સંગઠનની પરવાનગી વગર ચૂંટણી બેઠક યોજાતા મચ્યો હોબાળો

કચ્છ: ભુજના મિરજાપર હાઇવે ખાતે આવેલ બી.આર.સી ભવન ખાતે આજરોજ પ્રાથમિક શિક્ષક સંગઠનની બેઠક યોજી ગેરઉપયોગ કરવાનો મામલો પ્રકાશમાં આવતાં પ્રા. શિક્ષણ સત્તાવાળાઓએ આ મામલે જોડાયેલા તમામ વિરુદ્ધ ખાતાકીય કાર્યવાહી આદરી હતી.આ ઘટનાના ઘેરા પ્રત્યાઘાતો પડવા પામ્યા હતા.

ઉલ્લેખનીય છે કે આગામી દિવસોમાં રાજ્ય પ્રા. શિક્ષક સંઘની ચૂંટણી યોજાવાની છે તેના આયોજનના ભાગરૂપે કચ્છના રાજ્યકક્ષા અને જિલ્લાના આગેવાનોએ ગઇકાલે કોઇપણ પરવાનગી વિના આ સરકારી ભવનનો `સમાજવાડી' જેમ ગેરઉપયોગ કરીને બેઠક યોજી હતી.

તેનાં પગલે ચોંકી ઉઠેલા કાર્યવાહક પ્રા. શિક્ષણાધિકારી આજે બી.આર.સી. ભવનમાં ધસી ગયા હતા અને ત્યાંના સી.સી. ટી.વી.ના ફૂટેજ મેળવીને કો- ઓર્ડિનેટર તેમજ સંબંધિતોને ખખડાવીને ખુલાસા પૂછયા હતા અને રોજકામ કર્યું હતું.

હવે આ ઘટના અંગનો અહેવાલ ડી.ડી.ઓ. સમક્ષ રજૂ કરીને સંબંધિત શિક્ષકો તેમજ સંઘના હોદ્દેદારો સામે કાર્યવાહીની રાય લેવાઇ છે.અને આગળની કાર્યવાહી કરવા બાબતે શિક્ષણ ખાતાનાં ઉચ્ચ અધિકારીએ આ માહિતી આપી હતી.