સ્પષ્ટતા / અમદાવાદની ઈન્ટરનેશલ સ્કૂલમાં ઈ-સિગારેટ અને ડ્રગ્સ મળવાની વાત ખોટી નીકળી, DEOની તપાસમાં ખુલાસો

• પોદાર સ્કૂલમાં વિદ્યાર્થીના બેગમાંથી રોકડ રકમ મળવાના મુદ્દે ખુલાસો
• વાલીઓના વોટ્સએપ ગ્રુપમાં ઈ-સિગારેટ અને ડ્રગ્સ મળવાની થઈ હતી ચર્ચા
• ગાંધીનગર DEO ઓફિસની ટીમ પહોંચી હતી શાળામાં 
• DEOની ટીમની તપાસમાં ડ્રગ્સ, ઈ-સિગારેટની વાત ખોટી સાબિત થઈ

અમદાવાદ શહેરના છેવાડે આવેલી એક ખ્યાતનામ પોદાર ઈન્ટરનેશનલ સ્કૂલમાં એક વિદ્યાર્થીના બેગમાંથી રોકડ રકમ, ઈ-સિગારેટ અને ડ્રગ્સ મળી આવ્યું હોવાના મેસેજો વાલીઓના ગ્રુપમાં ફરતા થયા હતા. જે બાદ  ગાંધીનગર જિલ્લા શિક્ષણાધિકારી (DEO) કચેરીથી એક ટીમ પણ પોદાર ઈન્ટરનેશનલ સ્કૂલ ખાતે દોડી આવી હતી અને તપાસનો ધમધમાટ શરૂ કર્યો હતો. DEOની ટીમની તપાસમાં ડ્રગ્સ, ઈ-સિગારેટની વાત ખોટી સાબિત થઈ છે. આ ઉપરાંત ગાંધીનગર જિલ્લા શિક્ષણાધિકારીએ (DEO) સ્કૂલના વિદ્યાર્થીના બેગમાંથી રૂ. 12 હજાર રોકડા મળ્યાની પુષ્ટિ કરી છે.

એક વિદ્યાર્થી પાસેથી 12 હજાર રોકડા મળ્યા હતાઃ DEO
આ અંગે ગાંધીનગર DEO ભરત વાઢેરે જણાવ્યું હતું કે, અમારી પ્રાથમિક તપાસમાં સ્કૂલે નિયમિતપણે થતું ચેકિંગ હાથ ધર્યું હતું, જેમાં એક વિદ્યાર્થી પાસેથી 12 હજાર રોકડા મળ્યા હતા. આ મામલે વિદ્યાર્થીના વાલીને જાણ પણ કરવામાં આવી હતી. તો તપાસમાં ડ્રગ્સ, ઈ-સિગારેટની વાત ખોટી સાબિત થઈ છે.

તપાસમાં ડ્રગ્સ અને ઈ સિગારેટની વાત નીકળી અફવા
પોદાર ઈન્ટરનેશનલ સ્કૂલના મેનેજમેન્ટ દ્વારા ચેકિંગ દરમિયાન ધોરણ 11ના 16-17 વર્ષની વયના એક વિદ્યાર્થીના બેગમાંથી ઈ-સિગારેટ, ડ્રગ્સ અને રોકડ રકમ મળી આવી હતી આ પ્રકારના મેસેજો સ્કૂલમાં અભ્યાસ કરતા વિદ્યાર્થીઓના વાલીઓના વ્હોટ્સએપ ગ્રુપમાં વાયરલ હતા. ગ્રુપમાં આ મામલે જોરશોરથી ચર્ચા શરૂ થઈ છે. આ ઘટનાને લઈને વાલીઓ પણ ચિંતામાં મુકાયા હતા. જોકે, DEO ઓફિસની ટીમની તપાસમાં ડ્રગ્સ અને ઈ સિગારેટ મળવાની વાત નીકળી અફવા છે.