ગણેશ વિસર્જન / માંડવીનાં રામપર ગામે ગણપતિની મૂર્તિનાં વિસર્જનને બદલે સાચવી રાખાઇ, આ છે રસપ્રદ કારણ

• ગણેશ વિસર્જન નિમિત્તે દેશભરમાં ધામધૂમથી ઉજવણી
• ઇકોફ્રેન્ડલી મંગલમૂર્તિનાં વિસર્જનનો લોકોનો વધારે આગ્રહ
• સ્વામિનારાયણનાં સંતો અને ભૂદેવોનો અનોખો વિચારક

જળાશયોમાં થતાં મૂર્તિઓના વિસર્જનના કારણે પાણીમાં વ્યાપક પ્રદુષણ ફેલાય છે અને તેનાથી જળચર જીવો અને વનસ્પતિને ખૂબ નુકશાન થાય છે. આવું પ્રદુષણ ન ફેલાય તે હેતુથી માંડવી તાલુકાનાં રામપર(વેકરા) ગામે સ્થાપિત સુંદર મૂર્તિનું વિસર્જન કરવાના બદલે તેને સાચવીને રખાઇ છે.

આ વખતે નાની ઇકોફ્રેન્ડલી મૂર્તિ (Eco Friendly Ganpati Idol) નું જ વિસર્જન કરવામાં આવ્યું છે. રામપર (Rampar) (વેકરા) ગામે ગણેશ મિત્ર મંડળ દ્વારા છેલ્લા બે વર્ષથી ગણેશઉત્સવનું ભારે ધામધૂમથી આયોજન થાય છે. આ વર્ષે પણ આવું જ આયોજન કરાયું હતું. આ ઉત્સવમાં સ્વામિનારાયણ મંદિરના સંતો શાસ્ત્રી સ્વામી દેવચરણદાસજી અને ભક્તિવિહારી સ્વામીજી પણ દર્શનાર્થે આવ્યાં હતાં. મનમોહક ગણેશમૂર્તિ જોઇને તેમણે આ પ્રતિમાનું વિસર્જન ન કરવા અને 12 મહિના આ મૂર્તિને સાચવી રાખીને આવતા વર્ષે ભૂદેવો દ્વારા પુનઃ આ મૂર્તિને જ શાસ્ત્રોક્ત વિધિથી સ્થાપન કરવા જણાવ્યું હતું.

સંતોએ સમજાવ્યું હતું કે આમ કરવાથી લોકોનો સમય, નાણાંનો વેડફાટ નહીં થાય અને જળાશયોમાં પી.ઓ.પી.ની નાની- મોટી મૂર્તિના વિસર્જનના કારણે ફેલાતું પ્રદુષણ પણ અટકશે. ભગવાનની મૂર્તિની અવદશા પણ નહીં થાય. સ્વામીજીઓના આ સુચન પર રામપર ગણેશ મિત્રમંડળના સભ્યોએ વિચાર કરીને તેને માન્ય રાખ્યું હતું. તેણે નાની ઇકોફ્રેન્ડલી મંગલમૂર્તિનું જ વિસર્જન કર્યું હતું. અન્ય ગણેશ ઉત્સવ તથા તેના આયોજકો માટે આ પ્રેરણારૂપ વિચાર છે. આવતા વર્ષે કદાચ અન્ય મંડળો પણ આ વિચારને અનુસરે તો નવાઇ નહીં.