આખા વિશ્વમાં વેક્સિન માટે લોકો પડાપડી કરી રહ્યાં છે. કોઈને પ્રથમ ડોઝ, કોઈને બીજો ડોઝ તો કોઈને બૂસ્ટર ડોઝ લગાવવો છે. કોરોના વાયરસના નવા વેરિએન્ટ ઓમિક્રોન સામે આવ્યાં બાદ વેક્સિની માગ વધારે વધી છે. કારણકે નિષ્ણાંતોએ કહ્યું છે કે રસી જ એક માત્ર ઉપાય છે પરંતુ ન્યુઝીલેન્ડના એક શખ્સ માટે જીવનરક્ષક વેક્સિન જ જીવનું જોખમ બની ગઇ છે અને આ વેક્સિનના ઓવરડોઝથી બન્યું છે.
વેક્સિન લેવા માટે આખા વિશ્વમાં લોકોની પડાપડી
ન્યુઝીલેન્ડના એક શખ્સ માટે જીવનરક્ષક વેક્સિન જ જીવનું જોખમ બની
આ શખ્સે 24 કલાકમાં વેક્સિનના 10 ડોઝ લઈ લીધા
ન્યુઝીલેન્ડમાં એક શખ્સે 24 કલાકમાં વેક્સિનના 10 ડોઝ લીધા
અત્યાર સુધી વેક્સિનના બે અથવા કોઈ જગ્યાએ ત્રણ ડોઝ મુકવામાં આવ્યાં છે. પરંતુ ન્યુઝીલેન્ડમાં એક શખ્સે 24 કલાકમાં વેક્સિનના 10 ડોઝ લઈ લીધા. અહેવાલ સામે આવ્યાં બાદ સ્વાસ્થ્ય મંત્રાલય એક્શનમાં આવ્યું અને તાત્કાલિક તપાસના આદેશ આપી દીધા. મીડિયા રિપોર્ટસ મુજબ, વેક્સિનના દરેક ડોઝ માટે શખ્સને પૈસા આપવામાં આવ્યાં હતા. જેને પગલે આ શખ્સે દિવસમાં ઘણાં વેક્સિનેશન સેન્ટરની મુલાકાત લીધી હતી. અધિકારીઓનું કહેવુ છે કે તેમને વેક્સિન ઓવરડોઝ મામલાની કોઈ માહિતી નથી અને તેઓ તેને ગંભીરતાથી લઇ રહ્યાં છે.
ખૂબ ચિંતાજનક સ્થિતિ: અધિકારી
ન્યુઝીલેન્ડ સ્વાસ્થ્ય મંત્રાલયના વેક્સિનેશન પ્રોગ્રામના ગ્રુપ મેનેજર એસ્ટ્રિડ કોર્નનીફે કહ્યું કે આ ખૂબ ચિંતાજનક સ્થિતિ છે અને અમે ઘણી એજન્સીઓના સંપર્કમાં છે. જો તમને આવા કોઈ શખ્સ અંગે જાણકારી મળે છે, જેણે વેક્સિનના ઘણાં ડોઝ લીધા છે તો તેને તાત્કાલિક ડૉકટર સાથે મળવાની સલાહ આપો. જોકે, અત્યારે મંત્રાલયે એવુ જણાવ્યું નથી કે આ ઘટના ક્યાની છે. નિષ્ણાંતોનું કહેવુ છે કે એક દિવસમાં વેક્સિનનો આટલો ડોઝ લેવાનો કોઈ ડેટા હાલ નથી.