રાજકીય કાર્યકરોમાં ખાણી-પીણીનો દોર ચાલુ થયો છે. લઘુમતી સમાજનું વર્ચસ્વ ધરાવતા વોર્ડમાં ‘દાવત’નો ધમધમાટ શરૂ
શહેરમાં હજુ રાજકીય પક્ષો અને કાર્યકરોમાં ચૂંટણીનો કંઈક અંશે ઉત્સાહ છે. સામાન્ય નાગરિકોમાં તો હજુ ચૂંટણીની ગરમી જોવા મળતી નથી. જોકે આવતા સોમવારથી અમદાવાદીમાં પણ ચૂંટણીવાર જ જોવા મળશે તેમ લાગે છે. જોકે રાજકીય કાર્યકરોમાં ખાણી-પીણીનો દોર ચાલુ થયો છે. તેમાં પણ લઘુમતી સમાજનું વર્ચસ્વ ધરાવતા વોર્ડમાં કાર્યકરો માટે રાતે 'દાવત'નો ધમધમાટ જોવા મળે છે.
આજે ચૂંટણીનો જંગ જીતવા રાજકીય પક્ષો અનેક પ્રકારનાં ગતકડાં અજમાવે છે. ચૂંટણી દરમિયાન મતદારોને રીઝવવા જાતજાતનાં અને ભાતભાતનાં પ્રલોભન અપાશે. જે તે રાજકીય પક્ષોના ચૂંટણી ઢંઢેરામાં મતદારોને હથેળીમાં ચાંદ બતાવવામાં આવશે. 'આપ'ના ગઈકાલના ચૂંટણી ઢંઢેરામાં મતદારોને જો પક્ષ સત્તા પર આવશે તો ભ્રષ્ટાચાર પર અંકુશ લગાવશે, મહોલ્લા ક્લિનિક, મફત શિક્ષણ, શહેરી બસમાં મહિલાઓ અને વિદ્યાર્થીઓને મફત મુસાફરી જેવાં પ્રલોભન અપાયાં છે.
બીજી તરફ આજે બપોરે કોંગ્રેસ દ્વારા બહાર પડનારા ચૂંટણી ઢંઢેરામાં મતદારોને વોર્ડદીઠ સમસ્યાના નિરાકરણની ખાતરી આપવી, એક વર્ષ સુધી ટેક્સમાફી, વ્યવસાય ટેક્સમાં ત્રણ વર્ષ માટે રાહત, કોન્ટ્રાક્ટ પ્રથા બંધ કરીને વર્ગ-ત્રણ અને ચારમાં કાયમી ભરતી વગેરે વચનોની લહાણી કરાશે. ભાજપ પણ ટૂંક સમયમાં મતદારોને વશીભૂત કરતો ચૂંટણી ઢંઢેરો પ્રસિદ્ધ કરશે.
જોકે તમામ રાજકીય પક્ષો માટે મતદારો ઉપરાંત સંનિષ્ઠ કાર્યકરો ખાસ અગત્યના છે. હવે જ્યારે ઉમેદવારોએ તેમના વોર્ડમાં જનસંપર્ક વોર્ડ શરૂ કર્યા છે ત્યારે સત્તાવાર રીતે કાર્યાલય ચાલુ કરાય કે ન કરાય, પરંતુ કાર્યકરોને સાચવી લેવાની કવાયત આરંભાઈ છે. ખાસ કરીને લઘુમતી સમાજનું વર્ચસ્વ ધરાવતા વોર્ડમાં રાતે જનસંપર્ક રાઉન્ડથી થાકેલા-પાકેલા કાર્યકરોને ઉત્સાહિત કરવા દાવતનો ધમધમાટ ચાલુ થઈ ગયો છે. જેમાં કાર્યકરોની ફરમાઈશ મુજબ ચિકન-બિરયાની પણ હોંશે હોંશે ઉમેદવારો ખવડાવી રહ્યા છે. કાર્યકરોને સાચવવા માટે નાણાંની કોથળી ખુલ્લી મુકાઈ છે.
આની સાથે આવા વોર્ડમાં કોંગ્રેસ અને 'મિમ'ના કાર્યકરો વચ્ચે ઘર્ષણ વધે તેમ પણ ચર્ચાઈ રહ્યું છે. મક્તમપુરામાં કોંગ્રેસનાં કપાયેલાં કોર્પોરેટર સુહાના મનસૂરી હવે 'મિમ'માંથી નસીબ અજમાવી રહ્યાં હોઈ તેમના કોર્પોરેટર બજેટના ખર્ચ અંગે બંને રાજકીય પક્ષો વચ્ચે બોલાચાલી થઈ હોવાનું જાણવા મળ્યું છે.