સ્વાસ્થ્ય / આ સુપર ફૂડ્સ ખાઈ લેજો નહીંતર કોરોનાનો શિયાળો પડશે ભારે 

• શિયાળામાં સ્વાસ્થ્યને રાખો સ્વસ્થ
• શાકભાજી ઇમ્યુનિટી વધારે છે
• ઔષધીય ગુણોથી ભરપુર દેશી ઘી

 બાજરો
ફાઇબર અને વિટામિન બી થી ભરપુર બાજરાની તાસીર ગરમ હોય છે. તેથી ઠંડીમાં તેનું સેવન લાભદાયી છે. તમે બાજરાની રોટલી, રોટલો, લાડુ કે સુખડી બનાવીને ખાઇ શકો છો.
 
લીલાં શાકભાજી
ઠંડીની સિઝનમાં પાલક, સાગ, મેથી, તાંદળજો જેવાં લીલાં પાંદડાંવાળાં શાકભાજી જરૂરથી ખાવાં જોઇએ.  આ ઉપરાંત લસણ, મશરૂમ, ગાજર, આદું, વટાણા, ટામેટાં વગેરેનું સેવન કરો. પેટની તકલીફો દૂર કરવાની સાથે સાથે આ શાકભાજી ઇમ્યુનિટી પણ વધારે છે.

 ગુંદર
જે વ્યક્તિઓને સાંધાના દુખાવાની સમસ્યા હોય તેણે ઠંડીની સિઝનમાં ગુંદરના લાડુ જરૂર ખાવાં જોઇએ. તેનાથી પિરિયડ્સ કે પેટ સાથે જોડાયેલી સમસ્યાઓમાંથી છુટકારો મળે છે. આ ઉપરાંત તમારી સ્કીન પણ ગ્લો કરવા લાગે છે.

 દેશી ઘી
ઔષધીય ગુણોથી ભરપુર દેશી ઘી આરોગ્યની સાથે સાથે ત્વચા માટે પણ ફાયદાકારક છે. તે ખાવાથી પેટની તકલીફો દૂર થાય છે સાથે સાથે હાડકાં પણ મજબૂત થાય છે. 

 તલ
તલના લાડુ, ચિક્કી, ગજકને પણ વિંટર ડાયટમાં જરૂર સામેલ કરો. તેમાં ફેટી એસિડ્સ, વિટામિન ઇ હોય છે. તેનાથી ખરતા વાળ, સાંધાનો દુખાવો જેવી સમસ્યાઓમાં રાહત મળે છે. 

 સિઝનલ ફ્રુટ્સ
જામફળ, સીતાફળ, નારંગી જેવાં મોસમી ફળો મન ભરીને ખાઇ લો. એન્ટી ઓક્સિડન્ટ અને એન્ટીબેક્ટેરિયલ તેમજ મિનરલ્સથી ભરપુર આ ફળ આરોગ્ય માટે બેસ્ટ છે.