મહિલા ધારાસભ્યના વિસ્તારમાં 1 કરોડ રૂપિયાની વધારાની ગ્રાન્ટ આપવાની વાત કરી છે. માર્ગ-મકાન વિભાગ હેઠળ 1 કરોડ રૂપિયાની વધુની ગ્રાન્ટ ફાળવવામાં આવશે.
આંતરરાષ્ટ્રિય મહિલા દિવસે ગુજરાતમાં વિશેષ જાહેરાત
નાયબ મુખ્યપ્રધાન નીતિન પટેલની ગૃહમાં જાહેરાત
મહિલા ધારાસભ્યોના વિસ્તારમાં 1 કરોડની વધુની ગ્રાન્ટ
વિશ્વ મહિલા દિવસે ગુજરાત વિધાનસભામાં એક વિશેષ જાહેરાત થઈ છે. નાયબ મુખ્યમંત્રી દ્વારા મહિલા દિવસને લઈને નીતિન પટેલે મહત્વની જાહેરાત કરી છે. મહિલા ધારાસભ્યના વિસ્તારમાં 1 કરોડ રૂપિયાની વધારાની ગ્રાન્ટ આપવાની વાત કરી છે. માર્ગ-મકાન વિભાગ હેઠળ 1 કરોડ રૂપિયાની વધુની ગ્રાન્ટ ફાળવવામાં આવશે. વિધાનસભા ગૃહમાં જ નાયબ મુખ્ય પ્રધાન નીતિન પટેલે આ જાહેરાત કરી છે.
મહિલાઓની મહાનતાને સલામ કરવાનો દિવસ
વિશ્વભરમાં આજે મહિલા દિવસની ઉજવણી કરવામાં આવી રહી છે અને જીવનમાં નારીનું શું મહત્વ છે તથા નારીના જીવનને લઈને ચર્ચા કરવામાં આવી રહી છે તથા સોશ્યલ મીડિયામાં પણ નારીઓને પ્રોત્સાહન આપવા માટે યુવાનોમાં આજના દિવસનો ક્રેઝ છે ત્યારે ગુજરાત સરકારે પણ આજે મહિલા દિવસને લઈને આયોજનો કર્યા હતા.
ગુજરાતની જનતાની સેવામાં મહિલાઓનું યોગદાન છે: DyCM
નીતિન પટેલે વધુમાં કહ્યું કે ગુજરાતની જનતાની સેવામાં મહિલાઓનું યોગદાન છે અને આરોગ્ય વિભાગમાં, શિક્ષણ વિભાગમાં તથા સચિવાલયમાં કામ કરતી મહિલાઓનો સહયોગ મળે છે ત્યારે કામ થાય છે. જો આ મહિલાઓનો ન હોય તો સેવા ન કરી શકે. બહેનોને મદદરૂપ થવા અમારી સરકારે યોજનાઓ બનાવી છે.
મુખ્યમંત્રીના હસ્તે મહિલાઓને ચેક વિતરણ
નોંધનીય છે કે આજે સવારે ગાંધીનગરના મહાત્મા મંદિરમાં આંતરરાષ્ટ્રીય મહિલા દિવસની ઉજવણી કરવામાં આવી હતી જેમાં મુખ્યમંત્રી વિજય રૂપાણીના હસ્તે મહિલાઓને ચેક વિતરણ કરવામાં આવ્યું હતું. વ્હાલી દિકરી યોજના અંતર્ગત લાભાર્થીઓને ચેક વિતરણ કરવામાં આવ્યું હતું. પોર્ટલથી આંગણવાડી બહેનોને વેતન ચુકવણીનો શુભારંભ પણ કરવામાં આવ્યો તથા મહિલા-બાળ વિકાસ વિભાગની ડિજિટલ બુકનું વિમોચન કરવામાં આવ્યું હતું.