ગુજરાતના ધારાસભ્યો પ્રજાના પૈસે કેવી રીતે તાગડધિન્ના કરી રહ્યા છે તેનો એક આરટીઇમાં ખુલાસો થયો હતો. ગુજરાતના ધારાસભ્યોની તબીબ સારવારનો 2012થી 2017 સુધીનો ખર્ચ સામે આવ્યો હતો. એક આરટીઇમાં 40થી વધારે ધારાસભ્યોના મેડિકલ બિલની વિગત સામે આવી હતી. જેમાં ધારાસભ્યો વૈભવી તબીબી સુવિધા લેઇ રહ્યાં હોવાનું સામે આવ્યું હતું. ત્યારે આ મામલે નાયબ મુખ્યમંત્રી નીતિન પટેલે નિવેદન આપ્યું હતું.
વિધાનસભા ગૃહમાં ધારાસભ્યોના મેડિકલ બીલ પર આરોગ્ય મંત્રી નીતિન પટેલે ધારાસભ્યોને ટકોર કરી હતી. નીતિન પટેલે જણાવ્યું હતું કે, લાખો રૂપિયા પગાર ધરાવતા ધારાસભ્યો સરકાર પાસેથી મેડિકલ બીલ લે છે. તમામ ધારાસભ્યો સક્ષમ હોવા છતાં પણ મેડિકલ બીલ મુકે છે. ફેક્ટરીઓ અને હોટલો ધરાવતા ધારાસભ્યો મેડિકલ બીલ મુકે છે. વધુમાં તેમણે જણાવ્યું હતું કે, હું ક્યારેય સરકારી મેડિકલ બીલ લેતો નથી.
RTIમાં થયો હતો આ ખુલાસો
ધારાસભ્ય મિતેશ ગરાસિયાએ 5.91 લાખ રૂપિયાની સહાય લીધી હતી. જ્યારે તેઓ ખુદ ડૉક્ટર છે. આ ઉપરાંત અંજાર ધારાસભ્ય નીમાબેન આચાર્યએ પણ ખુદ અને તેમના પતિ ડૉક્ટર હોવા છતા મેડિકલ ખર્ચ લીધો હતો.
ઉપરાંત ભાજપ પ્રદેશ પ્રમુખ જીતુ વાઘાણીએ 3.70 લાખનું બિલ મંજૂર કરાવ્યું હતું. જ્યારે ઝગડીયાના ધારાસભ્ય છોટું વસાવાએ સૌથી વધારે 6.56 લાખ બિલ લીધું હતું. તો સાણંદના તત્કાલિ ધારાસભ્ય કરમશી મકવાણાએ 4.62 લાખ લીધા હતા જ્યારે પેટલાદના નિરંજન પટેલે 5.72 લાખ રૂપિયાનું બિલ મંજૂર કરાવ્યું હતું.
તો વાત કરીએ રામસિંહ પરમાર અને પુંજા વંશની તો તેઓએ સાડા ચાર લાખનું બિલ મંજૂર કરાવ્યું હતું. રમેશ ચાવડા અને મોહન રાઠવાએ 4-4 લાખ રૂપિયાનું બિલ મેળવ્યું હતું. જ્યારે વડગામના મણીભાઇ વાઘેલાએ રૂપિયા 4.20 લાખ પાસ કરાવ્યા હતા. જ્યારે પૂર્વ ધારાસભ્ય પંકજ મહેતાએ રૂ. 3.36 લાખનું બિલ મંજૂર કરાવ્યું હતું.
જ્યારે જોયતા પટેલ અને કરમશી પટેલે 3 લાખ અને 4 લાખ મંજૂર કરાવ્યા. આરટીઆઇમાં ધારાસભ્યોને મળેલા મેડિકલ એલાઉન્સમાં આ ખુલાસો થયો હતો. ત્યારે કરોડોની સંપત્તિ હોવા છતા પણ ધારાસભ્યો લાખો રૂપિયાના બિલ પાસ કરાવી રહ્યા છે. ત્યારે નીતિન પટેલે ધારાસભ્યોને ટકોર કરી હતી.