ગુજરાતના નાયબ મુખ્યમંત્રી અને આરોગ્ય મંત્રી નીતિન પટેલ કોરોના પોઝિટિવ આવ્યા છે. તેઓ 2 દિવસથી અમિત શાહ સાથે હતા.
નાયબ મુખ્યમંત્રી નીતિન પટેલ કોરોના પોઝિટિવ
UN હોસ્પિટલમાં કરાયા દાખલ
વેક્સિનનો 1 ડોઝ લઇ ચૂક્યા છે
નાયબ મુખ્યમંત્રી નીતિન પટેલ કોરોના સંક્રમિત થયા છે. તેમનો રિપોર્ટ પોઝિટિવ આવતા તેમને અમદાવાદની UN મહેતા હોસ્પિટલમાં દાખલ કરાયા છે. તેઓ 2 દિવસથી અમિત શાહ સાથે હતા. મહત્વનું છે કે તેઓ અગાઉ કોરોના વેક્સિનનો એક ડોઝ લઇ ચૂક્યા છે.
ગઈકાલે કેન્દ્રીય ગૃહમંત્રી અમિત શાહે આ હોસ્પિટલનું નિરીક્ષણ કર્યું હતું. જે દરમિયાન મુખ્યમંત્રી વિજય રૂપાણી અને નાયબ મુખ્યમંત્રી નીતિન પટેલ પણ હાજર રહ્યા હતા. ત્યારબાદ હોસ્પિટલમાં જ કોરોનાની પરિસ્થિતિ અંગે મહત્વની બેઠક યોજાઈ હતી. તો આજે તેઓ ગાંધીનગરના કોલવડા કોવિડ હોસ્પિટલની મુલાકાત લીધી હતી. અહીં PSA ઓક્સિજન પ્લાન્ટનું ઉદ્ધાટન કરાયું હતું. અહીં પણ અમિત શાહની સાથે નીતિન પટેલ અને વિજય રૂપાણી હતા.
મહત્વનું છે કે, અગાઉ અમિત શાહ અને મુખ્યમંત્રી વિજય રૂપાણી પણ કોરોના પોઝિટિવ થઇ ચૂક્યા છે. તો અમિત શાહ, વિજય રૂપાણી અને નીતિન પટેલ કોરોના વેક્સિનનો ડોઝ લઇ ચૂક્યા છે.
રાજ્યમાં ગઇકાલે 24 કલાકમાં કોરોનાના 13,804 નવા કેસ નોંધાયા છે તો સંક્રમણના કારણે 142 લોકોના મોત નિપજ્યા છે. આ સાથે જ 5,618 દર્દીઓ સાજા થયાં છે. આ સાથે જ અત્યાર સુધીમાં 3,61,493 દર્દીઓ કોરોના મુક્ત થયાં છે.
ઉલ્લેખનીય છે કે, છેલ્લા 24 કલાકમાં રાજ્યમાં 142 લોકોના સારવાર દરમિયાન મોત થયાં છે. આમ ગુજરાતમાં અત્યાર સુધીમાં 6019 લોકોના મોત કોરોનાને કારણે થયાં છે. ગઇકાલ કરતા આજે કોરોનાના કેસમાં ચિંતાજનક ઉછાળો નોંધાયો છે તો સાથોસાથ મૃત્યુનો આંકડો પણ દિવસેને દિવસે વધી રહ્યો છે. રાજ્યમાં હાલ 384 લોકો વેન્ટિલેટર પર છે. એક્ટિવ કેસનો આંકડો 1,00,128 પર પહોંચ્યો છે.
સુરત અને અમદાવાદમાં કોરોના બેકાબૂ
ગુજરાતમાં રસીકરણની કામગીરી ચાલુ હોવા છતાં બીજી તરફ પરિસ્થિતિ બેફામ છે. કોરોનાના કેસમાં સતત વધારો થતા ચિંતા વધી છે. અમદાવાદ શહેરમાં રાજ્યના સૌથી વધુ 5411 કેસ તો અમદાવાદ ગ્રામ્યમાં 59 કેસ નોંધાયા છે. જ્યારે સુરત શહેરમાં 2176 નવા કેસ, જ્યારે સુરત ગ્રામ્યમાં 641 કેસ નોંધાયા છે. વડોદરા શહેરમાં 546 કેસ, જ્યારે ગ્રામ્યમાં 170 કેસ નોંધાયા. રાજકોટ શહેરમાં 626 કેસ અને ગ્રામ્યમાં 93 કેસ નોંધાયા છે. ત્યારે જાણો 24 કલાક દરમિયાન રાજ્યના તમામ જિલ્લામાં નોંધાયેલ કેસની વિગત...