કાર્યવાહી / ગુજરાત મેરીટાઈમ બોર્ડ સાથે ફ્રોડના કેસમાં EDનું એક્શન : ANL કંપનીની 134 કરોડની સંપત્તિ જપ્ત

• ગુજરાત મેરીટાઈમ બોર્ડ સાથે કૌભાંડનો મામલો 
• EDએ જોઇન્ટ વેન્ચર કંપની સામે કરી કાર્યવાહી 
• 134 કરોડથી વધુની સંપત્તિઓ જપ્ત 

EDએ લીધા એક્શન 
ગુજરાત મેરીટાઈમ બોર્ડમાં થયેલ કથિત કૌભાંડ મામલે ED દ્વારા એક્શન લેવામાં આવ્યા છે. EDએ આ મામલે મની લોન્ડરિંગ કેસમાં ઈન્ડિયા-નૉર્વે જોઇન્ટ વેન્ચર કંપનીની 134 કરોડની સંપત્તિ ટાંચમાં લીધી લીધી છે, શનિવારે આ મુદ્દે ED દ્વારા જાણકારી આપવામાં આઅવી હતી. 

PMLA કાયદા હેઠળ કાર્યવાહી 
EDએ જે સંપત્તિઓ ટાંચમાં લીધી છે તેમાં કંપની પ્લાન્ટ, મશીનરી, કોમ્પ્યુટર, જમીન, બિલ્ડિંગ સહિતની મિલકતોનો સમાવેશ થાય છે. આ સિવાય આકાશ નોરકંટ્રોલ લિમિટેડનાં નામે જમા ₹43,75,82,000 પણ EDએ પોતાના કબજે લઈ લીધા છે. સમગ્ર મામલે PMLA કાયદા હેઠળ કાર્યવાહીના પ્રાથમિક આદેશ આપી દેવામાં આવ્યા છે. 

EDએ આપેલ જાણકારી અનુસાર આ ANL એક જોઇન્ટ વેન્ચર છે જેમાં ભારતની આકાશ કોમ્પ્યુટર્સ તથા નૉર્વેની Kongsberg Norcontrol IT સામેલ છે. 

ગાંધીનગર CIDએ દાખલ કરી હતી FIR 
નોંધનીય છે કે ગાંધીનગર CID દ્વારા દાખલ કરવામાં આવેલ એક ફરિયાદનાં આધારે આ સમગ્ર કાર્યવાહી હાથ ધરવામાં આવી છે. CIDએ GMB એટલે કે ગુજરાત મેરીટાઇમ બોર્ડ સાથે 134 કરોડની છેતરપિંડી સામે FIR દાખલ કરી હતી. 

શું છે સમગ્ર મામલો? કઈ રીતે થઈ હતી છેતરપિંડી 
ANL એક એવી કંપની છે જે મોટા જહાજોનાં ટ્રાફિક અને પોર્ટ મેનેજમેન્ટ સિસ્ટમને બનાવવાનું કામ કરે છે તથા જહાજોને લગતી સેવાઓ આપે છે. એવામાં ANLએ ગુજરાત મેરીટાઇમ બોર્ડ સાથે કરોડો રૂપિયાની છેતરપિંડી કરી હતી. GMBએ ANLને ખંભાતમાં VTPMS(Vessel Traffic and Ports Management System) બનાવવા માટે કરાર કર્યો હતો. 

EDને સમગ્ર તપાસમાં જાણવા મળ્યું છે કે ANLએ સમગ્ર પ્રોજેક્ટમાં ખર્ચો વધારીને બતાવ્યો હતો તથા ઊંચા ભાવે ટેરિફ નક્કી કર્યા હતા. ખોટા ખર્ચા દર્શાવીને ANL ₹134.38 વધારના રૂપિયા ચાઉં કરી ગઈ.