સૂચના / રીબડાના અનિરુદ્ધસિંહ અને જયરાજસિંહનો વિવાદ ઉગ્ર બનતા ચૂંટણીપંચે તાબડતોબ આપ્યો આ આદેશ, જુઓ શું છે વિવાદ

• ગોંડલમાં વધુ બંદોબસ્ત આપવા પોલીસને ચૂંટણી પંચનો નિર્દેશ
• બે જૂથ વચ્ચે વિવાદ વધુ ઉગ્ર બનતા તાકીદ
• બંન્ને અગ્રણીના નિવેદન પછી સતર્કતા

ગોંડલ વિધાનસભાની ચૂંટણી હવે રાજકીય રણસંગ્રામમાં ફેરવાઈ રહી હોય તેવું ચિત્ર ઉપસી રહ્યું છે. ગોંડલના ભાજપના ઉમેદવાર ગીતાબા જાડેજાના પતિ જયરાજસિંહની ખુલ્લી ધમકી બાદ રીબડાના અનિરુદ્ધસિંહ મેદાનમાં આવ્યા છે. રીબડાના અનિરુદ્ધસિંહ જાડેજા દ્વારા આજે પત્રકાર પરિષદનું આયોજન કરવામાં આવ્યું છે. જેને લઇને અનિરુદ્ધસિંહ જાડેજાની 'પ્રેસ' પર સહુની મીટ મડાઈ છે. બે જૂથ વચ્ચે વિવાદ વધુ ઉગ્ર બનતા ચૂંટણી પંચે ગોંડલ વિધાનસભામાં આવતા તમામ વિસ્તારમાં ચુસ્ત બંદોબસ્ત ગોઠવવા માટે સૂચના આપી છે. 

ચૂંટણી પંચ એલર્ટ
ચૂંટણી પંચની સૂચના બાદ ગોંડલમાં વર્ષો બાદ ચૂંટણી દરમિયાન IPS અધિકારીથી માંડીને રાજકોટ ગ્રામ્ય પોલીસના કેમ્પ ઉભા કરી દેવાયા છે. આ ઉપરાંત SRP અને CRPFની અનેક કંપનીઓને તૈનાત કરાવવામાં આવી છે. થોડા દિવસ અગાઉ ગોંડલના ભુણાવા ગામમાં યોજાયેલી સભામાં જયરાજસિંહે વિરોધીઓને ખુલ્લી ચેલેન્જ આપી હતી. તેમણે કહ્યું હતું કે, જયરાજસિંહ જ્યાં સુધી જીવે છે ત્યાં સુધી ગોંડલ બેઠક પર જયરાજસિંહના પરિવારને જ ટિકિટ મળશે. આ ઉપરાંત તેમણે સ્ટેજ પરથી જાહેરમાં વિરોધીઓના સરનામા વીંખી નાખવાની ધમકી આપી હતી. આ વીડિયો વાયરલ થતા ચૂંટણી પંચ એલર્ટ મોડ પર આવી ગયું છે.

ગોંડલમાં વધુ બંદોબસ્ત આપવા પોલીસને ચૂંટણીપંચનો નિર્દેશ
ચૂંટણીપંચે આ બાબતને ગંભીરતાથી લઇને પોલીસને ગોંડલમાં કાયદો અને વ્યવસ્થાની સ્થિતિ ન બગડે તે માટે  ગોંડલ વિધાનસભા વિસ્તારમાં આવતા તમામ વિસ્તારમાં ચુસ્ત બંદોબસ્ત  બંદોબસ્ત ગોઠવવાની સૂચના આપી હતી. 

ગોંડલ બેઠક વધુ પોલીસ ફોર્સ રખાશેઃ રેન્જ IG
આ રેન્જ IGએ જણાવ્યું કે, ગોંડલ બેઠક સૌરાષ્ટ્રની સૌથી વધુ સંવેદનશીલ બેઠક છે. ચૂંટણી પંચની સૂચના બાદ ગોંડલ બેઠક વધુ પોલીસ ફોર્સ રખાશે. રાજકોટ રૂરલ SPને આ માટે સૂચના અપાઈ છે.