ટ્રાફિક પોલીસે પોલીસકર્મીઓ સામે જ દંડનીય કાર્યવાહી કરીને માત્ર 7 દિવસમાં 57 હજારથી વધુ રૂપિયાનો દંડ વસૂલ્યો છે, સાત દિવસમાં ટ્રાફિક પોલીસે કુલ 77 કેસ કર્યા છે
અમદાવાદ ટ્રાફિક પોલીસની ખાસ ઝુંબેશ
ટ્રાફિકનો નિયમ ભંગ કરતા પોલીસકર્મીને દંડ
સાત દિવસમાં 57 હજારથી વધુનો દંડ
અમદાવાદમાં ટ્રાફિક પોલીસે ખાસ ઝુંબેશ હાથધરીને ટ્રાફિકના નિયમોનો ભંગ કરતા પોલીસકર્મીઓ સામે જ કાર્યવાહી હાથ ધરી છે. ટ્રાફિક પોલીસે પોલીસકર્મીઓ સામે જ દંડનીય કાર્યવાહી કરીને માત્ર 7 દિવસમાં 57 હજારથી વધુ રૂપિયાનો દંડ વસૂલ્યો છે. સાત દિવસમાં ટ્રાફિક પોલીસે કુલ 77 કેસ કર્યા છે. જેમાં સૌથી વધારે હેલ્મેટ વિના નીકળેલા પોલીસકર્મીઓ સામે 39 કેસ અને કારમાં સીટબેલ્ટ ન પહેરનારા 14 કેસ કર્યા છે. તેમજ ખાનગી વાહનોમાં પોલીસની પ્લેટ લગાવવાના 7, ગાડીના કાચ પર ડાર્ક ફિલ્મના 7, HSRP નંબર પ્લેટ વિનાના 2 અને ટુ વ્હીલર પર પોલીસનુ બોર્ડ લગાવવા બાબતે 2 પોલીસકર્મીઓ સામે કાર્યવાહી કરીને 57 હજાર 400 રૂપિયાનો દંડ ફટકાર્યો છે.
ટ્રાફિક પોલીસ પાસે લોકોના બહાના ચાલશે નહીં
અમદાવાદમાં ટ્રાફિક દંડની રકમ સ્થળ પરથી ડિજિટલ પેમેન્ટ કરી શકશે. ટ્રાફિક પોલીસ કર્મીઓને હવે POS મશીન અપાશે. 150 જેટલા POS મશીન આપવામાં આવશે. આ માટે ટ્રાફિક પોલીસ કર્મીને ટ્રેઇનિંગ પણ અપાઇ હતી. જેમાં રોડ પર ટ્રાફિક ભંગ કરનાર ડિજિટલ પેમેન્ટ કરી દંડ ભરવાનો રહેશે.
લાંબા સમય બાદ પોલીસે ઇ-મેમો આપવાનું શરૂ કર્યું છે ત્યારે ટ્રાફિક નિયમોનો ભંગ કરતા અને ખિસ્સામાં પુરા પૈસા ન હોવાનું બહાનું કાઢતા વાહનચાલકો માટે ડિજીટલ પેમેન્ટની સિસ્ટમ દાખલ કરી છે. આ નવી સિસ્ટમ મુજબ રોકડ પેમેન્ટ ન ચૂકવનાર વાહન ચાલકો પાસેથી પોલીસ POS મશીનથી દંડ વસુલ કરશે. આ મશીન દ્વારા કાર્ડ પેમેન્ટ, UPI, QR કોડ, ભીમ એપ જેવા માધ્યમોથી પેમેન્ટ થઈ શકશે.
હાલમાં POS મશીન માટે ટ્રાફિક પોલીસે SBI સાથે MOU કર્યા છે. એટલું જ નહીં જો કોઈ વાહન ચાલક પોલીસ સાથે રકઝક કરશે તો તેના ફોટો કે વિડિયો પણ આ મશીનથી ઉતારી શકશે. આ પ્રકારના ડિજીટલ પેમેન્ટથી ટ્રાફિક પોલીસમાં ભ્રષ્ટાચારનું પ્રમાણ પણ ઘટી જશે.