તવાઈ / ઓનલાઇન હાજરીના નિર્ણય બાદ ભાંડો ફૂટ્યો, ચાલુ નોકરીએ વિદેશમાં રહેતા 39 શિક્ષકોને હાંકી કાઢ્યા

• શિક્ષણ વિભાગ દ્વારા કરવામાં આવી કાર્યવાહી 
• વિદેશ ભાગી ગયેલા 39 શિક્ષકોને કરાયા ડિસમીસ  
• ઓનલાઇન હાજરીમાં કુલ 411 ગુલ્લીબાજ શિક્ષકો ઝડપાયા 

શિક્ષકોની ઓનલાઇન હાજરીના નિર્ણય બાદ આ ભાંડો ફૂટતા શિક્ષણ વિભાગ દ્વારા કાર્યવાહી કરવામાં આવી છે. ચાલુ નોકરીએ વિદેશમાં સ્થાયી થયા શિક્ષકો સામે કાર્યવાહી કાર્યવાહી કરવામાં આવી છે. જેમાં રાજ્યના વિદેશ ભાગી ગયેલા 39 શિક્ષકોને ડિસમીસ કરવામાં આવ્યા છે. વિદેશમાં સ્થાયી થયેલા શિક્ષકોમાં સૌથી વધુ આણંદના 7 શિક્ષકોનો સમાવેશ થાય છે. આ સિવાય અમદાવાદના 2, મહેસાણા 3, ખેડા 5, ભાવનગરના 3, પાટણના 5, કચ્છના 3 અને દાહોદના 2 શિક્ષકોનો સમાવેશ થાય છે.

મહત્વનું છે કે, ઓનલાઇન હાજરીમાં કુલ 411 ગુલ્લીબાજ શિક્ષકો ઝડપાયા છે. જેમાંથી 136 વિરુદ્ધ કડક કાર્યવાહી હાથ ધરવામાં આવી છે. છેલ્લા એક વર્ષથી આ શિક્ષકો ગેરહાજર રહેતા હતા.

અત્રે ઉલ્લેખનીય છે કે, રાજ્યમાં કાયઝાલા એપ્લિકેશનનો શિક્ષકો દ્વારા કરાયેલ વિરોધ બાદ સરકાર ઝૂકી હતી. ત્યારબાદ કાયઝાલા એપ્લિકેશન લોન્ચ નહીં કરવાનો નિર્ણય લેવાયો હતો. જોકે બાદમાં બાયોમેટ્રિક સિસ્ટમથી શિક્ષકોની હાજરી લેવાનો નિર્ણય લેવાયો હતો. રાજ્યના તમામ શિક્ષકોએ શાળામાં આવવાના અને પરત જવાના સમયે ઓનલાઈન હાજરી પુરવાના આદેશ અપાયા હતા. સરકાર દ્વારા ઓનલાઇન અટેન્ડન્સ સિસ્ટમ શિક્ષક દિને લોન્ચ કરાઇ હતી. ત્યાર બાદ આ ચોંકવનારી વિગતો સામે આવી છે.