ચૂંટણીપંચ / તમિલનાડૂમાં ECની લાલ આંખ, કનીમોઝી બાદ AMMKની ઓફિસ પર દરોડા

લોકસભા ચૂંટણી પહેલા તમિલનાડુમાં ચૂંટણી પંચે લાલ આંખ કરી છે.  કનિમોઝીના નિવાસ સ્થાને દરોડા પાડ્યા બાદ ચૂંટણી પંચની ટીમે હવે AMMKની પાર્ટી ઓફિસ પર દરોડા પાડ્યા છે. આ કાર્યવાહીમાં પાર્ટીની ઓફિસમાંથી રૂપિયા 1 કરોડ 40 લાખની રોકડ પણ જપ્ત કરવામાં આવી છે. એટલું જ નહીં પાર્ટી ઓફિસ પરથી અનેક પેકેટ્સ પણ મળી આવ્યા છે અને તેના પર દરેક વોટરને રૂપિયા 300 આપવાનો હિસાબ પણ લખેલો છે.

આ દરમિયાન ચૂંટણી પંચની ટીમ અને AMMKના કાર્યકર્તાઓ વચ્ચે ઘર્ષણ પણ થયું.. જ્યારે પોલીસે ચાર સમર્થકોની ધરપકડ કરી છે અને 155 કાર્યકર્તાઓ વિરૂદ્ધ ફરિયાદ પણ દાખલ કરી છે. આ પહેલા ઈન્કમ ટેક્સ વિભાગના અધિકારીઓ સાથે મળીને ચૂંટણી પંચે કનિમોઝીના નિવાસ સ્થાને પણ દરોડા પાડ્યા હતા. પરંતુ તેઓને ખાલી હાથે પાછા આવવાનો વારો આવ્યો હતો. અધિકારીઓને ત્યાંથી કોઈ દસ્તાવેજ કે કોઈ રોકડ મળી નથી.

મંગળવારે રાત્રે 9.30 વાગ્યાથી શરૂ થયેલા દરોડા સવારે 5.30 વાગ્યા સુધી ચાલ્યાં. આ દરમિયાન અંદાજે 1 કરોડ 40 લાખ રૂપિયા જપ્ત કરવામાં આવ્યાં છે. આ રૂપિયા ઘણા બધા પેકેટમાં રાખવામાં આવ્યાં હતાં. જેમાં પેકેટસ પર વોર્ડ નંબર લખેલા છે અને દરેક મતદારોને 300 રૂપિયા આપવામાં આવેલ જેનો હિસાબ લખેલો છે.

જો કે ચૂંટણી આયોગની ટીમે જણાવ્યું છે કે દરોડામાં જપ્ત કરાયેલ રકમની ગણતરી કરવામાં આવશે. ત્યારબાદ ચોક્કસ આંકડો સામે આવશે. જો કે ઇન્કમટેક્સ વિભાગના દરોડા પાડવા જ્યારે ટીમ પહોંચી ત્યારે કાર્યકર્તાઓએ વિરોધ કરી હંગામો કર્યો હતો. પરિસ્થિતિ પર કાબૂ મેળવવા પોલીસે હવામાં ચાર રાઉન્ડ ફાયરિંગ કરવું પડ્યું. પોલીસે કાર્યવાહી કરતાં ચાર કાર્યકર્તાઓની ધરપકડ કરી છે. 'અમ્મા મક્કલ મુનેત્ર કડગમ' (AMMK) ટીટીવી દિનાકરની પાર્ટી છે. ગત વર્ષે દિનાકરને આ પાર્ટીનું ગઠન કર્યું હતું.