વીજળીના ભાવ સતત વધી રહ્યા છે. તેની વચ્ચે એવા ઇકો ફ્રેન્ડલી સોલર સેલ પર સંશોધન થયું છે, જે બજારમાં સસ્તી કિંમતે મળશે. આ સોલર સેલ અલાહાબાદ કેન્દ્રિય યુનિવર્સિટી સાથે સંલગ્ન મહાવિદ્યાલય ચૌધરી મહાદેવપ્રસાદ ડિગ્રી કોલેજની સંશોધક પ્રિયંકા ચાવલાએ તૈયાર કર્યા છે. આ સંશોધન રસાયણ વિજ્ઞાન વિભાગની એસોસિયેટ પ્રોફેસર ડો. મૃદુલા ત્રિપાઠીના નિર્દેશનમાં પૂરું કરાયું છે.
વધતા ભાવના સમયમાં સસ્તી વીજળી ઉત્પન્ન કરી શકાશે
આ સોલર સેલ ફળો અને ફૂલોમાંથી તૈયાર કરાયાં છે. તે ખૂબ જ જલદી સામાન્ય લોકો માટે બજારમાં ઉપલબ્ધ થશે. બજારમાં ઉપલબ્ધ સિલિકોન આધારિત સોલર સેલ મોંઘાં અને નુકસાનકારક હોય છે. આવા સંજોગોમાં ફળ, ફૂલ અને શાકભાજીમાંથી ઇકો ફ્રેન્ડલી સોલર સેલ તૈયાર કરાયા છે.
તેમાં તમામ રંગીન ફૂલો ઉપરાંત બિટ, પાલક અને સ્ટ્રોબેરીનો ઉપયોગ કરાયો છે. રંગીન ફૂલ સૂર્યની રોશનીને ખેંચવામાં સહાયક થાય છે. આ ઉપરાંત ગવાર અને બટાકામાંથી નીકળતા સ્ટાર્ચમાંથી સોલિડ ઇલેક્ટ્રોલાઇટનો ઉપયોગ કરાયો છે. સાથે સાથે નેચરલ ઇલેક્ટ્રોડ કાર્બનનો પણ પ્રયોગ કરાયો છે.
ત્રણ મહિનામાં તેને તૈયાર કરાયા છે. આ સિલિકોન આધારિત સોલર સેલથી થતાં નુકસાનથી માણસને બચાવવામાં પણ કારગત રહેશે. આ પ્રોજેક્ટની લંડનની કિંગ્સ્ટન યુનિવર્સિટીમાં પણ પ્રશંસા થઇ ચૂકી છે.