ડિજીટલ સ્ટેમ્પીંગ / ઈ-સ્ટેમ્પને લઈને રાજ્ય સરકારનો નિર્ણય, 1 ઓક્ટોબરથી કરાશે અમલ

• ઘરે બેઠાં ઓનલાઈન ઈ-સ્ટેમ્પ પેપર મેળવી શકશો
• 1 ઓક્ટોબરથી નોન જ્યુડિશિયલ ફિઝીકલ સ્ટેમ્પનો ઉપયોગ બંધ
• નાગરિકોની દસ્તાવેજ પ્રક્રિયા વધુ સુરક્ષિત, સરળ અને ઝડપી બનશે

સ્ટેમ્પ પેપરનાં કાળા બજારને રોકવા માટે રાજ્ય સરકારે મહત્વપુર્ણ નિર્ણય કર્યો છે. હવે ગુજરાતમાં તમે ઘરે બેઠાં ઓનલાઈન ઈ-સ્ટેમ્પ પેપર મેળવી શકશો. તમે ઓનલાઈન અલગ-અલગ દરનાં ઈ સ્ટેમ્પ ઉપર દસ્તાવેજની નોંધણી પણ કરી શકશો. 1 ઓક્ટોબરથી ઈ-સ્ટેમ્પ ઓનલાઈન મેળવી શકાશે.

સ્ટેમ્પ વેંડરોની જોહુકમીને નાથવા માટે મહેસૂલ વિભાગ દ્વારા ઓનલાઈન ઈ-સ્ટેમ્પનો નિર્ણય લેવાયો છે. ત્યારે હવે ઈ-સ્ટેમ્પની સાથે લાયસન્સ સ્ટેમ્પ વેન્ડર અને ચાર્ટડ એકાઉન્ટન્ટમાં પણ ઈ-સ્ટેમ્પની સુવિધા શરૂ કરાશે. જેને લઈને નાગરિકોની દસ્તાવેજ પ્રક્રિયા વધુ સુરક્ષિત, સરળ અને ઝડપી બનશે.

ઇ-સ્ટેમ્પીંગની સુવિધાનો વ્યાપ વધારવામાં આવશેઃ મહેસુલ મંત્રી

થોડા દિવસો પૂર્વે મહેસુલ મંત્રી કૌશિક પટેલ પ્રેસ કોન્ફરન્સ યોજીને ઈ-સ્ટેમ્પ મુદ્દે જાહેરાત કરી હતી. જેમાં તેમણે જણાવ્યું હતું કે, મહેસુલ વિભાગ સરળ અને ઝડપી બની રહ્યો છે. મહેસુલ વિભાગ દ્વારા ટેકનોલોજીનો ઉપયોગ કરાઇ રહ્યો છે. લોકોના કામ ઝડપી થાય તે માટે મહેસુલ વિભાગ કામ કરી રહ્યો છે. મહેસુલ વિભાગના તમામ કામો ઓનલાઇન કરવામાં આવી રહ્યા છે. 

તેમણે કહ્યું હતું કે, કેટલીક વાર સ્ટેમ્પની કુત્રિમ અછત ઉભી કરવામાં આવે છે. નાગરિકોને દસ્તાવેજ પ્રક્રિયા વધુ સરળ અને ઝડપી બનાવવામાં આવશે. ઈ-સ્ટેમ્પીંગની સુવિધાનો વ્યાપ વધારવામાં આવશે. હવે એડવાન્સમાં સ્ટેમ્પ પેપર ખરીદવાની જરૂર નહીં પડે. છેવાડાના ગામડાઓને પણ ઈ-સ્ટેમ્પીંગનો લાભ મળશે. આ સ્ટેમ્પનું ડુબ્લીકેશન પણ નહીં થાય.

વધુમાં કૌશિક પટેલે કહ્યું હતું કે, રાજ્યની જનતા ઈ-સ્ટેમ્પ પર દસ્તાવેજોની નોંધણી કરી શકશે. રાજ્યમાં હાલ 474 સુવિધા કેન્દ્રો કાર્યરત છે. રાજ્ય સરકાર દ્વારા લેવામાં આવેલ આ નિર્ણયથી રાજ્યના નાગરિકોને દસ્તોવેજ પ્રક્રિયા વધુ સરળ અને ઝડપી બનશે. સ્ટેમ્પ પેપરના વેચાણ માટે ઉદભવતાં કાળા બજારનો અંત આવશે.