છેલ્લા કેટલાય વર્ષોથી ટેલિવૂડ પર રાજ કરનારી ટીવી ક્વિન એકતા કપૂરનો મુંબઈના એક મંદિરની બહારનો એક વીડિયો ખૂબ ચર્ચામાં છે. વીડિયોમાં એકતા મંદિરની બહાર બેઠેલા ગરીબોને કેળા આપતી જોવા મળી રહી છે, પરંતુ જે રીતે તે કેળા આપી રહી છે તે જોઈને ફેન્સ તેને ખૂબ ટ્રોલ કરી રહ્યાં છે.
હકીકતમાં એકતા કપૂર મુંબઈના એક મંદિરમાં દર્શન માટે પહોંચે છે, દર્શન પછી મંદિરમાંથી બહાર આવી તે ત્યાં બેઠેલાં ગરીબ લોકોને ટોપલીમાંથી કેળા લઈને બધાંને આપે છે. ત્યાં જ તેની પાસે એક નાનો છોકરો આવે છે અને તેનાથી કેળા માંગે છે પણ તે આગળ વધી જાય છે અને પાસે ઊભેલી એક વૃદ્ધ મહિલાને કેળા આપી દે છે. આ દરમિયાન એક મહિલા ઊભી થાય છે અને તેની પાસે કેળા માંગવા લાગે છે. તે દૂરથી કેળા હાથમાં આપી રહી હતી, જેનાથી કેળા હાથમાંથી છૂટીને નીચે પડી જાય છે. એકતા બધાંને કેળા તો આપે છે પણ તેનો હાથ ગરીબોના હાથને ટચ ન કરે એ રીતે આપે છે. એકતા કપૂરની આવી હરકતને જોઈને યુઝર્સ તેને ખૂબ ટ્રોલ કરી રહ્યાં છે અને કમેન્ટ્સ કરી રહ્યાં છે.
એક યુઝરે લખ્યું, વાહ, બહુ જ સારી રીત છે કેળા આપવાની. ગરીબોના હાથમાં એ રીતે કેળા ફેંકી દેવા એ કઈ રીત છે. જો તેમને એવું લાગે છે કે તેમને ટચ કરવાથી તમને કોઈ બીમારી થઈ જશે. તો આવા પ્રકારના કામ કરવાની જરૂર નથી. હું આ જોઈને અચંબિત છું. જ્યારે અન્ય એક યુઝરે લખ્યું, તે આ રીતે લોકોના હાથમાં કેળા ફેંકી રહી છે. આ કઈ રીત છે.
બીજા એક યુઝરે લખ્યું, એવું લાગે છે કે જાણે કેળા ફેંકીને તે ઉપકાર કરી રહી છે. એક યુઝરે તો એટલે સુધી લખ્યું કે, આ વીડિયો સ્લો મોશનમાં જોયો તો એવું લાગે છે કે એકતા તેનો હાથ ગરીબોને ટચ ન કરી લે એ વાતથી તે ચિંતિત છે. તે કેળા ફેંકી રહી છે અને આ ભેદભાવ દર્શાવે છે.