ક્રિકેટ / ધોનીની ચેન્નઈ સુપર કિંગ્સ પર ફરી મુસીબત આવીઃ ED પૂછપરછ કરશે

હવે ફરી એક વાર ધોનીની CSK વિવાદોમાં ફસાતી જોવા મળી રહી છે. સૂત્રોની વાત માનવામાં આવે તો એન્ફોર્સમેન્ટ ડિરેક્ટોરેટ (ED)ને મની લોન્ડ્રીંગ તપાસમાં જાણવા મળ્યું છે કે CSKમાં ઇન્ફ્રાસ્ટ્રક્ચર લીઝિંગ એન્ડ ફાઇનાન્શિયલ સર્વિસીસ (II&FS)એ 300 કરોડ રૂપિયાનું રોકાણ કર્યું છે.

અહેવાલો અનુસાર CSKમાં આ રોકાણ વર્ષ 2018માં કરવામાં આવ્યું હતું. આ રોકાણની પાછળનાં કારણોની તપાસ ED કરી રહ્યું છે. ઉલ્લેખનીય છે કે 2018માં જ ચેન્નઈ ટીમે બે વર્ષના પ્રતિબંધ બાદ વાપસી કરી હતી. પ્રતિબંધને કારણે CSK 2016 અને 2017ની IPL સિઝનમાં ભાગ લઈ શકી નહોતી. ચેન્નઈ  ટીમ સ્પોટ ફિક્સિંગ મામલામાં દોષી ઠર્યા બાદ તેની સામે કાર્યવાહી કરવામાં આવી હતી.

સૂત્રોના જણાવ્યા અનુસાર આ મામલામાં ત્રણ વાર IPL ચેમ્પિયન બનેલી CSK ફ્રેંચાઇઝીની પૂછપરછ થઈ શકે છે. આ ઉપરાંત રોકાણ કરનારીની કંપનીની પણ પૂછપરછ થઈ શકે છે. જોકે આ મામલો સામે આવ્યા બાદ CSK તરફથી હજુ સુધી કોઈ પ્રતિક્રિયા વ્યક્ત કરવામાં આવી નથી. ફ્રેંચાઇઝીનું કહેવું છે કે EDએ હજુ આ મામલે અમારી સાથે કોઈ વાત કરી નથી.