Republic Day 2023 / જવાનોનો જોશ હાઇ.. ઇજિપ્તની ટુકડી, સ્વદેશી બંદૂકથી સલામી, 90 મિનિટની પરેડ અને 23 ઝાંખીઓ, જુઓ ભારતનો દમખમ

• આ વખતે ગણતંત્ર દિવસ પર ઘણી નવી વસ્તુઓ જોવા મળશે
• VVIPs પ્રજાસત્તાક દિવસની પરેડ જોવા માટે પ્રથમ લાઇનમાં નહીં હોય
• યુપીથી કાશ્મીર સુધીની 23 ઝાંખીઓ
• ઇજિપ્તના રાષ્ટ્રપતિ ગણતંત્ર દિવસના મુખ્ય અતિથિ 

26 જાન્યુઆરીએ એટલે કે આજે આપણો ભારત દેશ તેનો 74મો ગણતંત્ર દિવસ ઉજવી રહ્યું છે દર વર્ષની જેમ આ વખતે પણ પરેડમાં અનેક રાજ્યોની ઝાંખીઓનો સમાવેશ કરવામાં આવ્યો છે. સાથે જ આ આજની પરેડમાં વાયુસેનાના 50 વિમાન પણ પોતાની તાકાત બતાવશે. આ સાથે જ મહત્વની વાત એ છે કે આ વર્ષે ઇજિપ્તના રાષ્ટ્રપતિ અબ્દેલ ફતાહ અલ-સીસી પ્રજાસત્તાક દિવસની ઉજવણીના મુખ્ય અતિથિ બનવા જઈ રહ્યા છે. જો કે આ વખતે ગણતંત્ર દિવસ પર ઘણી નવી વસ્તુઓ પણ જોવા મળશે કારણ કે પહેલી વખત ગણતંત્ર દિવસની પરેડ કર્તવ્યપથ પરથી પસાર થશે. જણાવી દઈએ કે એ જગ્યા પહેલા રાજપથ તરીકે જાણીતી હતી પણ આ વખતે સરકારે આ જગ્યાનો વિકાસ કરીને તેનું નામ કર્તવ્યપથ રાખ્યું હતું. 

VVIPs પ્રજાસત્તાક દિવસની પરેડ જોવા માટે પ્રથમ લાઇનમાં નહીં હોય
આ સાથે જ આજની પરેડમાં મહત્વની વાત એ છે કે VVIPs પ્રજાસત્તાક દિવસની પરેડ જોવા માટે પ્રથમ લાઇનમાં નહીં હોય. કેન્દ્ર સરકારે છેલ્લા કેટલાક વર્ષોથી સરકારી આયોજન અને કાર્યક્રમોમાં સામાન્ય નાગરિકોનું પ્રતિનિધિત્વ વધારવા માટે ઘણું કામ કર્યું છે. વડાપ્રધાન નરેન્દ્ર મોદીએ જ ગયા વર્ષે ઓટોરિક્ષા ચાલકો, સફાઈ કર્મચારીઓ અને ફ્રન્ટલાઈન વર્કરોને દેશના ભવ્ય કાર્યક્રમ ગણતંત્ર દિવસની પરેડ માટે આમંત્રણ આપ્યું હતું. ભારત સરકારે તેમને શ્રમજીવી નામ આપ્યું છે. આજથી પહેલા હંમેશા પ્રજાસત્તાક દિવસની પરેડની પહેલી લાઇનમાં વીવીઆઈપી માટે અનામત રાખવામાં આવતી હતી પણ આ વખતે પહેલી હરોળમાં કાર્યકરોને જગ્યા આપવામાં આવશે. 

યુપીથી કાશ્મીર સુધીની 23 ઝાંખીઓ
74માં ગણતંત્ર દિવસની પરેડ ખાસ બનવા જઈ રહી છે. ગણતંત્ર દિવસની પરેડમાં કુલ 23 ઝાંખીઓ જોવા મળશે. મોટી વાત એ છે કે તમામ ટેબ્લોક્સની થીમ પણ અલગ-અલગ હશે. આમાંના મોટા ભાગના ટેબ્લોક્સની થીમ મહિલા સશક્તિકરણ વિશે હશે. તેમાંથી 17 ઝાંખી દેશના વિવિધ રાજ્યો અને કેન્દ્રશાસિત પ્રદેશોની હશે જ્યારે છ વિવિધ સરકારી મંત્રાલયો અને વિભાગોની હશે. 

10.30 વાગ્યે શરૂ થશે પરેડ
પ્રજાસત્તાક દિવસની પરેડ સવારે 10.30 વાગ્યે શરૂ થશે. આમાં લશ્કરી શક્તિ અને દેશની સાંસ્કૃતિક વિવિધતાનું અનોખું મિશ્રણ જોવા મળશે. જે દેશની વધતી જતી સ્વદેશી ક્ષમતાઓ, મહિલા શક્તિ અને 'નવા ભારત'ની ઝલક બતાવશે. પરેડની શરૂઆત વડાપ્રધાન નરેન્દ્ર મોદી નેશનલ વોર મેમોરિયલની મુલાકાત સાથે થશે. પીએમ મોદી અહીં શહીદોને પુષ્પાંજલિ અર્પણ કરીને શ્રદ્ધાંજલિ આપશે. ત્યારબાદ વડાપ્રધાન અને અન્ય મહાનુભાવો પરેડ જોવા માટે કર્તવ્ય પથ પર સલામી પ્લેટફોર્મ તરફ આગળ વધશે.

ઇજિપ્તના રાષ્ટ્રપતિ ગણતંત્ર દિવસના મુખ્ય અતિથિ 
અગ્નિવીર માટે આ પહેલી વખત છે જ્યારે એમને પરેડનો ભાગ બનાવવામાં આવશે અને તેની સાથે જ પરેડમાં તેઓ એમની શક્તિનું પ્રદર્શન કરતા જોવા મળશે. જો કે આ સાથે જ ઇજિપ્તની સેનાની ટુકડી પણ આ વખતે કર્તવ્યપથ પર જોવા મળશે. ઇજિપ્તની સશસ્ત્ર દળોનું સંયુક્ત બેન્ડ અને માર્ચિંગ ટુકડી આજના દિવસે પરેડમાં જોવા મળશે અને આ ટુકડીનું નેતૃત્વ ઈજિપ્તના કર્નલ મહમૂદ મોહમ્મદ અબ્દેલ ફત્તાહ અલ ખરાસાવી કરશે. આ સાથે જ પરેડમાં તિરંગાને કર્તવ્યપથ પર પહેલી વખત સ્વદેશી તોપોથી 21 તોપોની સલામી આપવામાં આવશે. જણાવી દઈએ કે અત્યાર સુધી આ સલામી બ્રિટિશ ગન 25 પાઉન્ડર આર્ટિલરી દ્વારા આપવામાં આવતી હતી પણ હવે તેની જગ્યાએ 105 એમએમ ભારતીય ફીલ્ડ ગન લેવાશે. 

નૌકાદળની ટુકડીનું નેતૃત્વ એક મહિલા કરશે
આજની પરેડમાં પહેલી વખત અનેક રીતે મહિલા શક્તિનું પ્રદર્શન જોવા મળશે. જણાવી દઈએ કે આ વખત મહિલા અધિકારી દિશા અમૃત 144 ખલાસીઓની નૌકા ટુકડીનું નેતૃત્વ કરશે અને એ ઉપરાંત ટેબ્લોક્સ માટે જે ત્રણ થીમ નક્કી કરવામાં આવી છે તેમાંથી એક મહિલા શક્તિ છે. નોંધનીય છે કે પાકિસ્તાન બોર્ડર પર દેશની રક્ષામાં તૈનાત મહિલા સૈનિકોને BSF ઊંટની પરેડમાં સામેલ કરવામાં આવશે.

પરેડ સિવાય બીજું શું હશે ખાસ?
પ્રજાસત્તાક દિવસની પરેડ 2023 સિવાય લાલ કિલ્લા પર મિનિસ્ટ્રી ઓફ ટ્રાઈબલ  અફેર્સ અને મિનિસ્ટ્રી ઓફ ડિફેન્સ તરફથી અનેક કાર્યક્રમો યોજાશે. વિવિધ રાજ્યોના આર્ટ ફોર્મ્સ અને ફૂડનું પ્રદર્શન થશે. આ કાર્યક્રમ ભારત પર્વ તરીકે ઓળખાશે. સાથે જ ફ્લાઇપાસ્ટમાં 18 હેલિકોપ્ટર, 8 ટ્રાન્સપોર્ટર વિમાન, અને 23 ફાઇટર એરક્રાફ્ટ સામેલ થશે. આ સિવાય ઈજિપ્તના 120 લોકોની માર્ચિંગ ટુકડી પણ પરેડમાં ભાગ લેશે.