બિઝનેસ / તહેવારોની સિઝનમાં ઈ-કોમર્સ કંપનીઓની બલ્લે બલ્લે, ઓનલાઈન વેચાણમાં તેજીના સંકેત

દેશમાં તહેવારોની સિઝન શરૂ થઈ ગઈ છે અને આગામી દિવસોમાં નવરાત્રીથી લઈને દિવાળી જેવા મોટા તહેવારો આવી રહ્યા છે. દર વર્ષની જેમ આ વખતે પણ તહેવારોની સિઝનમાં બજાર અને અર્થવ્યવસ્થાને વેગ મળવાનો છે. તાજેતરના વર્ષોમાં ઓનલાઈન શોપિંગના વધતા વલણે ઈ-કોમર્સ સેક્ટર માટે તહેવારોની સિઝનને ખાસ બનાવી દીધી છે. આ વખતે પણ તહેવારો દરમિયાન ઈ-કોમર્સ કંપનીઓનું વેચાણ જબરદસ્ત રહેશે તેવી અપેક્ષા કરાઈ રહી છે.

ઓનલાઈન વેચાણમાં આવી શકે છે ભારે તેજી

માર્કેટ રિસર્ચ ફર્મ ડેટમ ઈન્ટેલિજન્સનો તાજેતરનો રિપોર્ટ સૂચવે છે કે આ વર્ષે તહેવારોની સિઝનમાં ઈ-કોમર્સ કંપનીઓનું વેચાણ $12 બિલિયનના સ્તરે પહોંચી શકે છે. ગયા વર્ષે, તહેવારોની સિઝનમાં લગભગ $9.7 બિલિયનની કિંમતનો સામાન ઓનલાઈન વેચાયો હતો. રિસર્ચ ફર્મનું માનવું છે કે આ વખતે તહેવારોની સિઝનમાં વેચાણમાં 23 ટકાનો વધારો થવા જઈ રહ્યો છે. રિપોર્ટ અનુસાર, ઝડપથી વિકસતું ક્વિક કોમર્સ સેગમેન્ટ ઈ-કોમર્સ કંપનીઓના કુલ વેચાણમાં નોંધપાત્ર યોગદાન રહેવાનું છે. ક્વિક કોમર્સ સેગમેન્ટથી તહેવારોની સિઝન દરમિયાન સેલમાં આશરે $1 બિલિયનનું યોગદાન આવી શકે છે.

ડેટમ ઇન્ટેલિજન્સે તેના અહેવાલમાં વેચાણના આંકડા માટે GMV એટલે કે ગ્રોસ મર્ચેન્ડાઇઝ વેલ્યુનો ઉપયોગ કર્યો છે. જીએમવીમાં ઈ-કોમર્સ પ્લેટફોર્મ દ્વારા કરવામાં આવેલા વિવિધ માલસામાનના વેચાણના સંયુક્ત ડેટાનો સમાવેશ થાય છે, પરંતુ ડિસ્કાઉન્ટ અને રિટર્નને એડજસ્ટ નથી કરવામાં આવતું.

સૌથી વધુ વેચાણની અપેક્ષા

રિપોર્ટ અનુસાર, તહેવારોની સિઝનમાં મોબાઈલ અને ફેશન જેવી કેટેગરી ઓનલાઈન વેચાણમાં સૌથી વધુ યોગદાન આપશે. કુલ વેચાણમાં તેમનો ફાળો 50 ટકા જેટલો હોઈ શકે છે. કરિયાણાના વેચાણમાં ક્વિક કોમર્સનો હિસ્સો ઝડપથી વધી રહ્યો છે. રિપોર્ટમાં એવી અપેક્ષા રાખવામાં આવી રહી છે કે તહેવારોની સિઝન દરમિયાન ઓનલાઇન કરિયાણાના વેચાણમાં ક્વિક કોમર્સનું યોગદાન 50 ટકા સુધી પહોંચી શકે છે, જે ગયા વર્ષે 37.6 ટકા હતું.

આ પણ વાંચો: શેરબજારમાં રેકોર્ડ બ્રેક તેજી, સેન્સેક્સ-નિફ્ટી ઓલ ટાઈમ હાઈ, રોકાણકારોની બલ્લે બલ્લે

27 સપ્ટેમ્બરથી ફેસ્ટિવ સીઝન સેલ

દર વર્ષે તહેવારોના મહિનાઓમાં ભારતમાં વિવિધ ક્ષેત્રોમાં વેચાણમાં વધારો થાય છે. તહેવારો દરમિયાન, લોકો કરિયાણાથી માંડીને કપડાથી લઈને સ્માર્ટફોન અને અન્ય ઘરેલું ઉપકરણોથી લઈને કાર અને બાઈક સુધીની ભારે ખરીદી કરે છે. તહેવારોની સિઝનને ધ્યાનમાં રાખીને ઈ-કોમર્સ કંપનીઓ પણ ખાસ સેલ રાખે છે. આ વખતે એમેઝોન અને ફ્લિપકાર્ટનું ફેસ્ટિવ સીઝન સેલ 27 સપ્ટેમ્બરથી શરૂ થઈ રહ્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ