ચિંતા / સરકારના નિર્ણયથી ડૉક્ટર જગત ચિંતામાં, કહ્યું જો બાળકો સ્કૂલોમાં જશે તો આ રહેશે સૌથી મોટો ડર

• સરકારના સ્કૂલ શરૂ કરવાના આદેશ પર AMAનું નિવેદન
• બાળકો સ્કૂલમાં સામાજિક અંતર નહી રાખી શકેઃ AMA
• બાળક ઘરે જઈને માતાને ભેટશે એટલે સંક્રમણ વધી શકેઃ AMA

રાજ્ય સરકાર દ્વારા 23 નવેમ્બરથી સ્કૂલ, કોલેજ શરૂ કરવાના આદેશ આપવામાં આવ્યા છે. ત્યારે હવે આ મામલે AMAએ કહ્યું છે કે, બાળકો સ્કૂલમાં સામાજિક અંતર નહી રાખી શકે.  હાલની સ્થિતિને ધ્યાને રાખીને બાળકોએ સ્કૂલમાં ન જવું જોઈએ. જો બાળક સ્કૂલમાંથી ઘરે જઈને માતાને ભેટશે એટલે સંક્રમણ ફેલાવવાની વધુ શક્યતા છે. સાથે જ તેમણે કહ્યું કે, બાળકોની સરકારની ગાઈડલાઈનનું પાલન કરે કે નહી તે પણ એક પ્રશ્ન છે.

રાજ્યમાં છેલ્લા 24 કલાકમાં નવા 1125 કોરોના વાયરસના પોઝિટિવ કેસ નોંધાયા છે. જેને લઇને કુલ આંકડો 1,83,844 પર પહોંચ્યો છે. મહત્વનું છે કે રાજ્યમાં રિકવરી રેટ  91.28 ટકા થયો છે. તો છેલ્લા 24 કલાકમાં 52,973 કોરોનાના ટેસ્ટ કરવામાં આવ્યા જેને લઇને કુલ ટેસ્ટનો આંકડો 66,25,876 પર પહોંચ્યો છે.

શું કહે છે સરકાર? 

રાજ્યના શિક્ષણમંત્રી ભુપેન્દ્રસિંહ ચુડાસમાએ શાળા-કોલેજ શરુ કરવાને લઇને નિવેદન આપતાં કહ્યું કે સ્કૂલો-કોલેજો ખોલવાને લઇને ગુજરાત પ્રથમ રાજ્ય નથી, રાજ્યોમાં પણ ખોલવાનો નિર્ણય લેવામાં આવ્યો છે. 

ભુપેન્દ્રસિંહ ચુડાસમાએ કહ્યું કે 7 રાજ્યોમાં સપ્ટેમ્બર મહિનામાં જ શાળાઓ ખોલી નાંખવામાં આવી હતી. શિક્ષણમંત્રીએ કહ્યું કે રાજ્ય સરકાર બાળકની સલામતી સંદર્ભે કોઇપણ બાંધછોડ નહીં કરે. સરકાર પોતાની જવાબદારીથી ભાગી રહી નથી. બાળકની જવાબદારી માટે સરકાર, શાળા અને વાલી જવાબદાર છે. 

ગુજરાતમાં આવી રીતે શરૂ થશે શાળા

1. દિવાળી પછી 23મી નવેમ્બરથી ગુજરાતમાં માધ્યમિક, ઉચ્ચત્તર માધ્યમિક, કોલેજ, યુનિવર્સિટીમાં વર્ગશિક્ષણ શરૂ થશે

2. ધોરણ 9 થી 12ના વર્ગો ભારત સરકારની SOP ગાઈડલાઈનના પાલન સાથે શરૂ થશે

3. ધોરણ 1 થી 8ના વર્ગો ક્યારે શરૂ કરવા તે આ શાળા-કોલેજના અનુભવો પછી નક્કી કરાશે

4. ઓડ-ઈવનનો વિકલ્પ છે, જ્યાં ધો.9 અને 10 છે ત્યાં સોમ, બુધ શુક્ર 9મું ધોરણ અને બાકીના મંગળ, ગુરુ, અને શનિએ 10મા ધોરણના વર્ગો શરૂ રહેશે

5. ધોરણ 11 અને 12 માટે પણ ઓડ-ઈવનના ધોરણે શૈક્ષણિક વર્ગો શરૂ થશે

6. કોલેજો-યુનિવર્સિટીઓમાં પણ 23મી નવેમ્બરથી શૈક્ષણિક વર્ગો શરૂ થશે

7. કોલેજ-યુનિવર્સિટીમાં પ્રથમ તબક્કે પોસ્ટ ગ્રેજ્યુએટ, મેડિકલ અને પેરામેડિકલના વર્ગો શરૂ થશે

8. ગ્રેજ્યુએટ કક્ષાએ માત્ર ફાઈનલ ઈયર એટલે કે કોલેજના છેલ્લા વર્ષમાં હોય એના જ ક્લાસ જ શરૂ થશે

9. ઈજનેરી, પોલિટેકનિક, ITIમાં અંતિમ વર્ષના વિદ્યાર્થીઓના જ ક્લાસ શરૂ થશે

10. શાળા કોલેજોએ દરેક વિદ્યાર્થીને વાલીની સંમતિનું ફોર્મ આપવાનું રહેશે અને સંમતિ મેળવવાની રહેશે

11. પ્રાર્થના, રિસેસમાં બાળકો એકઠા ન થાય તે માટે શાળા-કોલેજ ધ્યાન રાખશે

12. મધ્યાહન ભોજનની સબસિડી બાળકના વાલીના ખાતામાં ડિસેમ્બર સુધી જમા થતી રહેશે

13. કોઈ બાળકમાં સિમ્ટમ્સ દેખાય તો આચાર્ય નજીકના આરોગ્ય કેન્દ્રને જાણ કરશે અને સારવાર મળે તે સુનિશ્ચિત કરશે

14. નોકરી કરતા તમામ શિક્ષકોએ શાળાએ આવવું પડશે

15. શાળા-કોલેજ પર આવતા વિદ્યાર્થીઓને થર્મલ ગનથી સ્કેન કરાશે

1352 દર્દીઓ થયાં સાજા, 6 દર્દીઓના મોત

આજે 1352 દર્દીઓ સાજા થતા કુલ સાજા થયેલા દર્દીઓનો આંકડો 1,67,820 પર પહોંચ્યો છે. આજે 6 દર્દીઓના મોત થતા કુલ મૃત્યુઆંક 3,779 પર પહોંચ્યો છે. જેમાં અમદાવાદમાં 2, રાજકોટમાં 2, સુરતમાં 1 અને વડોદરામાં 1 દર્દીનું સારવાર દરમિયાન મોત થયું છે. જ્યારે એક્ટિવ કેસ 12,245 છે. જેમાં અમદાવાદ, સુરત, રાજકોટ, મહેસાણા અને વડોદરામાં સૌથી વધુ એક્ટિવ કેસ છે.

મહાનગરો કરતા દાહોદમાં સૌથી વધુ દર્દીઓ સાજા થયા

દાહોદ જિલ્લામાં સૌથી વધુ 230 દર્દીઓ સાજા થયા છે. સુરતમાં 208, વડોદરામાં 188, અમદાવાદમાં 149, ગાંધીનગરમાં 121, રાજકોટમાં 86, છોટા ઉદેપુરમાં 79 દર્દીઓ સાજા થયા છે.

આ 4 મહાનગરોમાં સૌથી વધુ કેસ 

રાજ્યમાં સૌથી વધુ સુરત, અમદાવાદ, રાજકોટ, વડોદરામાં સૌથી વધુ કોરોનાના કેસ નોંધાઇ રહ્યા છે. જેમાં આજે અમદાવાદમાં 207, સુરતમાં 184, વડોદરામાં 130 અને રાજકોટમાં 134, મહેસાણામાં 70 નવા કોરોનાના કેસ નોંધાયા છે. જોકે જામનગર, બનાસકાંઠા, ગાંધીનગર અને પાટણમાં કોરોનાના કેસનો ઘટાડો જોવા મળી રહ્યો છે.ભાવનગર, પોરબંદર અને બોટાજમાં ગત 24 કલાકમાં માત્ર 1 જ કેસ નોંધાયો હતો.

છેલ્લા 24 કલાકમાં વિવિધ જિલ્લામાં નોંધાયેલા કેસની વિગત