લોકસભા ચૂંટણી હવે ત્રીજા તબક્કામાં પહોંચવાની તૈયારી છે. રાજ્યમાં ત્રીજા તબક્કામાં તમામ બેઠકો માટે મતદાનની તૈયારીઓ થઈ રહી છે. નેતાઓ ચૂંટણી પ્રચારમાં વ્યસ્ત છે અને ચૂંટણી તંત્ર મતદાનની તૈયારીઓમાં લાગી ગયું છે. પરંતુ આ બધી જ તૈયારીઓ વચ્ચે સુરતમાં કીમ વિસ્તારમાં BLOની કામગીરી પર સવાલ ઉભા થયાં છે. તો શું થયું છે એવું કે જેમાં BLOએ ઘોરબેદરકારી વર્તી છે.
રાજ્યમાં લોકસભાની ચૂંટણી યોજાવાને હવે માત્ર બે દિવસ બાકી રહ્યાં છે. નેતાઓ છેલ્લી ઘડીનો પ્રચાર કરવામાં વ્યસ્ત છે. સભાઓ અને રેલીઓ દ્વારા નેતાઓ જનતાને પોતાનાં તરફી મતદાન કરવા લલચાવી રહ્યાં છે. તો નાના કાર્યકરો મતદારોને રિઝવવા શેરીઓ ખૂંદી રહ્યાં છે. આ બધાં વચ્ચે ચૂંટણીતંત્ર ક્ષતી રહિત મતદાન યોજાય તે માટે કમરકસી રહ્યું છે. પરંતુ સુરતનાં કીમ વિસ્તારમાં બૂથ લેવલે મતદારોનાં ઘર સુધી મતદાર સ્લીપ પહોંચાડવાની જેની જવાબદારી છે તેવાં ચૂંટણી અધિકારીઓની બેદરકારી સામે આવી છે. ચૂંટણી અધિકારીઓની બેદરકારીઓનાં નમૂના જેવા આ દ્રશ્યો.
હાથમાં મતદાર સ્લીપ લઈને ઊભેલાં આ બાળકો પ્રાથમિક શાળામાં અભ્યાસ કરી રહ્યાં છે. પરંતુ સ્થાનિક ચૂંટણી અધિકારીઓએ તેમને પણ ચૂંટણી પ્રક્રિયામાં જોડી દીધાં છે. સુરત લોકસભાનાં કીમ વિસ્તારનાં, ચૂંટણી અધિકારીઓની ગંભીર બેદરકારીનાં, આબાદ નમૂના જેવાં આ દ્રશ્યો ચૂંટણી પ્રક્રિયાને કેટલાંક ચૂંટણી અધિકારીઓ કેટલી બેદરકારીથી લઈ રહ્યાં છે તેનો બોલતો પુરાવો છે.
મતદારનાં ઘર સુધી પહોંચી તેને હાથોહાથ મતદાર સ્લીપ પહોંચાડવાની જવાબદારી BLOની હોય છે અને જે તે ચૂંટણી અધિકારીઓ BLOને આ કામગીરી સોંપતા હોય છે. પરંતુ અહીં તો આ જવાબદારી ભર્યું કામ પ્રાથમિક શાળાનાં બાળકો પાસે કરવાઈ રહ્યું છે. પ્રાથમિક શાળામાં ભણતા બાળકોનાં હાથમાં મતદાર સ્લીપ થમાવી દઈને મતદારો વચ્ચે વહેંચવાનું કામ સોંપી દેવામાં આવ્યું છે.
આમ તો મતદાન માટેની સ્લીપ વહેંચવાનું કામ જવાબદારી ભર્યું કહેવાય છે. આ કામ ચૂંટણી અધિકારીઓ જ કરવાનું હોય છે. તેનાં માટે બૂથ લેવલ ઓફિસરની પણ નિમણૂંક કરી હોય છે. ત્યારે આવું જવાબદારી ભર્યું કામ પ્રાથમિક શાળાનાં નાના વિદ્યાર્થીઓને સોંપી દેવાતાં ચૂંટણી અધિકારીઓની કામગીરી પર અનેક સવાલો ઊભા થયાં છે. શાળાનાં વિદ્યાર્થીઓનાં હાથમાં પુસ્તક હોવું જોઇએ. તેનાં બદલે વિદ્યાર્થીઓનાં હાથમાં મતદાન સ્લીપ કોણે પકડાવી તે સવાલ ઊભો થયો છે.
હાલ તો આ સમગ્ર ઘટનાને લઈ ઓલપડ ચૂંટણી અધિકારીએ તપાસનાં આદેશ આપ્યાં છે. આ સમગ્ર ઘટના મામલે ચૂંટણી અધિકારીની બેદરકારી સામે આવી છે. ત્યારે ચૂંટણી અધિકારીએ તપાસનાં આદેશ આપ્યાં છે. પરંતુ ચૂંટણી અધિકારી જવાબદાર અધિકારી સામે કેવા પ્રકારનાં પગલાં ભરે છે તે હવે જોવું રહ્યું.