ખેતીવાડી / 1 હજાર વિઘામાં કપાસનો પાક વાઈરસના કારણે બગડ્યો, કોઈ દવા કામ આવતી નથીઃ પાદરાના ખેડૂતોએ માંગી સહાય

• કરજણ,પાદરા તાલુકામાં ખેડૂતો મુશ્કેલીમાં
• કપાસમાં વાયરસથી છોડ સુકાયા 
• "5 થી 6 દિવસમાં આખા છોડ બળી જાય છે"

વડોદરાના કરજણ અને પાદરા તાલુકામાં ઉભા પાકને નવો રોગ લાગૂ થયો છે. કપાસના ઊભા પાક પર વાયરસ ફરી વળતા ખેડૂતો મુશ્કેલીમાં મુકાયા છે. હજારો વિઘા પર ઉગાડેલા કપાસના પાકને વ્યાપક નુકસાન પહોંચ્યું છે. ખેતરમાં ઉગાડેલા કપાસમાં વાયરસને કારણે છોડ સુકાયા છે. 5થી 6 દિવસમાં આખા છોડ બળી જતા હોવાનો ખેડૂતોએ દાવો કર્યો છે. જો કે ખેડૂતોની રજૂઆત બાદ કરજણ તાલુકામાં ખેતીવાડી વિભાગની ટીમોએ તપાસ શરૂ કરી છે.

ખેડૂતોએ કહ્યું કે, અમારા સહિત અનેક ગામમાં વાઈરસના કારણે કપાસ બગડી ગયો છે. આ સાથે દીવેલામાં પણ અસર જોવા મળી છે. સાથે કરજણમાં ખેડૂતોને પાક નુકસાન થયું તે પ્રમાણે સહાયની માગણી કરી છે. તો કરજણમાં થતા સરવેની કામગીરી પ્રમાણે પાદરા તાલુકાના ખેડૂતોએ પણ સરવે અને યોગ્ય વળતરની માગણી કરી છે. ખેડૂતોએ જણાવ્યું કે, આશરે 1 હજાર વિઘામાં વાઈરસના કારણે સંપૂર્ણ પાક બળી ગયો છે. કોઈ દવા કામ આવતી નથી. ખેડૂતોને વાઈરસની કારણે મોટું નુકસાન ઉઠાવવું પડ્યું છે. એક તરફ કોરોના બાદ ગુજરાતમાં વરસાદ પણ ખેંચાયો છે. ત્યારે આ પ્રકારે રોગ આવવાથી પડ્યા માથે પાટા જેવી સ્થિતિ જગતનો તાત ઉઠાવી રહ્યો છે.