ધરતીકંપ / કચ્છમાં ફરી ધરા ધ્રુજીઃ મોડી રાતથી વહેલી સવાર સુધીમાં 4 આંચકા અનુભવાયાં

• કચ્છમાં  મોડી રાતથી વહેલી સવાર સુધી 4 આંચકા આવ્યા
• ભચાઉ, રાપર અને દૂધઈમાં અનુભવાયા આંચકા
• ભચાઉ નજીક ભૂકંપનું કેન્દ્રબિંદુ

કચ્છમાં આ વર્ષે વરસાદે રેકોર્ડ તોડયાં બાદ હાલ બે દિવસથી સતત ભૂકંપના આંચકા અનુભવાતાં લોકોમાં ભયનો માહોલ જોવા મળી રહ્યો છે. કચ્છમાં મોડી રાતથી વહેલી સવાર સુધીમાં 4 આંચકા અનુભવાયાં છે. ભચાઉ, રાપર અને દૂધમાં આ આંચકા અનુભવાતા લોકો ઘરની બહાર દોડી આવ્યાં હતા. 

ભૂકંપના 4 આંચકાની તીવ્રતા ઓછી હોવાથી જો કે કોઇ જાનહાનીના નુકસાનના કોઇ અહેવાલ પ્રાપ્ત થયા નથી. 1.6, 2.5, 1.2 અને 1.9ની તીવ્રતા નોંધાઇ છે. આજે ભૂકંપનું કેન્દ્રબિંદુ ભચાઉ નજીક નોંધાયું છે.

કચ્છ જિલ્લાના અંજાર અને ભચાઉ તાલુકામાં ગઇકાલે ભૂકંપના આંચકા અનુભવાયાં હતા.  જેમાં 2જી તારીખે બપોરે 2 કલાક અને 5 મિનિટે ભૂકંપનો અનુભવ થયો હતો. જેના કારણે સ્થાનિક લોકોમાં ભયનો માહોલ વ્યાપી ગયો હતો. લોકો ડરના માર્યા પોતાના ઘરની બહાર નીકળી પડ્યા હતા. ભૂકંપની રિક્ટર સ્કેલ પર તિવ્રતા 4.1 નોંધાઈ હતી.