દેશમાં બેટી બચાઓ, બેટી પઢાવો સૂત્ર વહેતું કરાયું છે. લોકો બેટી પઢાવવા માટે જાગૃત થયા છે પરંતુ હજુ બેટી બચાવી શકાય તેવું વાતાવરણ ઊભું થયું નથી. છેલ્લાં ત્રણ ચાર દિવસથી મહિલા અને બાળકી પર જઘન્ય અપરાધની ઘટનાઓના અહેવાલ સામે આવી રહ્યા છે. હૈદરાબાદમાં ઘટેલી ઘટનાના પડઘા હજુ શમ્યા નથી ત્યાં રાજ્યમાં વડોદરા અને રાજકોટમાંથી માનવતાને શર્મસાર કરતી ઘટના સામે આવી છે.
ગુનેગારોમાં નથી ખૌફ
એક બાદ એક દુષ્કર્મની ઘટના
18 થી 30 વર્ષની મહિલાઓ વધુ બને છે બળાત્કારનો ભોગ : રિપોર્ટ
દેશમાં દુષ્કર્મની ઘટનાઓ બંધ થવાનું નામ નથી લેતી. તેલંગણમાં મહિલા ડોક્ટર સાથે સામૂહિક દુષ્કર્મની ઘટના અને તેને સળગાવી દેવાની ઘટનાના પડઘા હજુ શમ્યા ન હતા ત્યાં કોયંબતૂરમાં જ 11 માં ધોરણમાં અભ્યાસ કરતી કિશોરી સાથે દુષ્કર્મની ઘટના સામે આવી. જો કે એમાં આરોપીઓની ધરપકડ કરવામાં આવી તે તમામ આરોપીઓ 22થી 25 વર્ષના છે અને હજુ કેટલાક આરોપીઓ ફરાર છે.
ગુજરાતમાં પણ બની દુષ્કર્મની ઘટના
મહિલા વિરોધી અપરાધના આ કિસ્સાઓએ ફરીવાર દેશમાં મહિલા સુરક્ષા સામે સવાલ ઉભા કર્યા છે. જેના જવાબ મળે તે પહેલા આપણા રાજ્યમાં રાજકોટ અને વડોદરામાં પણ મહિલાઓની સુરક્ષાના દાવાઓની પોલ ખોલી નાખતી ઘટના બની. વડોદરામાં કિશોરી પર દુષ્કર્મ આચરાયું તો રાજકોટમાં બાળકીને પીંખી નાખી. આ ઘટનાએ ફરી એકવાર સબ સલામતીના દાવાની પોલ ખોલી નાખી છે.
18 થી 30 વર્ષની મહિલાઓ બની રહી છે બળાત્કારનો ભોગ : રિપોર્ટ
એક સર્વે મુજબ દેશમાં 18 થી 30 વર્ષની મહિલાઓ સૌથી વધુ બળાત્કારનો ભોગ બની રહી છે. ભોગ બન્યા બાદ ફરિયાદ નોંધાવવા જતી અનેક મહિલાઓને પોલીસ પાસેથી યોગ્ય સહકાર મળત નથી અને સરકાર 100 નંબર પર ફોનની દુહાઈ દઈ રહી છે. તો આ તરફ વીટીવી દ્વારા શહેરમાં અનેક મહિલાઓ પાસે જઈને જાણવાનો પ્રયાસ કર્યો કે, મહિલાઓ પણ હેલ્પલાઇન નંબરથી કેટલી વાકેફ છે
અનેક મહિલાઓ હેલ્પલાઇન નંબરથી અજાણ
સરકાર દ્વારા મહિલાઓની સુરક્ષા માટે વિવિધ હેલ્પલાઈન નંબરો જાહેર કરવામાં આવ્યા છે. પરંતુ રાજ્યમાં હજુ પણ અનેક મહિલાઓ હેલ્પલાઈન નંબરથી અજાણ છે. આપને જણાવી દઈએ કે, મહિલા કે પુરુષ માટે કોઈપણ ઈમરજન્સી સંજોગોમાં પોલીસની મદદ માટે 100 નંબર પર ડાયલ કરવો. 181 એ મહિલાઓ માટે અભ્યમ હેલ્પલાઈન નંબર છે.
1091 એ મહિલાઓને સુરક્ષા પ્રદાન કરતો નંબર છે. બાળકોને લગતી ફરિયાદ હોય તો 1098 નંબર છે.. જો કે આ નંબરો વિશે હજુ પણ અનેક મહિલાઓ અજાણ છે. કેટલીક મહિલાઓને એ ખબર છે કે આવા કંઈક નંબર છે પરંતુ ચોક્કસ નંબર કયો છે તે તેમને ખબર નથી.
અસુરક્ષાના વાતાવરણને ડામવાના કરવા પડશે પ્રયત્ન
એ વાત સાચી છે કે, હજુ પણ ઘણી મહિલાઓ હેલ્પલાઈન નંબરથી વાકેફ નથી અને એ પણ જરૂરી છે કે, મહિલાઓએ સાવચેત અને સાવધ રહીને અમુક પ્રકારના જોખમથી અંતર રાખવું જ પડશે પરંતુ આખરે રાજ્યમાં મહિલાઓની સુરક્ષાની જવાબદારી એક નાગરિક તરીકે નાગરિકોની તો છે પરંતુ મહિલાઓ સુરક્ષિત રહે તે પ્રકારનું વાતાવરણ સર્જવાની જવાબદારી પોલીસતંત્રની વધારે છે..
હા આ કોઈ સામાજિક કાર્યકરનો અવાજ નથી. આ એ કરોડો વાલીઓની ચિંતા છે. ત્યારે માથું ઉંચકી રહેલા અસાજિક તત્વો અને ઊભા થઈ રહેલા અસુરક્ષાના વાતાવરણને ડામી દેવા સરકારે આકરાં પગલાં ભરવા જ પડશે. અન્યથા જનતાનો વિશ્વાસ તેમની પરથી ઉઠી જશે.