એન્ફોર્સમેન્ટ ડિરેક્ટોરેટ, EDએ યસ બેન્ક મની લોન્ડરિંગ કેસમાં રાણા કપૂર અને અન્ય લોકોની રૂપિયા 2,200 કરોડની જંગી સંપત્તિ જપ્ત કરી છે. અધિકારીઓએ જણાવ્યું હતું કે DHFLના પ્રમોટર કપિલ અને ધીરજ વઢવાણની સંપત્તિને પણ પ્રિવેન્શન ઓફ મની લોન્ડરિંગ એક્ટ, PMLA હેઠળ જપ્ત કરવામાં આવી છે. EDએ જપ્ત કરેલી રકમમાં રાણા કપૂરની કેટલીક વિદેશી સંપત્તિ પણ શામેલ છે.
તાજેતરમાં EDએ યસ બેંકના સહ-સ્થાપક રાણા કપૂર વિરુદ્ધ મુંબઈની વિશેષ અદાલતમાં ચાર્જશીટ ફાઇલ કરી હતી. EDનો આરોપ છે કે કપૂર અને તેના પરિવારના સભ્યોએ તેમની કંપનીઓના માધ્યમથી મોટી લોન મંજૂર કરાવવા માટે 4,300 કરોડ રૂપિયાની રકમ લોન સ્વરૂપે મેળવી હતી. કપૂર પર આરોપ છે કે લોનની રિકવરીના બદલામાં તેમણે લાંચ લીધી હતી જેને પગલે તે સંપત્તિ નોન પરફોર્મિંગ એસેટ્સ (NPA) માં ફેરવાઈ ગઈ છે
600 કરોડની લાંચ મુદ્દે ચાલી રહી છે તપાસ
8 માર્ચે EDએ પ્રિવેશન ઓફ મની લોન્ડરિંગ એક્ટ (PMLA) હેઠળ બેંકના ભૂતપૂર્વ મેનેજિંગ ડિરેક્ટર અને ચીફ એક્ઝિક્યુટિવ ઓફિસર કપૂરની ધરપકડ કરી હતી. ED અન્ય બાબતોની સાથે સાથે, કપૂર, તેની પત્ની અને ત્રણ પુત્રીઓ દ્વારા નિયંત્રિત કંપનીઓ દ્વારા કરવામાં આવેલા કૌભાંડની આરોપી કંપની દીવાન હાઉસિંગ ફાઇનાન્સ લિમિટેડ તરફથી મળેલા 600 કરોડ રૂપિયાની પણ તપાસ કરી રહી છે. તાજેતરમાં જ CBIએ પણ રાણા કપૂર, તેની પત્ની બિંદુ અને પુત્રી રોશની વિરુદ્ધ DHFL પ્રમોટરો પાસેથી 600 કરોડની લાંચ લેવા મામલે ચાર્જશીટ દાખલ કરી છે.
IPC 120 બ, 420 હેઠળ ગુનો દાખલ
મુંબઈની વિશેષ CBI કોર્ટ સમક્ષ કરવામાં આવેલી ચાર્જશીટમાં દીવાન હાઉસિંગ ફાઇનાન્સ લિમિટેડ (DHFL), કપિલ વઢવાણ, તેના ભાઈ રાજેશ, બેલિફ રિયલ્ટર્સ પ્રાઈવેટ લિમિટેડ, RKW ડેવલપર્સ પ્રાઈવેટ લિમિટેડ અને DOIT અર્બન વેન્ચર્સ (ઇન્ડિયા) પ્રાઈવેટ લિમિટેડના નામ શામેલ છે. આ આરોપીઓ સામે અને ભારતીય દંડ સંહિતાની કલમ 120 બી (ગુનાહિત કાવતરા), 420 (છેતરપિંડી) અને ભ્રષ્ટાચાર નિરોધક અધિનિયમની જોગવાઈઓ હેઠળ આરોપો મૂકવામાં આવ્યા છે.