ગાંધીનગરઃ ચૂંટણીઓ આવી છે ત્યારે કેટલીક ઉથલપાથલ પણ સર્જાય છે પક્ષપલ્ટા થાય છે. ત્યારે અલ્પેશ ઠાકોર છેલ્લા ઘણા સમયથી કોંગ્રેસથી નારાજ હોવાનું સામે આવી રહ્યું છે. એવી પણ ચર્ચા વહેતી થઇ હતી કે તેઓ ભાજપમાં જોડાવાના છે. ત્યારે કોંગ્રેસના બે ધારાસભ્યોએ અલ્પેશ ઠાકોર અને ધવલસિંહ ઝાલાએ આજે મુખ્યમંત્રી વિજય રૂપાણી સાથે મુલાકાત કરી હતી. ત્યારે અલ્પેશના ભાજપમાં જોડાવાની વાતને વધુ વેગ મળ્યો છે.
CM સાથેની મુલાકાતને લઇને નીતિન પટેલે પ્રેસ કોન્ફરન્સ દરમિયાન નિવેદન આપ્યું છે. તેમણે કહ્યું કે કોઇ પણ ધારાસભ્ય CMને ગમે ત્યારે મળી શકે છે. ભાજપ અને કોંગ્રેસ બંને ધારાસભ્યો મળવા આવે છે. ધારાસભ્યો કામ માટે CMને મળવા આવતા હોય છે.
ઉલ્લેખનીય છે કે આ પહેલા એકતા યાત્રા દરમિયાન અલ્પેશ ઠાકોરે ભાજપના નેતા શંકર ચૌધરી સાથે પણ મુલાકાત કરી હતી. જો કે અલ્પેશ ઠાકોર અને ધવલસિંહ ઝાલાએ મુખ્યમંત્રી સાથે કરેલી મુલાકાત પર સ્પષ્ટતા કરતા જણાવ્યું હતું કે તેઓ બાયડના ધારાસભ્ય ધવલસિંહ ઝાલાને સાબરકાંઠા પોલીસ પરેશાન કરતી હોવાની રજૂઆત સાથે મળવા પહોંચ્યા હતા. તેમણે પોલીસ ખોટી રીતે હેરાન કરવાનું બંધ કરે તેવી રજૂઆત કરી હતી. સીએમ રૂપાણી અને અલ્પેશ ઠાકોર વચ્ચે અડધી કલાક સુધી ચર્ચા ચાલી હતી.