાક અપક્ષ ઉમેદવારો પણ છે જેઓ તેમના વિસ્તારના લોકોની સામે મોટા વચનો આપતા જોવા મળે છે, પરંતુ તમિળનાડુમાં એક અપક્ષ ઉમેદવારે જે વાયદા આપ્યા છે, તે જાણીને દરેક માણસ તેમની આંગયાળીઓ મોઢામાં દબાવી દેશે. સર્વનને આ ચૂંટણી અપક્ષ લડવાનો નિર્ધાર કર્યો છે, અનેમત વિસ્તારના તમામ પરિવારોને એક આઇફોન, એક કાર, એક હેલિકોપ્ટર, એક બોટ, એક રોબોટ, ત્રણ માળની સ્વિમિંગ પૂલવાળી ઇમારત આપવાનું નક્કી કહ્યું છે.
યુવાનોને આપશે એક કરોડ રૂપિયા
આ ઉપરાંત તે યુવાનોને એક કરોડ રૂપિયા આપશે અને 100 દિવસની રજામાં લોકોને ચંદ્ર પર લઈ જવાનું પણ કહ્યું છે. તે તેના ક્ષેત્રમાં જે મૂળભૂત સુવિધાઓ પ્રદાન કરશે તેમાં દક્ષિણ મદુરાઇમાં તેના મત વિસ્તારના લોકોને ગરમીથી રાહત મેળવવા માટે સ્પેસ રિસર્ચ સેન્ટર, રોકેટ પ્રક્ષેપણ કેન્દ્ર અને 300 ફુટની ઉંચાઇ પર એક કૃત્રિમ આઇસબર્ગ (બરફ પર્વત) નો સમાવેશ થાય છે. સર્વનન નામનો આ ઉમેદવાર 34 વર્ષનો છે અને કહે છે કે તેઓ રાજકારણમાં યુવાનોની ભાગીદારીને પ્રોત્સાહન આપશે.
તેણે વધુમાં કહ્યું, 'મેં ચૂંટણીના ખર્ચ માટે દર મહિને 20,000 રૂપિયાના હપ્તા પર પૈસા લીધા છે. મેં મારા નામાંકન પાછળ 10 હજાર રૂપિયા ખર્ચ કર્યા છે. દક્ષિણ મદુરાઇમાં 2,30,000 મતો છે. જો 5000 યુવાનો ચૂંટણી લડે અને જો આમાંના દરેક ઉમેદવાર 50 મતો મેળવે તો કોઈ પણ પક્ષ તમિળનાડુમાં ચૂંટણી લડી શકશે નહીં. આનાથી લોકો ડરશે. હું લોકોને આ વિશે જાગૃત કરવા માટે જ ચૂંટણી લડું છું.
રાજકીય પક્ષો વર્ષોથી આવા વચનો આપીને જ ચૂંટણી જીતતા રહ્યા છે : સર્વનન
જ્યારે તેમના ચૂંટણી ઢંઢેરામાં તેમના અવ્યવહારુ વચનો વિશે પૂછવામાં આવ્યું ત્યારે તેમણે કહ્યું કે, 'છેલ્લા કેટલાય વર્ષોથી રાજકીય પક્ષોએ કલ્યાણ યોજનાઓની જાહેરાત કરીને જ ચૂંટણી જીતી છે. તેમની સરકારોએ ક્યારેય સામાન્ય લોકોની સેવા કરી નથી. લોકોમાં જાગૃતિ લાવવા માટે મેં એક ચૂંટણી ઢંઢેરો બહાર પાડ્યો છે જે સંપૂર્ણ અવ્યવહારુ છે અને વિશ્વના કોઈ પણ વ્યક્તિએ આમ કર્યું નથી. રસપ્રદ વાત એ છે કે, સર્વનનનું ચૂંટણી પ્રતીક ડસ્ટબિન છે.