કરજણ / કુરાલી ગામે DyCM પર અજાણી વ્યક્તિએ જૂતું ફેંક્યું, મીડિયા કર્મીઓને સંબોધી રહ્યા હતા ત્યારે બની ઘટના

• DyCM નીતિન પટેલ પર ચપ્પલ ફેંકાયુ
• નીતિન પટેલ પર કુરાલી ગામે ફેકાયુ ચપ્પલ
• કુરાલી ગામે જાહેરસભા દરમિયાન બની ઘટના

કુરાલી ગામે જાહેરસભા દરમિયાન નાયબ મુખ્યમંત્રી નીતિન પટેલ પર જુતુ ફેંકાયું છે. કુરાલી ગામે જાહેરસભાના સંબોધન બાદ તેઓ મીડિયા કર્મીઓને સંબોધી રહ્યા હતા આ દરમિયાન અજાણી વ્યક્તિ દ્વારા નાયબ મુખ્યમંત્રી પર ચપ્પલ ફેંકવામાં આવ્યું હતું. કોણે જૂતું ફેક્યું તે જાણવા નથી મળ્યું, પરંતુ પોલીસ દ્વારા તપાસ શરૂ કરવામાં આવી છે. જોકે આ ઘટનાનું VTV સમર્થન નથી કરતું.

મારુ ધ્યાન બાઇટ આપવામાં હતુંઃ DyCM નીતિન પટેલ

આ અંગે નીતિન પટેલે કહ્યું કે, હું મારી બાઇટ આપવામાં વ્યસ્ત હતો, અમારે એક એક શબ્દ તોલી તોલીને બોલવાનો હોય, અર્થનો અનર્થ ન થાય તેનું ધ્યાન રાખવાનું હોય અને કાળજી રાખવાની હોય.

પોલીસ ચપ્પલ ફેંકનાર વ્યક્તિને શોધી રહી છેઃ કરજણ પોલીસ

કરજણ પોલીસ સ્ટેશનના PI એ.એ. દેસાઈએ આ અંગે નિવેદન આપ્યું હતું. તેમણે કહ્યું કે, મીડિયાના માધ્યમથી પોલીસને જાણ થઈ છે. પોલીસે તપાસ શરૂ કરી છે. પોલીસની હાજરીમાં આ ઘટના બની છે. પોલીસ જવાનોને પણ આ ઘટનાની જાણ નથી થઈ. પોલીસ ચપ્પલ ફેંકનાર વ્યક્તિને શોધી રહી છે.

DyCM નીતિન પટેલ પર જુતુ ફેંકવાની ઘટનાને કોંગ્રેસે વખોડી 

કોંગ્રેસ પ્રવક્તા જયરાજસિંહ પરમારે આ ઘટના અંગે કહ્યું કે, લોકશાહીમાં વિરોધની આ પદ્ધતિ યોગ્ય નહીં. જનતાનો રોષ છે પરંતુ વિરોધની આ રીત ક્યારેય ના હોઈ શકે. જે સ્થળે જુતુ ફેંકાયું એ ભાજપની સભા અને ભાજપના કાર્યકરો હતા. બધા જ ભાજપના નેતાઓ અને કાર્યકરો હાજર હોવા છતાં કોંગ્રેસ પર દોષારોપણ કેમ ? રાહુલ ગાંધી પર ગુજરાતમાં પથ્થર ફેંકાયો ત્યારે ભાજપે તેને વખોડી હોત તો આવું ના થાત. જનતાનો છૂપો રોષ આવી રીતે વ્યક્ત થઇ રહ્યો છે.